ទីក្រុងប៉េកាំង៖ ប្រធានាធិបតីបារាំង លោកម៉ាក្រុងដែលកំពុងបំពេញទស្សនកិច្ចនៅប្រទេសចិន បានឆ្លៀតនិយាយអំពីបញ្ហាអ៊ុយក្រែន។ លោកថាការរួបរួមគ្នារវាងអឺរ៉ុប និងអាមេរិកជាកត្តាសំខាន់ក្នុងការបន្តឧបត្ថម្ភ-គាំទ្រប្រទេសនេះដើម្បីតស៊ូនៅក្នុងសង្គ្រាម។ លោកចង់បញ្ជាក់ត្រង់ចំណុចនេះបន្តិចថាគ្មានឡើយការមិនទុកចិត្តគ្នានៅក្នុងចំណោមភាគីទាំង២ (អាមេរិក និងអឺរ៉ុប)។ ដូច្នេះ លោកក៏ឆ្លៀតឱកាសនេះច្រានចោលព័ត៌មានដែលផ្សាយថាលោកបាននិយាយថាអាមេរិកអាចនឹងក្បត់អ៊ុយក្រែននៅថ្ងៃណាមួយជាមិនខាន។
លោកថ្លែងប្រាប់អ្នកសារព័ត៌មានថាការថែរក្សាបានឯកភាពគ្នារវាងអាមេរិក និងអឺរ៉ុបនៅក្នុងបញ្ហាអ៊ុយក្រែនជារឿងសំខាន់ជាចាំបាច់។ លោកសូមនិយាយម្ដងហើយម្ដងទៀតថាយើងចាំបាច់ត្រូវតែធ្វើការរួមគ្នា។ យើងស្វាគមន៍ និងគាំទ្រកិច្ចខិតខំប្រឹងប្រែងរបស់អាមេរិកក្នុងការស្វែងរកសន្តិភាពសម្រាប់អ៊ុយក្រែន។ អាមេរិកក៏ត្រូវការអឺរ៉ុបជាចាំបាច់ផងដែរនៅក្នុងកិច្ចខិតខំប្រឹងប្រែងនេះ។
គួរកត់សម្គាល់ថាមូលហេតុដែលលោកម៉ាក្រុងប្រញាប់ចេញមកបកស្រាយដូចខាងលើនេះបន្ទាប់ពីទស្សនាអាល្លឺម៉ង់ឈ្មោះស្ពីហ្គែល (Spiegel) ចុះផ្សាយសេចក្ដីដកស្រង់ខ្លឹមសារសំខាន់ៗនៃខ្សែអាត់សំឡេងដែលគេកត់ត្រាជាអក្សរ។ នោះជាឯកសារសម្ងាត់ដែលបង្ហាញថាលោកម៉ាក្រុង និងអធិការបតីអាល្លឺម៉ង់មិនទាន់ជឿទុកចិត្តថារដ្ឋាភិបាលអាមេរិក និងប្រេសិតអាមេរិកអាចចរចាគ្នាជាមួយរុស្ស៊ីរហូតដល់សម្រេចបានកិច្ចព្រមព្រៀងសន្តិភាពនោះទេ។
នៅពេលអ្នកសារព័ត៌មានសួរនាំអំពីចំណុចនេះ លោកម៉ាក្រុងឆ្លើយតបថាលោកសូមបដិសេធទាំងស្រុងនូវការចុះផ្សាយនោះ។ លោកថាយើងត្រូវការអាមេរិកដើម្បីស្វែងរកសន្តិភាព។ អាមេរិកក៏ត្រូវការយើងវិញដែរដើម្បីធ្វើឱ្យមានសន្តិភាពជាស្ថាពរ។ ហេតុនេះលោកយល់ថាគ្មានសេណារីយោណាមួយដែលអាចធានាថាអ៊ុយក្រែននឹងទទួលបានសន្តិភាពជាស្ថាពរនោះទេបើសិនគ្មានកិច្ចខិតខំប្រឹងប្រែងរួមគ្នារវាងអឺរ៉ុប អាមេរិក កាណាដា អូស្ត្រាលី និងជប៉ុន។ នេះបើយោងតាមប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ