ទីក្រុងឡុង៖ ក្រុមសម្ព័ន្ធមិត្តរបស់អ៊ុយក្រែននៅអឺរ៉ុបបានឯកភាពគ្នាថាត្រូវតែបង្កើនការឧបត្ថម្ភ-គាំទ្របន្ថែមទៀតសម្រាប់អ៊ុយក្រែនតស៊ូនៅក្នុងសង្គ្រាម ហើយត្រូវតែបង្កើនការដាក់សម្ពាធទៅលើលោកពូទីនឱ្យខ្លាំងក្លាបន្ថែមទៀត។ ក្រុមប្រទេសទាំងនោះយល់ថាកិច្ចខិតខំប្រឹងប្រែងដើម្បីបិទបញ្ចប់សង្គ្រាមអ៊ុយក្រែនបានដើរដល់ដំណាក់កាលដ៏សំខាន់មួយ។ នេះបើតាមការប្រកាសរបស់ខុទ្ទកាល័យនាយករដ្ឋមន្ត្រីអង់គ្លេសដែលជាទីជួបគ្នារវាងលោកហ្សេឡិនស្គី និងថ្នាក់ដឹកនាំក្រុមសម្ព័ន្ធមិត្ត។
សេចក្ដីប្រកាសរបស់នាយករដ្ឋមន្ត្រីអង់គ្លេសដូចខាងលើនេះធ្វើឡើងនៅពេលលោកហ្សេឡិនស្គីអះអាងថាលោកនឹងចែករំលែកផែនការម្ភៃចំណុចដែលរៀបចំឡើងដោយអ៊ុយក្រែននៅថ្ងៃអង្គារនេះ។ ទន្ទឹមនឹងនោះ អ៊ុយក្រែន និងរុស្ស៊ីក៏កំពុងពិនិត្យផែនការសន្តិភាព២៨ចំណុចដែលផ្ដួចផ្ដើមឡើងដោយលោកដូណាល់ត្រាំផងដែរ។ លោកហ្សេឡិនស្គីទើបតែប្រើសម្ដីស៊កសៀតដាក់លោកត្រាំកាលពីម្សិលមិញបន្ទាប់ពីលោកត្រាំថ្លែងប្រាប់អ្នកសារព័ត៌មានថាតាមមើលទៅលោកហ្សេលិនស្គីមិនទាន់ចង់ចុះហត្ថលេខាលើកិច្ចព្រមព្រៀងដើម្បីបញ្ចប់សង្គ្រាមទេ។
លោកហ្សេឡិនស្គីឆ្លើយតបវិញដោយដាក់ជាចម្ងល់ថាចុះបើទៅថ្ងៃមុខរុស្ស៊ីវាយប្រហារអ៊ុយក្រែនម្ដងទៀតតើក្រុមសម្ព័ន្ធមិត្តត្រូវធ្វើយ៉ាងដូចម្ដេច? ក្រោយកិច្ចជំនួបជាមួយថ្នាក់ដឹកនាំបារាំង អង់គ្លេស និងអាល្លឺម៉ង់ លោកហ្សេឡិនស្គីថ្លែងប្រាប់អ្នកសារព័ត៌មានថាអារម្មណ៍របស់ពួកអាមេរិកាំងជាគោលការណ៍គឺចង់ឱ្យមានការសម្របសម្រួលគ្នា។ បញ្ហាពាក់ព័ន្ធនឹងបូរណភាពទឹកដីមានចំណុចស្មុគស្មាញជាច្រើន ហើយយើងមិនទាន់រកឃើញចំណុចណាមួយដែលអាចសម្របសម្រួលគ្នាបាននៅឡើយទេ។
ការជួបគ្នានៅទីក្រុងឡុងលើកនេះធ្វើឡើងរយៈពេល២ថ្ងៃចំពេលដែលក្រុមសម្ព័ន្ធមិត្តអឺរ៉ុបព្យាយាមប្រមូលកម្លាំងគាំទ្រនៅខាងអ៊ុយក្រែន ខណៈដែលលោកហ្សេឡិនស្គីរងការរិះគន់ពីលោកដូណាល់ត្រាំ។ លោកត្រាំកាលពីថ្ងៃអាទិត្យថ្លែងថាលោកខកចិត្តចំពោះលោកហ្សេឡិនស្គី។ លោកថាលោកហ្សេឡិនស្គីមិនព្រមអានផែនការសន្តិភាពដែលត្រូវបានសម្រួលលើកចុងក្រោយ។
ក្រោយកិច្ចជំនួបនៅទីក្រុងឡុង លោកហ្សេឡិនស្គីថ្លែងថាថ្នាក់ដឹកនាំហ្វាំងឡង់ អ៊ីតាលី ប៉ូឡូញ ន័រវេ ហូឡង់ ដាណឺម៉ាក ស៊ុយអែត និងតួកគីសុទ្ធតែប្រកាសគាំទ្រអ៊ុយក្រែន។ លោកបានចាកចេញពីទីក្រុងឡុងសំដៅទៅទីក្រុងប្រ៊ុចសែលដើម្បីជួបថ្នាក់ដឹកនាំសហភាពអឺរ៉ុប និងអង្គការណាតូជាបន្តទៀត។ បន្ទាប់មក លោកបន្តធ្វើដំណើរទៅទីក្រុងរ៉ូមដើម្បីជួបនាយករដ្ឋមន្ត្រីអ៊ីតាលី។ ខាងលើនេះជាការផ្សាយរបស់អាល់ចាស៊ីរ៉ា (al Jazeera) និងប្រភពដទៃទៀត៕
ចែករំលែកព័តមាននេះ