រាជធានីភ្នំពេញ ៖ ថៅកែរោងចក្រកាត់ដេរសម្លៀកបំពាក់ម្នាក់ បានជំពាក់ប្រាក់ថ្លៃកាតុង ថៅកែជនជាតិចិនម្នាក់ទៀត ជាង៣ម៉ឺនដុល្លារអាមេរិក ដោយរយៈពេលជាង១ឆ្នាំ មកហើយ អត់ទាន់សងនៅឡើយ បន្ទាប់មកមានបុរសជនជាតិចិនម្នាក់ទៀត…
រាជធានីភ្នំពេញ ៖ ថៅកែរោងចក្រកាត់ដេរសម្លៀកបំពាក់ម្នាក់ បានជំពាក់ប្រាក់ថ្លៃកាតុង ថៅកែជនជាតិចិនម្នាក់ទៀត ជាង៣ម៉ឺនដុល្លារអាមេរិក ដោយរយៈពេលជាង១ឆ្នាំ មកហើយ អត់ទាន់សងនៅឡើយ បន្ទាប់មកមានបុរសជនជាតិចិនម្នាក់ទៀត ជាប្រធានផ្នែកទីផ្សាររោងចក្រផលិតកាតុង បានបើករថយន្ត១គ្រឿង ទៅទារប្រាក់ដល់រោងចក្រ។ ពេលនោះ ក៏មានទំនាស់ជាមួយថៅកែរោងចក្រ ដែលជាកូនបំណុលនោះ ហើយក៏ត្រូវថៅកែរូបនោះ និងកូនប្រុសម្នាក់ចាប់វាយ (កូនប្រុសអ្នកចាប់ ឪពុកអ្នកវាយ) ខណៈនោះដោយសារតែមានការភិតភ័យ ប្រធានផ្នែកទីផ្សារ ដែលជាអ្នកទៅទារប្រាក់ បានឡើងបើករថយន្តរត់។ ពេលនោះ ក៏ជ្រុលទៅបុកថៅកែរោងចក្រខាងលើ របួសធ្ងន់ និងស្លាប់ ក្រោយបញ្ជូនទៅសង្គ្រោះដល់មន្ទីរពេទ្យ បន្ទាប់មក បុរសនោះ ក៏ត្រូវបាននគរបាលឃាត់ខ្លួនភ្លាមៗផងដែរ នេះបើតាមការអះអាងប្រាប់ឲ្យដឹងពីសំណាក់នគរបាល នៃអធិការដ្ឋានខណ្ឌដង្កោ ។
អំពើហិ.ង្សាខាងលើនោះបានកើតឡើង កាលពីវេលាម៉ោង២រសៀលថ្ងៃទី៣ ខែធ្នូ ឆ្នាំ២០២៥ នៅក្នុងរោងចក្រកាត់ដេរសម្លៀកបំពាក់យីហោ «អូឡៃហ្វា ខេមបូឌា ហ្គាម៉ិន ខូអិល ធីឌី» ដែលមានទីតាំងស្ថិតនៅតាមផ្លូវ៣០ម៉ែត្រ ក្នុងភូមិព្រៃធំ សង្កាត់ព្រៃស ខណ្ឌដង្កោ រាជធានីភ្នំពេញ ។
នៅពុំទាន់មានការអះអាងប្រាប់ឲ្យដឹងអំពីអត្តសញ្ញាថៅកែ រោងចក្រខាងលើ និងជាកូនបំណុល ដែលបានរងគ្រោះដល់ស្លាប់បាត់បង់ជីវិតនោះនៅឡើយទេ ។ ចំណែកបុរស ដែលទៅទារប្រាក់បំណុល និងបើករថយន្តបុកបណ្ដាលឲ្យថៅកែរោងចក្រខាងលើស្លាប់នោះ ក៏មិនទាន់ត្រូវបានស្គាល់អត់សញ្ញាណនោះដែរ ។ដឹងត្រឹមថាបុរសនេះជាប្រធានផ្នែកទីផ្សារ នៅរោងចក្រផលិតកាតុង ស្ថិតនៅក្នុងសង្កាត់ចោមចៅ ខណ្ឌពោធិ៍សែនជ័យ ។
នគរបាលខណ្ឌដង្កោ បានប្រាប់ឲ្យដឹងបន្តទៀតថា នៅមុនដំបូង កម្លាំងនគរបាលបានទទួលដំណឹងមកថា មានករណីជនជាតិចិនម្នាក់ បើករថយន្តបំបុកជនជាតិចិនដូចគ្នាម្នាក់ទៀត ដែលជាថៅកែរោងចក្រ ផ្ទប់ជញ្ជាំងរោងចក្រ បណ្ដាលឲ្យរងរបួសធ្ងន់ ត្រូវបានកូនប្រុស បញ្ជូនទៅសង្គ្រោះបន្ទាន់ នៅមន្ទីរពេទ្យ ប៉ុន្តែជាអកុសល ក្រោយមកថៅកែរូបនោះ ក៏បានស្លាប់បាត់បង់ជីវិត ។ បន្ទាប់ពីទទួលបានដំណឹងនេះភ្លាម លោកវរសេនីយ៍ឯកជឹម ស៊ីថា អធិការនគរបាលខណ្ឌដង្កោ បានដឹកនាំកម្លាំងនគរបាល ក្រោមឱវាទ ចុះទៅធ្វើការស្រាវជ្រាវ ដល់ទីតាំងកើតហេតុ ទើបដឹងថា ជារឿងជនរងគ្រោះ និងកូនប្រុស វាយអ្នកទៅទារបំណុល ហើយអ្នកទារបំណុលភ័យ ក៏បើករថយន្ត រត់ជ្រុលទៅបុក បង្កឲ្យមានគ្រោះថ្នាក់កើតឡើង ។
នគរបាល បានប្រាប់ឲ្យដឹងបន្ថែមទៀតថា នៅមុនពេលកើតហេតុ បុរសជនជាតិចិន ដែលមានតួនាទីជាប្រធានផ្នែកទីផ្សាររោងចក្រផលិតក្រដាស់កាតុង បានបើកបររថយន្ត១គ្រឿង ម៉ាកតូយ៉ូតារ៉ាស់ ទៅទារប្រាក់ពីថៅកែរោងចក្រ(អ្នកស្លាប់)ខាងលើ ដល់ក្នុងរោងចក្រកាត់ដេរសម្លៀកបំពាក់យីហោ «អូឡៃហ្វា ខេមបូឌា ហ្គាម៉ិន ខូអិល ធីឌី»នោះ ។ ចំណែកប្រាក់ ដែលជំពាក់នោះមានចំនួន ៣៤,០០០ដុល្លារ ថ្លៃទិញក្រដាស់កាតុង ហើយរយៈពេលជាង១ឆ្នាំមកហើយ មិនទាន់បានទូទាត់នៅឡើយ លុះពេលទៅដល់ថៅកែរោងចក្របានប្រាប់ថា សងខ្លះ ប៉ុន្តែម្ចាស់បំណុលអត់ព្រមយក ។ ខណៈនោះ ក៏មានការទាស់ពាក្យសម្ដីគ្នា ហើយក៏ត្រូវថៅកែរូបនោះ និងកូនប្រុសម្នាក់ ចាប់វាយ (កូនប្រុសអ្នកចាប់ ឪពុកអ្នកវាយ) ពេលនោះ ដោយសារតែម្នាក់ឯងមានការភិតភ័យ បុរសដែលទៅទារបំណុលនោះបាននិយាយថា ខ្លួនឈប់យកប្រាក់នោះហើយ ។
នគរបាលខាងលើ បានបញ្ជាក់ប្រាប់ទៀតថា ពេលនោះ ថៅកែរោងចក្រ ដែលជាកូនបំណុល បាននិយាយថា អត់ទេ អញវាយឯងឲ្យងាប់តែម្ដង ស្របពេលមានស្ត្រីផ្នែកគណនេយ្យម្នាក់ បើកទ្វារបន្ទប់ចូលទៅ បុរសអ្នកទារប្រាក់ បានស្ទុះរត់ចេញក្រៅចុះទៅក្រោម ហើយក៏មានខ្មែរម្នាក់ វាយបន្ថែមទៀត។ បន្ទាប់មក បុរសនោះក៏បានរត់ចូលទៅក្នុងរថយន្ត ដើម្បីបើកចេញ ហើយត្រូវសន្តិសុខបិទទ្វារអត់ឲ្យចេញ តែបុរសនោះនៅតែព្យាយាមបើកទៅមុខ ក៏ជ្រុលទៅបុកថៅកែរោងចក្ររូបនោះ បង្កឲ្យមានគ្រោះថ្នាក់ដល់ស្លាប់បែបនេះតែម្ដង ។
នគរបាលរូបនោះ បានអះអាងប្រាប់ផងដែរថា ក្រោយពេលកើតហេតុ លោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ បានដឹកនាំបញ្ជាកម្លាំង ឲ្យចុះទៅកាន់កន្លែងកើតហេតុភ្លាមៗ ហើយពិនិត្យឃើញរថយន្តរបស់បុរស ដែលជាអ្នកទារប្រាក់ និងជាអ្នកបើករថយន្តបុកមនុស្សស្លាប់នោះ មានស្នាមខូចខាតដោយការវាយផងដែរ បន្ទាប់មកទៀត កម្លាំងក៏បានឃាត់ខ្លួនបុរសនោះ រួចនាំខ្លួនទៅកាន់អធិការដ្ឋាននគរបាលខណ្ឌដង្កោ រង់ចាំការសាកសួរ និងកសាងសំណុំរឿងបញ្ជូនទៅកាន់សាលាដំបូងចាត់ការតាមច្បាប់ ៕
ចែករំលែកព័តមាននេះ