រាជធានីភ្នំពេញ ៖ អ្នកនាំពាក្យក្រសួងការពារជាតិកម្ពុជា បានឱ្យដឹងថា គិតមកដល់ត្រឹមវេលាម៉ោង៦ល្ងាច ថ្ងៃទី៨ ខែធ្នូ ឆ្នាំ២០២៥នេះ កងទ័ពឈ្លានពានថៃ នៅតែបើកការវាយប្រហារយ៉ាងឃោរឃៅ…
រាជធានីភ្នំពេញ ៖ អ្នកនាំពាក្យក្រសួងការពារជាតិកម្ពុជា បានឱ្យដឹងថា គិតមកដល់ត្រឹមវេលាម៉ោង៦ល្ងាច ថ្ងៃទី៨ ខែធ្នូ ឆ្នាំ២០២៥នេះ កងទ័ពឈ្លានពានថៃ នៅតែបើកការវាយប្រហារយ៉ាងឃោរឃៅ មកលើកងទ័ពកម្ពុជានោះ ពួកគេមិនទាន់ព្រមបញ្ឈប់អំពើឈ្លានពានរបស់ពួកគេមកលើទឹកដីកម្ពុជា នៅឡើយទេ ។
ថ្លែងក្នុងសន្និសីទសារព័ត៌មាន នាល្ងាចថ្ងៃទី៨ ខែធ្នូ ឆ្នាំ២០២៥ លោកជំទាវ ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិកម្ពុជាបានឱ្យដឹងថា ៖ «មកដល់ល្ងាចម៉ោង៦នេះ កងទ័ពថៃ មិនទាន់បញ្ឈប់ការបាញ់ប្រហារមកលើទឹកដីកម្ពុជា នៅឡើយទេ ពិសេសនៅតំបន់អានសេះ និងតំបន់ផ្សេងៗទៀត តាមខ្សែបន្ទាត់ព្រំដែនកម្ពុជា-ថៃ» ។
អ្នកនាំពាក្យ ក្រសួងការពារជាតិកម្ពុជា ក៏បានឱ្យដឹងពីយោធភូមិភាគទី៤ គឺកងទ័ពថៃ បានបាញ់ប្រហារយុទ្ធោបករណ៍ធុនធ្ងន់ គ្រប់ប្រភេទ រួមទាំងកាំភ្លើងដៃ កាំភ្លើងយន្ត កាំភ្លើងត្បាល់ រថក្រោះ យន្តហោះចម្បាំង ដ្រូនទម្លាក់គ្រាប់បែក និងបាញ់ផ្សែងពុលមកលើកងទ័ពកម្ពុជា ដែលឈរជើងនៅក្នុងភូមិសាស្ត្រនោះ។ បន្ទាប់មក នៅវេលាម៉ោង០១និង៣០នាទីរសៀល កងទ័ពថៃ បន្តពង្រីកសមរភូមិវាយប្រហារទៅតំបន់ផ្សេងទៀត នៅក្នុងយោធភូមិភាគទី៥ ក្នុងភូមិសាស្ត្រខេត្តបន្ទាយមានជ័យ ខេត្តបាត់ដំបង មកលើកងទ័ពកម្ពុជា ដែលកំពុងឈរការពារបូរណភាពទឹកដីរបស់ខ្លួន ក្នុងនោះ មានភូមិព្រៃចាន់ ភូមិជោគជ័យ អូរបីជាន់ អូរជ្រៅ គោករមៀត ថ្មពួក ខេត្តបន្ទាយមានជ័យ និងនៅស្រុកសំពៅលូន ខេត្តបាត់ដំបង ។
ដោយឡែក្នុងយោធភូមិភាគទី៥ កងទ័ពថៃ បានប្រើប្រាស់យុទ្ធោបករណ៍ធុនធ្ងន់ ជាច្រើប្រភេទ ដូចជាកាំភ្លើងដៃ កាំភ្លើងត្បាល់ កាំភ្លើងយន្ត និងរថក្រោះ ហើយគិតមកដល់ត្រឹមម៉ោង៦នេះ កងទ័ពឈ្លានពានថៃ មិនទាន់បញ្ឈប់បាញ់ប្រហារ ឈ្លានពានមកលើកម្ពុជា នៅឡើយដែរ ។
ទោះយ៉ាងណាក្តី អ្នកនាំពាក្យក្រសួងការពារជាតិ បានថ្លែងបញ្ជាក់ដែរថា បើទោះបីមានការបាញ់ប្រហារពីសំណាក់កងទ័ពថៃ ចាប់ពីថ្ងៃទី៧ និងបន្តមកដល់ថ្ងៃទី៨ ខែធ្នូ ឆ្នាំ២០២៥ ប៉ុន្តែកងកម្លាំងកម្ពុជា មិនទាន់មានការបាញ់ប្រហារតបតនៅឡើយទេ គឺប្រកាន់នូវស្មារតីអត់ធ្មត់ខ្ពស់បំផុត ។
លោកជំទាវ ឧត្តមសេនីយ៍ឯក ម៉ាលី សុជាតា បញ្ជាក់បន្ថែមថា សកម្មភាពឈ្លានពានរបស់កងទ័ពថៃនេះ ធ្វើឡើងក្រោយបង្កហេតុជាច្រើន រាប់មិនអស់ ជាច្រើនថ្ងៃមកហើយ ក្នុងចេតនាញុះញង់ ដើម្បីបង្កើតឱ្យមានការប៉ះទង្គិចគ្នា ឱ្យខានតែបានរបស់ពួកគេ ៕
ចែករំលែកព័តមាននេះ