សង្គ្រាមអ៊ុយក្រែន ៖ នាយប់ថ្ងៃទី៦មកទី៧ ធ្នូ រុស្ស៊ី បានធ្វើការវាយប្រហារដោយទ្រង់ទ្រាយធំ ដោយប្រើដ្រូននិងគ្រាប់មីស៊ីលដ៏ច្រើនប្រឆាំងអ៊ុយក្រែន ខណៈក្រុងគៀវ ត្រៀមខ្លួនបន្តការចរចាជាមួយអាមេរិក ក្នុងក្របខណ្ឌនៃការខិតខំប្រឹងប្រែងខាងការទូត…
សង្គ្រាមអ៊ុយក្រែន ៖ នាយប់ថ្ងៃទី៦មកទី៧ ធ្នូ រុស្ស៊ី បានធ្វើការវាយប្រហារដោយទ្រង់ទ្រាយធំ ដោយប្រើដ្រូននិងគ្រាប់មីស៊ីលដ៏ច្រើនប្រឆាំងអ៊ុយក្រែន ខណៈក្រុងគៀវ ត្រៀមខ្លួនបន្តការចរចាជាមួយអាមេរិក ក្នុងក្របខណ្ឌនៃការខិតខំប្រឹងប្រែងខាងការទូត សំដៅឲ្យសម្រេចបានកិច្ចព្រមព្រៀងសន្តិភាពមួយ ។
កងទ័ពអាកាសអ៊ុយក្រែនថ្លែងថា ក្រុងម៉ូស្គូបានបញ្ជូនដ្រូនដល់៦៥៣គ្រឿង និងបាញ់មីស៊ីល៥១គ្រាប់ ដែលនាំឲ្យមានការប្រកាសអាសន្នទូទាំងអ៊ុយក្រែន ។ កងទ័ពអ៊ុយក្រែនអាចបាញ់ទម្លាក់ដ្រូន៥៨៥គ្រឿង និងមីស៊ីល៣០គ្រាប់ ។ សរុបទីតាំង២៤ រងការវាយប្រហារ បណ្ដាលឲ្យមនុស្សយ៉ាងតិច៨នាក់រងរបួស ក្នុងនោះ ៣នាក់នៅក្រុងគៀវ ។ តំបន់ក្រុងឌីនីប្រូ ឈ័រនីហ៊ីវ ហ្សាប៉ូរីហ្ស៊ីយ៉ា អូឌីសា លវីវ វ៉ូលីន និងមីកូឡៃអ៊ីវ ក៏រងការវាយប្រហារដែរ ។
ប្រធានាធិបតីអ៊ុយក្រែន លោកវ៉ូឡូឌីមៀរហ្សេឡេនស្គីថ្លែងថា បណ្ដាទីតាំងថាមពលជាគោលដៅសំខាន់នៃការវាយប្រហារ តែអគារមួយនៃស្ថានីយរថភ្លើងសំខាន់ហ្វាស្ទីវរងការប៉ះពាល់ ដោយការវាយប្រហារ ដែលលោកចាត់ទុកថា មិនមែនទីតាំងយោធា និងគូសបញ្ជាក់ថា ក្រុងមូស្គូមិនអាចធ្វើមិនដឹងមិនឮឡើយ ។
ម្យ៉ាងវិញទៀត ក្រសួងការពារប្រទេសរុស្ស៊ីថ្លែងថា កងកម្លាំងការពារអាកាសរុស្ស៊ីបានបាញ់ទម្លាក់ដ្រូនអ៊ុយក្រែន១១៦គ្រឿងពីលើដែនដីរុស្ស៊ី កាលពីយប់ថ្ងៃទី៦ មកទី៧ធ្នូ ។ តាមទូរទស្សន៍ព័ត៌មានរុស្ស៊ីASTRAថា អ៊ុយក្រែនបានវាយប្រហាររោងចក្រចម្រាញ់ប្រេងកាតរុស្ស៊ីនៅតំបន់រីអាហ្សាន ។
អភិបាលតំបន់នោះ លោកប៉ាវែលម៉ុលកូ ថ្លែងថា អគារមនុស្សរស់នៅមួយ រងការខូចខាតដោយសារការវាយប្រហាររបស់ដ្រូនអ៊ុយក្រែន ហើយបំណែកបណ្ដាដ្រូនបានធ្លាក់លើទីតាំងឧស្សាហកម្មមួយតែលោកមិនបញ្ជាក់ថា នោះជារោងចក្រចម្រាញ់ប្រេងកាតឡើយ។
អ៊ុយក្រែនបានបង្កើនការវាយប្រហារដោយដ្រូន ប្រឆាំងរចនាសម្ព័ន្ធថាមពលរុស្ស៊ីដែលក្រុងគៀវយល់ថា នោះជាប្រភពចំណូលសំខាន់សម្រាប់ផ្គត់ផ្គង់ខាងហិរញ្ញវត្ថុក្នុងការធ្វើសង្គ្រាម ក្នុងគោលបំណងធ្វើការគាបសង្កត់លើវិមានក្រឹមឡាំង ឲ្យបញ្ចប់់ការប្រទូស្តរ៉ាយនិងងាកមករកការខិតខំប្រឹងប្រែងសន្តិភាព ។
ចំណែករុស្ស៊ីវិញក៏វាយប្រហារញឹកញាប់ លើបណ្ដាញថាមពលអ៊ុយក្រែន សំដៅឲ្យប្រទេសនេះគ្មានអ្វីសម្រាប់កម្ដៅ គ្មានភ្លើងគ្មានទឹក សម្រាប់បណ្ដាខែរងា ។ រលកនៃការវាយប្រហារនោះកើតមានទន្ទឹមពេលគ្នានឹងថ្ងៃទី៣នៃការចរចារវាងគណៈប្រតិភូអ៊ុយក្រែននិងអាមេរិកស្ដីពីការបញ្ចប់សង្គ្រាម ៕
ចែករំលែកព័តមាននេះ