សង្គ្រាមអ៊ុយក្រែន ៖ ប្រធានាធិបតីបារាំង លោកអេមម៉ានុយអែលម៉ាក្រុងអធិការបតីអាល្លឺម៉ង់លោកហ្វ្រីអ៊ីឌ្រិកមេស និងមេដឹកនាំអឺរ៉ុបដទៃៗទៀត បានសម្ដែងការមិនទុកចិត្តរបស់ពួកគេ លើការខិតខំប្រឹងប្រែងរបស់អាមេរិក ដើម្បីចរចាបញ្ចប់សង្គ្រាមនៅអ៊ុយក្រែនជាមួយរុស្ស៊ី ។ នេះបើតាមការលើកឡើងរបស់កាសែតអាល្លឺម៉ង់DER…
សង្គ្រាមអ៊ុយក្រែន ៖ ប្រធានាធិបតីបារាំង លោកអេមម៉ានុយអែលម៉ាក្រុងអធិការបតីអាល្លឺម៉ង់លោកហ្វ្រីអ៊ីឌ្រិកមេស និងមេដឹកនាំអឺរ៉ុបដទៃៗទៀត បានសម្ដែងការមិនទុកចិត្តរបស់ពួកគេ លើការខិតខំប្រឹងប្រែងរបស់អាមេរិក ដើម្បីចរចាបញ្ចប់សង្គ្រាមនៅអ៊ុយក្រែនជាមួយរុស្ស៊ី ។ នេះបើតាមការលើកឡើងរបស់កាសែតអាល្លឺម៉ង់DER SPIEGEL ក្រោយដកស្រង់ការទាក់ទងគ្នាតាមទូរស័ព្ទរបស់មេដឹកនាំទាំងនោះ ។
ក្នុងកិច្ចសន្ទនាគ្នាតាមទូរស័ព្ទមួយកាលពិថ្ងៃទី១ ធ្នូ ជាមួយបណ្ដាសមភាគីអឺរ៉ុប និងលោកលោកវ៉ូឡូឌីមៀរហ្សេឡេនស្គី ប្រធានាធិបតីបារាំងលើកឡើងថា រដ្ឋការលោកដូណាល់ត្រាំមានល្បិចកលដើម្បីប៉ុនប៉ងចរចាពីការបញ្ចប់សង្គ្រាមនៅអ៊ុយក្រែន តែរដ្ឋការនោះសង្ស័យថាចង់សម្រួលដល់បណ្ដាការទាមទាររបស់លោកវ្ល៉ាឌីមៀរពូទីន ។
លោកថា មានគ្រោះថ្នាក់ដែលអាមេរិកក្បត់អ៊ុយក្រែនលើបញ្ហាដែនដី ដោយគ្មានការធានាច្បាស់លាស់់ខាងផ្នែកសន្តិសុខ ។ យើងមានការជ្រើសរើសរបស់យើងចំពោះការផ្លាស់ប្ដូរនេះ ។ ប្រធានាធិបតីបារាំងឲ្យដឹងជាសាធារណៈពីជំហររបស់លោកលើការចរចាដែលកំពុងប្រព្រឹត្តទៅរវាងរុស្ស៊ី និងសហរដ្ឋអាមេរិកដែលលោកថា មិនខុសអីពីរឿងឯកជនឡើយ ។ លោកបន្តថា ជំហរបារាំងគឺគ្មានអ្វីត្រូវសម្រេចទាក់ទិននឹងអ៊ុយក្រែនឡើយ ហើយអឺរ៉ុបត្រូវតែជាភាគីចូលរួមពេញលេញក្នុងការចរចា ។ ក្នុងន័យនេះទិដ្ឋភាពមួយចំនួននៃសំណើអាមេរិក ចាំបាច់ត្រូវធ្វើការបំភ្លឺថែមទៀត។
តាមកាសែតDER SPIEGELដែលមិនបញ្ជាក់ប្រភពថា អធិការបតីអាល្លឹម៉ង់បាននិយាយទៅកាន់ប្រធានាធិបតីអ៊ុយក្រែនថា ឲ្យមានការប្រុងប្រយ័ត្នខ្ពស់បំផុតនាបណ្ដាថ្ងៃខាងមុខ។ អាមេរិកអាចដើរខ្សែលើអ្នកនិងលើយើង។ ទោះបីយ៉ាងណាអធិការបតីអាល្លឺម៉ង់បដិសេធ មិនធ្វើអត្ថាធិប្បាយដោយគូសបញ្ជាក់ថាមិនទម្លាយខ្លឹមសារ នៃការនិយាយគ្នាតាមទូរស័ព្ទនោះឡើយព្រោះជារឿងសម្ងាត់ ។
គណៈប្រតិភូអាមេរិកនិងអ៊ុយក្រែនបានជួបពិភាក្សាគ្នាថ្មីទៀតកាលពីថ្ងៃទី៤ធ្នូ នៅជាយក្រុងមៃអាមីរដ្ឋផ្លរីដា ខណៈក្រុងវ៉ាស៊ីនតោនស្វែងរកឲ្យមានការអនុម័ត ផែនការដើម្បីបញ្ចប់សង្គ្រាមនៅអ៊ុយក្រែន។ ពេលវិលត្រឡប់ពីក្រុងមូស្គូជួបជាមួយលោកពូទីន វិញ បេសកជនពិសេសលោកត្រាំគឺលោកSTEVE WITKOFF និងកូនប្រសារលោកត្រាំគឹលោកJARED KUSHNER ត្រូវពិភាក្សាជាមួយអ្នកចរចាសំខាន់អ៊ុយក្រែនលោករូស្ទេមអ៊ូមីរ៉ូវ ។
គណៈប្រតិភូអាមេរិកនិងគណៈប្រតិភូអ៊ុយក្រែនធ្លាប់ជួបគ្នារួចមកហើយកាលពីថ្ងៃទី៣០វិច្ឆិកានៅជិតក្រុងមៃអាមី ដោយមានវត្តមានរបស់រដ្ឋមន្ត្រីការបរទេសអាមេរិកលោកម៉ាកូរូប៊ីយ៉ូ។ ប៉ុន្តែការស្វែងរកការសម្របសម្រួលមួយពិតជាលំបាកខ្លាំង ហើយនៅខ្សែរណសិរ្សវិញកងទ័ពរុស្ស៊ីកំពុងបន្តវាយរុលទៅមុខយឺតៗ ក៏ទោះបីជារងការបាត់បង់ធ្ងន់ធ្ងរក្ដី ៕
ចែករំលែកព័តមាននេះ