រាជធានីភ្នំពេញ ៖ លោក ស សំណាង ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ កាលពីរសៀលថ្ងៃទី៤ ខែធ្នូ ឆ្នាំ២០២៥កន្លងទៅ បានប្រកាសសាលក្រមផ្តន្ទាទោសជនជាប់ចោទចំនួន៤នាក់…
រាជធានីភ្នំពេញ ៖ លោក ស សំណាង ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ កាលពីរសៀលថ្ងៃទី៤ ខែធ្នូ ឆ្នាំ២០២៥កន្លងទៅ បានប្រកាសសាលក្រមផ្តន្ទាទោសជនជាប់ចោទចំនួន៤នាក់ ពាក់ព័ន្ធនឹងគ្រឿងញៀនក្នុងនោះម្នាក់ជាប់គុកមួយជីវិត ២នាក់ជាគុកម្នាក់ៗ៣០ឆ្នាំ និងម្នាក់ទៀតជាប់គុក២ឆ្នាំកន្លះ ។
ជនជាប់ចោទទាំង៤នាក់នេះ សុទ្ធសឹងជាជនជាតិចិនមាន ៖
១-ឈ្មោះ GAO SHAN(កូវ សាន) ភេទប្រុស អាយុ៣៩ឆ្នាំ សាលក្រមផ្តន្ទាទោសដាក់ពន្ធនាគារអស់មួយជីវិត និងពិន័យជាប្រាក់ចំនួន ៥០០លានរៀល ។ ២-ឈ្មោះ WANG XIAO LONG(វ័ង ស៊ែវឡុង) ភេទប្រុស អាយុ៣៤ឆ្នាំ ។ ៣-ឈ្មោះ CHEN JIA PING (ជិន ជាផឹង ) ភេទប្រុស អាយុ៣២ឆ្នាំ ។ ទាំង២នាក់នេះ សាលក្រមផ្តន្ទាទោសដាក់ពន្ធនាគារម្នាក់ៗ៣០ឆ្នាំ និងពិន័យជាប្រាក់ក្នុងម្នាក់ៗចំនួន ៣០០លានរៀល ។
ជនជាប់ចោទទាំង៣នាក់ខាងលើ ត្រូវបានហាមឃាត់មិនឲ្យចូលមកប្រទេសកម្ពុជា នៅពេលអនុវត្តទោសចប់ជាស្ថាពរ ។ ៤-ឈ្មោះ TANG YU HAN ភេទស្រី អាយុ២៨ឆ្នាំ សាលក្រមផ្តន្ទាទោសដាក់ពន្ធនាគារ២ឆ្នាំ៦ខែ និងពិន័យជាប្រាក់ចំនួន ៦លានរៀល និងហាមឃាត់ចូលមកស្នាក់នៅក្នុងប្រទេសកម្ពុជាជាបណ្ដោះអាសន្ន ។
ជនជាតិចិនទាំង៤នាក់នេះ ជាប់ចោទពីបទជួញដូរ និងរក្សាទុកដោយខុសច្បាប់នូវសារធាតុញៀន កាន់កាប់គ្រឿងផ្ទុះ និងគ្រាប់រំសេវ និងសម្អាតប្រាក់ ប្រព្រឹត្តនៅរាជធានីភ្នំពេញ កាលពីអំឡុងឆ្នាំ២០១៩ ដល់អំឡុងខែតុលា ឆ្នាំ២០២៤បទល្មើសដែលមានបញ្ញត្តិឱ្យផ្តន្ទាទោសតាមមាត្រា៤០ និងមាត្រា៤៨ នៃច្បាប់ស្តីពីការត្រួតពិនិត្យគ្រឿងញៀន តាមមាត្រា៤៩០ នៃក្រមព្រហ្មទណ្ឌ និងមាត្រា៣៨ នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម ។
សូមរំឭកថា កាលពីថ្ងៃទី១៥ ខែតុលា ឆ្នាំ២០២៤ កម្លាំងការិយាល័យប្រឆាំងគ្រឿងញៀន នៃកងរាជអាវុធហត្ថរាជធានីភ្នំពេញ បានបង្ក្រាបករណីគ្រឿងញៀន ៖
-គោលដៅទី១ ចំណុចចំណតរថយន្តផ្សារទំនើប បី Mall ភូមិ១៤ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
-គោលដៅទី២ នៅបន្ទប់លេខ ០៩.១០ អគារហ័រយូ ភូមិ១៤ សង្កាត់ទន្លេបាសាក់ ខណ្ឌ
ចំការមន រាជធានីភ្នំពេញ ។
-គោលដៅទី៣ ថ្ងៃទី១៦ ខែតុលា ឆ្នាំ២០២៤
នៅចំណុចភោជនីយដ្ឋានឆុងឈីងម៉ាថូស៊ុបចិន តាមផ្លូវជាតិលេខ១ សង្កាត់និរោធ ខណ្ឌច្បារអំពៅ រាជធានីភ្នំពេញ ។
-គោលដៅទី៤ នៅបន្ទប់លេខ ១០.៣១ អគារហ័រយូ ភូមិ១៤ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
នៅក្នុងការបង្ក្រាបនេះ សមត្ថកិច្ចបានឃាត់ខ្លួនជនសង្ស័យចំនួន ៤នាក់ និងដកហូតវត្ថុតាង នូវសារធាតុដែលមានតម្រុយជាគ្រឿងញៀនចំនួន៧៩៩កញ្ចប់ ទម្ងន់៩៣ ៨៣៤,២១ក្រាម
ថ្នាំគ្រាប់ចំនួន ៦ ២២៨គ្រាប់ ទម្ងន់ ៧១៥,៤ក្រាម កញ្ហាក្រៀមចំនួន២ដុំធំ ទម្ងន់ ២ ០៩៧,៣០ក្រាម បារីកញ្ឆា ចំនួន ៣២៤ដើម ទម្ងន់ ៣១៩,៥០ក្រាម គ្រាប់កាំភ្លើងចំនួន ១៦គ្រាប់ និងសម្បកគ្រាប់ចំនួន៤ ព្រមទាំងភ័ស្តុតាងមួយចំនួនទៀតដែលសង្ស័យជាប់ពាក់ព័ន្ធនឹងការសម្អាតប្រាក់ ៕
ចែករំលែកព័តមាននេះ