រាជធានីភ្នំពេញ ៖ បន្ទាប់ពីសភាពការណ៍តាមបណ្តោយព្រំដែនកម្ពុជា-ថៃ មានភាពតានតឹង ដោយសារការឈ្លានពានពីសំណាក់យោធាថៃ នៅវេលាម៉ោង០៥:០៤នាទីព្រឹក ថ្ងៃទី០៨ ខែធ្នូ ឆ្នាំ២០២៥ មន្ទីរអប់រំ…
រាជធានីភ្នំពេញ ៖ បន្ទាប់ពីសភាពការណ៍តាមបណ្តោយព្រំដែនកម្ពុជា-ថៃ មានភាពតានតឹង ដោយសារការឈ្លានពានពីសំណាក់យោធាថៃ នៅវេលាម៉ោង០៥:០៤នាទីព្រឹក ថ្ងៃទី០៨ ខែធ្នូ ឆ្នាំ២០២៥ មន្ទីរអប់រំ យុវជន និងកីឡាខេត្តឧត្តរមានជ័យ សម្រេចអនុញ្ញាតឱ្យគ្រឹះស្ថានសិក្សាទាំងអស់ ក្នុងខេត្តដោយផ្អាកដំណើរការបង្រៀន និងរៀនជាបណ្តោះអាសន្ន រហូតដល់មានការជូនដំណឹងជាថ្មី ។
ជាមួយការចេញសេចក្តីប្រកាសនេះ មន្ទីរអប់រំ យុវជន និងកីឡាខេត្តឧត្តរមានជ័យ បានបញ្ជាក់ដែរថា ការផ្អាកដំណើរការបង្រៀន និងរៀនេះដែរ គឺ ដើម្បីធានាសុខសុវត្ថិភាពដល់លោកគ្រូ អ្នកគ្រូ បុគ្គលិកអប់រំ និងសិស្សានុសិស្សទាំងអស់ បញ្ច្រៀសបាននូវគ្រោះថ្នាក់ ដែលបណ្តាលមកពីការបាញ់ប្លោងកាំភ្លើងធំរបស់ភាគីថៃ មកក្នុងទឹកដី នៃព្រះរាជាណាចក្រកម្ពុជា ។
គួរបញ្ជាក់ថា បើតាមក្រសួងអប់រំ យុវជន និងកីឡា បានឱ្យដឹងដែរថា ក្នុងការវាយប្រហារឈ្លានពានរបស់ភាគីថៃ មកលើកម្ពុជា គិតចាប់ពីថ្ងៃទី៧ និងព្រឹកទី៨ ខែធ្នូ ឆ្នាំ២០២៥នេះ មានសាលារៀនជាប់ព្រំដែនកម្ពុជា-ថៃ ចំនួន៤ខេត្ត សរុបចំនួន ៣៧៧សាលា បានបិទទ្វារ។ ក្នុងនេះ ប៉ះពាល់ដល់គ្រូបង្រៀន ៣,១៩៧នាក់ និងសិស្សសរុប ៧៨,៥៨៥នាក់ ។
បើតាមក្រសួងការពារជាតិ បានឱ្យដឹងដែរថា ក្នុងការឈ្លានពានទឹកដីកម្ពុជាយ៉ាងគឃ្លើននេះដែរ កងទ័ពថៃ បាញ់ប្រហារចូលភូមិប្រជាពលរដ្ឋ នៅខេត្តឧត្តរមានជ័យ និងព្រះវិហារ បាននិងកំពុងបណ្តាលឱ្យពលរដ្ឋស្លូតត្រង់រងរបួសមួយចំនួន ឆេះផ្ទះប្រជាពលរដ្ឋអស់ជាច្រើនខ្នង និងធ្វើឱ្យប្រជាពលរដ្ឋក្មេងចាស់ ប្រុស ស្រី ត្រូវបង្ខំចិត្តជម្លៀសខ្លួនចេញទៅរកទីសុវត្ថិភាពបណ្តោះអាសន្នភា្លមៗ ៕
ចែករំលែកព័តមាននេះ