ត្រឹម១១ខែដំបូងឆ្នាំនេះ! វៀតណាមស្វាគមន៍ភ្ញៀវអន្តរជាតិច្រើនបំផុតមិនធ្លាប់មានពីមុន
ទីក្រុងហាណូយ ៖ ប្រទេសវៀតណាមបានស្វាគមន៍ភ្ញៀវទេសចរអន្តរជាតិជិត ១៩,២ លាននាក់ នៅក្នុងរយៈពេល ១១ ខែដំបូង នៃឆ្នាំនេះ ដែលជាការកើនឡើង…
ទីក្រុងហាណូយ ៖ ប្រទេសវៀតណាមបានស្វាគមន៍ភ្ញៀវទេសចរអន្តរជាតិជិត ១៩,២ លាននាក់ នៅក្នុងរយៈពេល ១១ ខែដំបូង នៃឆ្នាំនេះ ដែលជាការកើនឡើង ២១% ធៀបនឹងរយៈពេលដូចគ្នា កាលពីមុន និងជាតួលេខខ្ពស់បំផុតមិនធ្លាប់មានពីមុនមកផងដែរ។
របាយកាណ៍ការិយាល័យស្ថិតិទូទៅវៀតណាមបង្ហាញថា នៅឆ្នាំ ២០១៩ ឆ្នាំមុនការចាប់ផ្តើមនៃជំងឺកូវីដ១៩ ប្រទេសវៀតណាមបានស្វាគមន៍ភ្ញៀវទេសចរអន្តរជាតិចំនួន ១៨ លាននាក់ ជាចំនួនខ្ពស់បំផុតមិនធ្លាប់មាននៅពេលនោះ។ ចំណែក កាលពីឆ្នាំ ២០២៤ ប្រទេសអាស៊ីអាគ្នេយ៍មួយនេះ ទទួលភ្ញៀវទេសចរអន្តរជាតិចំនួន ១៧,៦ លាននាក់។
ចិនដីគោកនៅតែជាទីផ្សារទេសចរណ៍កំពូលរបស់វៀតណាមរវាងខែមករា និងវិច្ឆិកា ឆ្នាំនេះ ដោយមានចំនួន ៤,៨ លាននាក់ បន្ទាប់មកគឺកូរ៉េខាងត្បូង ៣,៩ លាននាក់។ អ្នកជំនាញទេសចរណ៍វៀតណាមបានសន្មតថា ការកើនឡើងចំនួនភ្ញៀវអន្តរជាតិជាកំណត់ត្រាថ្មីនេះ ដោយសារតែគោលនយោបាយទិដ្ឋាការអំណោយផល យុទ្ធនាការផ្សព្វផ្សាយដែលបានពង្រីកបន្ថែម និងព្រឹត្តិការណ៍ទ្រង់ទ្រាយធំជាបន្តបន្ទាប់ ដែលបានប្រារព្ធឡើង ដើម្បីអបអរសាទរថ្ងៃឈប់សម្រាកបុណ្យជាតិសំខាន់ៗ។
នៅដើមខែសីហា រដ្ឋាភិបាលវៀតណាមបានលើកលែងតម្រូវការទិដ្ឋាការសម្រាប់ពលរដ្ឋមកប្រទេសចំនួន ១២ បន្ថែមទៀត រួមមាន បែលហ្ស៊ិក ប៊ុលហ្គារី ក្រូអាស៊ី សាធារណរដ្ឋឆែក ហុងគ្រី លុចសំបួ ហូឡង់ ប៉ូឡូញ រ៉ូម៉ានី ស្លូវ៉ាគី ស្លូវេនី និងស្វីស សម្រាប់ការស្នាក់នៅរហូតដល់ ៤៥ ថ្ងៃ ហើយនេះក៏បានពង្រីកបញ្ជីលើកលែងទិដ្ឋាការឯកតោភាគីរបស់វៀតណាមដល់ ២៤ ប្រទេស និងចំនួនសរុបរួមទាំងការលើកលែងទ្វេភាគីរហូតដល់ ៣៩ ប្រទេស។
រដ្ឋាភិបាលវៀតណាមថ្មីៗនេះ បានបន្ថែមច្រកទ្វារព្រំដែនអន្តរជាតិចំនួន ៤១ បន្ថែមទៀត ដែលជនបរទេសអាចប្រើប្រាស់ទិដ្ឋាការអេឡិចត្រូនិកសម្រាប់ការចូល និងចេញ ដែលនាំឱ្យចំនួនសរុបនៃច្រកទ្វារព្រំដែនអន្តរជាតិមានសិទ្ធិទទួលបានទិដ្ឋាការអេឡិចត្រូនិករហូតដល់ ៨៣ ចក្រ។
បើទោះភ្ញៀវទេសចរអន្តរជាតិមកកាន់វៀតណាមនៅឆ្នាំនេះ ឈានដល់តួលេខខ្ពស់បំផុតមិនធ្លាប់មានពីមុនក៏ដោយ ក៏ប្រទេសវៀតណាមបានកំណត់គោលដៅភ្ញៀវទេសចរអន្តរជាតិចំនួន ២៣ ទៅ ២៥ លាននាក់ នៅចុងឆ្នាំនេះ៕ ប្រភព ៖ VnExpress
ចែករំលែកព័តមាននេះ