ខេត្តមណ្ឌលគិរី ៖ ដើម្បីបន្សាបឥទ្ធិពលអវិជ្ជមានពីក្រុមបង្កើតព័ត៌មានក្លែងក្លាយ និងអ្នកធ្វើមាតិកាក្លែងបន្លំសភាពការណ៍នានាក្នុងមូលដ្ឋាន អាជ្ញាធរខេត្ត នាព្រឹកថ្ងៃទី៣ ខែធ្នូ ឆ្នាំ២០២៥ បានរៀបចំយុទ្ឋនាការ«ប្រឆាំងព័ត៌មានក្លែងក្លាយ និយាយថាទេចំពោះព័ត៌មានក្លែងក្លាយ»…
ខេត្តមណ្ឌលគិរី ៖ ដើម្បីបន្សាបឥទ្ធិពលអវិជ្ជមានពីក្រុមបង្កើតព័ត៌មានក្លែងក្លាយ និងអ្នកធ្វើមាតិកាក្លែងបន្លំសភាពការណ៍នានាក្នុងមូលដ្ឋាន អាជ្ញាធរខេត្ត នាព្រឹកថ្ងៃទី៣ ខែធ្នូ ឆ្នាំ២០២៥ បានរៀបចំយុទ្ឋនាការ«ប្រឆាំងព័ត៌មានក្លែងក្លាយ និយាយថាទេចំពោះព័ត៌មានក្លែងក្លាយ» ដោយមានការផ្សព្វផ្សាយពាក្យស្លោក និងដង្ហែក្បួនមហាជនតាមទីសាធារណៈ ។
ពិធីនេះបានប្រារព្ធធ្វើនៅក្រុងសែនមនោរម្យ ដោយមានការចូលរួមពីថ្នាក់ដឹកនាំខេត្ត កងកម្លាំងទាំង៣ប្រភេទ មន្ត្រីរាជការមន្ទីរអង្គភាពជុំវិញខេត្ត ស្ថាប័នវិស័យឯកជន ប្រជាពលរដ្ឋនិងសិស្សានុសិស្សប្រមាណ២០០នាក់ ។
លោក ហ៊ាញ ប៊ុណ្ណា អភិបាលរងខេត្ត មានប្រសាសន៍ថា ក្នុងបរិបទនៃការរីកចម្រើនឥតឈប់ឈរនៃបច្ចេកវិទ្យា ការទទួលនិងផ្សព្វផ្សាយព័ត៌មានបែបទំនើប ប្រព័ន្ធឌីជីថល បណ្តាញទំនាក់ទំនងសង្គម បានកើនឡើងជាលំដាប់ ហើយគ្រោះថ្នាក់នៃព័ត៌មានក្លែងក្លាយរឹតតែមានលក្ខណៈស្រួចស្រាល់ឡើង ។
បរិការណ៍នេះ ទាមទារឱ្យពលរដ្ឋដែលជាអ្នកប្រើប្រាស់ ឬ អ្នកផលិតព័ត៌មាន ឬ ចែកចាយព័ត៌មាន យល់ដឹងឲ្យបានច្បាស់អំពីផលវិបាកនៃព័ត៌មានក្លែងក្លាយ ហើយចេះបង្កើនការប្រុងប្រយ័ត្នក្នុងការប្រើប្រាស់បណ្តាញសង្គមប្រកបដោយការទទួលខុសត្រូវ ពិសេសមុននឹងចែកចាយព័ត៌មានណាមួយ ត្រូវផ្ទៀងផ្ទាត់ព័ត៌មានទាំងនោះជាមុនសិន ។
លោកអភិបាលរងខេត្តបន្តថា ពលរដ្ឋឌីជីថល ត្រូវស្វែងយល់បន្ថែមពីរបៀបក្នុងការកំណត់អត្តសញ្ញាណព័ត៌មានក្លែងក្លាយ វិធានការទប់ស្កាត់ ការរីកសាយភាយ និងការបន្សាបព័ត៌មានក្លែងក្លាយ ។ ត្រូវចូលរួមបំផុសការបង្កើតទម្លាប់ប្រើប្រាស់បណ្តាញសង្គមដោយការទទួលខុសត្រូវ ដោយផ្សព្វផ្សាយតគ្នាអំពីវិធានការសុវត្ថិភាពឌីជីថល ភាពចាំបាច់ និងរបៀបក្នុងការបង្ការហានិភ័យ និងសកម្មភាពនានាចាំបាច់ ក្នុងការធានាសុវត្ថិភាពព័ត៌មានក្នុងសង្គមរស់នៅ ។
លោក ហ៊ាញ ប៊ុណ្ណា បានសង្កត់ធ្ងន់ថា ពលរដ្ឋក្នុងសហគមន៍ អ្នកសារព័ត៌មាន អ្នកមានឥទ្ធិពល និងបង្កើតមាតិកាលើបណ្តាញសង្គម យុវជន មន្ត្រីរាជការ អាជីវករ និងពិសេសអ្នកប្រើប្រាស់បណ្តាញសង្គម ត្រូវចូលរួមក្នុងយុទ្ធនាការប្រឆាំងព័ត៌មានក្លែងក្លាយ ដោយប្រកាន់ខ្ជាប់ទម្លាប់ល្អគឺ ការបង្កើត ចែកចាយ និងផ្សព្វផ្សាយព័ត៌មានពិត មានប្រភពច្បាស់លាស់ និងដោយក្រមសីលធម៌ វិជ្ជាជីវៈត្រឹមត្រូវ ។
លោក សុន សារឿន ប្រធានមន្ទីរព័ត៌មានខេត្ត បានឲ្យដឹងថា ក្រុមការងាររបស់មន្ទីរបានសស្រាក់សស្រាំធ្វើការងារកាន់តែសកម្មទៅលើការគាំទ្រដល់គណៈបញ្ជាការឯកភាព និងរដ្ឋបាលខេត្ត លើការងារគ្រប់គ្រងសាធារណមតិ គ្រប់គ្រងព័ត៌មាន និងសាធារណមតិមហាជន ដោយតាមដានព័ត៌មាន ធ្វើការឆ្លើយតប បកស្រាយ ផ្សព្វផ្សាយនូវព័ត៌មានពិត ត្រឹមត្រូវជូនប្រជាពលរដ្ឋឱ្យយល់ដឹងពីគោលនយោបាយរបស់រាជរដ្ឋាភិបាល រួមទាំងដំណើរការអភិវឌ្ឍន៍របស់ប្រទេសជាតិ ។ ជាពិសេស បានទប់ស្កាត់ និងប្រឆាំងព័ត៌មានក្លែងក្លាយ ទាន់ពេលវេលាជាច្រើនករណីនាពេលកន្លងមក ៕
ចែករំលែកព័តមាននេះ