រាជធានីភ្នំពេញ ៖ សន្តិសុខក្រសួងសាធារណការនិងដឹកជញ្ជូនម្នាក់បានស្លាប់បាត់បង់ជីវិតនៅពេលបញ្ជូនទៅកាន់មន្ទីរពេទ្យកាល់ម៉ែត បន្ទាប់ពីលាបប្រេងទ្វាររបងខ្លោងទ្វារចូលក្រសួងហើយទ្វារ១ផ្ទាំងធំ បានដួលរលំទាំងជំហរសង្កត់ពីលើ។
ហេតុការណ៍គ្រោះថ្នាក់នេះបានកើតឡើងកាលពីវេលាម៉ោង៨និង៤០នាទីព្រឹកថ្ងៃទី០៧ ខែធ្នូ ឆ្នាំ២០២៥ នៅចំណុចច្រកចេញចូលក្លោងទ្វារខាងមុខក្រសួងសាធារណៈការ និងដឹកជញ្ជូន ស្ថិតនៅ ផ្លូវលេខ៥៩៨ ភូមិខ១ សង្កាត់ច្រាំងចំរេះ២ ខណ្ឌឬស្សីកែវ រាជធានីភ្នំពេញហើយបានស្លាប់នៅវេលាម៉ោង៩និង២៤នាទីព្រឹក ។
ជនរងគ្រោះឈ្មោះ ប្រាក់ វិបុល ភេទប្រុស អាយុ៤១ឆ្នាំ មុខរបរសន្តិសុខក្រសួងសាធារណៈការ និងដឹកជញ្ជូន ទីលំនៅភូមិក្រវ៉ា ឃុំក្រវ៉ា ស្រុកបារាយណ៍ ខេត្តកំពង់ធំ និងស្នាក់នៅក្នុងក្រសួងសាធារណៈការ និងដឹកជញ្ជូន កន្លែងកើតហេតុខាងលើ។
តាមសមត្ថកិច្ចបានឲ្យដឹងថា សន្តិសុខរូបនោះត្រូវបានទ្វារ មួយផ្ទាំងទំហំ ៦.៥០ម៉ែត្រ គុណ ៣ម៉ែត្រ បានដួលរលំសង្កត់ពីលើបណ្ដាឲ្យរងរបួសធ្ងន់ហើយត្រូវបានសន្តិសុខដូចគ្នាបញ្ជូនទៅសង្គ្រោះនៅមន្ទីរពេទ្យកាល់ម៉ែត្រហើយបានស្លាប់នៅវេលាម៉ោង ៩និង២៤ នាទីព្រឹកថ្ងៃកើតហេតុ។
តាមព័ត៌មានឲ្យដឹងថា នៅវេលាព្រឹកថ្ងៃកើតហេតុគេឃើញសន្តិសុខរូបនោះបានលាបប្រេងកង់ទ្វាររបងតែម្នាក់ឯង មួយសន្ទុះស្រាប់តែឮសម្លេងគ្រាំងយ៉ាងខ្លាំងហើយមន្ត្រីរាជការនិងសន្តិសុខនៅក្បែរនោះក៏ឃើញទ្វាររលំសង្កត់ពីលើនិងនាំគ្នាជួយលើកទ្វារដើម្បីយកជនរងគ្រោះបញ្ជូនទៅសង្គ្រោះតែអកុសលនៅពេលទៅដល់មន្ទីរពេទ្យកាល់ម៉ែតគ្រូពេទ្យប្រាប់ថា ស្លាប់បាត់ទៅហើយ។
បន្ទាប់ពីកើតមានគ្រោះថ្នាក់នគរបាលមូលដ្ឋានចុះទៅកន្លែងកើតហេតុនិងទាក់ទងទៅនគរបាលជំនាញចុះត្រួតពិនិត្យឃើញទ្វារ១ផាំងបានដួលរលំដោយផ្នែកខាងលើផុត ចេញពីជើងរ៉ៃ ,ជើងទ្វារខាងក្រោមមានកង់៦ ហើយផុតជើងរ៉ៃ។
តាមការពិនិត្យកន្លែងកើតហេតុសាកសព លោក ឧកញ៉ាវេជ្ជបណ្ឌិត នង សុវណ្ណរ័ត្ន គ្រូពេទ្យកោសល្យវិច័យអមតុលាការរាជធានីភ្នំពេញបានសន្និដ្ឋានថា ជនរងគ្រោះ ស្លាប់ដោយប៉ះទង្គិចក្បាល និងខ្លួនប្រាណធ្ងន់ធ្ងរ ដោយសារផ្ទាំងទ្វារសង្កត់ពីលើ៕
ចែករំលែកព័តមាននេះ