ខេត្តពោធិ៍សាត់ ៖ លោក ខូយ រីដា បានណែនាំដល់ក្រុមការងារទទួលជនភៀសសឹក ត្រូវធានាឱ្យបាននូវសណ្តាប់ធ្នាប់ និងសុវត្ថិភាពល្អ នៅតាមទីតាំងសុវត្ថិភាព បំពេញតាមតម្រូវការផ្សេងៗ…
ខេត្តពោធិ៍សាត់ ៖ លោក ខូយ រីដា បានណែនាំដល់ក្រុមការងារទទួលជនភៀសសឹក ត្រូវធានាឱ្យបាននូវសណ្តាប់ធ្នាប់ និងសុវត្ថិភាពល្អ នៅតាមទីតាំងសុវត្ថិភាព បំពេញតាមតម្រូវការផ្សេងៗ សម្រាប់បងប្អូនប្រជាពលរដ្ឋជនភៀសសឹកស្នាក់នៅ ។
ការណែនាំរបស់លោក ខូយ រីដា អភិបាល នៃគណៈអភិបាលខេត្តពោធិ៍សាត់ នារសៀលថ្ងៃអង្គារ ទី៩ ខែធ្នូ ឆ្នាំ២០២៥ ក្នុងឱកាសអញ្ជើញជួបសួរសុខទុក្ខបងប្អូនប្រជាពលរដ្ឋ ដែលជាជនភៀសសឹក មកពីឃុំថ្មដា ព្រំដែនកម្ពុជា-ថៃ កំពុងស្នាក់នៅជាបណ្តោះអាសន្ន នៅទីតាំងមានសុវត្តិភាព ក្នុងទីប្រជុំជនស្រុកវាលវែង ។
បើតាមលោក ធាង ឡេង អភិបាលស្រុកវាលវែង បានបញ្ជាក់ឱ្យដឹងថា ប្រជាពលរដ្ឋ ដែលបានជម្លៀសចេញពីឃុំថ្មដា សរុបមានប្រមាណ ៣,៧៣៦នាក់ ស្មើនឹង៩០០គ្រួសារ។ ក្រោមការយកចិត្តទុកដាក់ពីលោក ខូយ រីដា ជាអភិបាលខេត្ត អាជ្ញាធរខេត្តពោធិ៍សាត់ និងអាជ្ញាធរស្រុកវាលវែង បានរៀបចំទីតាំងមានសុវត្ថិភាព ចំនួន២កន្លែង និងបានជួយអន្តរាគមន៍ជួយជម្លៀសប្រជាពលរដ្ឋ ដែលប្រឈមខ្លាំង មកកាន់ទីតាំងមានសុវត្ថិភាព ដោយគិតត្រឹមម៉ោង៣រសៀលថ្ងៃទី៩ ខែធ្នូ ឆ្នាំ២០២៥នេះ មានបងប្អូនប្រជាពលរដ្ឋ ដែលជាជនភៀសសឹក កំពុងស្នាក់នៅបណ្តោះអាសន្ន នៅទីតាំងមានសុវត្ថិភាព សរុបមានចំនួន១,៧៧៩នាក់ ក្នុងនោះស្ត្រីមានចំនួន៩៣១នាក់ សិស្សានុសិស្ស ចំនួន៣៨៩នាក់ ស្ត្រីមានផ្ទៃពោះចំនួន៩នាក់ និងមនុស្សអាយុក្រោម១៥ឆ្នាំ មាន៦០៤នាក់ ។
ក្នុងឱកាសនោះ លោក ខូយ រីដា បានជម្រាបជូនបងប្អូនប្រជាពលរដ្ឋជនភៀសសឹកថា ប្រទេសកម្ពុជា រាជរដ្ឋាភិបាលកម្ពុជា គោរពជានិច្ច នូវកិច្ចព្រមព្រៀងសន្តិភាព កម្ពុជាត្រូវការសន្តិភាព មិនត្រូវការសង្គ្រាមនោះទេ តែបើមានការរំលោភឈ្លានពាន ភារកិច្ចចម្បង និងចំពោះមុខរបស់រាជរដ្ឋាភិបាលគឺ ៖ ១. ការពារប្រជាជន ២. ការពារបូរណភាពទឹកដីក្នុងដែនអធិបតេយ្យភាពរបស់កម្ពុជា នេះបើតាមប្រសាសន៍របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។ ហើយសម្តេចសូមឱ្យគ្រប់ក្រសួងស្ថាប័ន អជ្ញាធរគ្រប់លំដាក់ថ្នាក់ កងកម្លាំងប្រដាប់អាវុធគ្រប់ប្រភេទ និងប្រជាពលរដ្ឋខ្មែរទាំងអស់ រួមសាមគ្គីគ្នាដើម្បីបុព្វហេតុជាតិ មាតុភូមិក្នុងដំណាក់កាលដ៏លំបាកនេះ ៕
ចែករំលែកព័តមាននេះ