សង្គ្រាមអ៊ុយក្រែន ៖ កិច្ចប្រជុំរបស់បេសកជនពិសេស លោកណាល់ត្រាំ លោកSTEVE WITKOFF និងប្រធានាធិបតីរុស្ស៊ីលោកវ្ល៉ាឌីមៀរពូទីន កាលពីថ្ងៃទី២ធ្នូ នៅក្រុងម៉ូស្គូ ប្រព្រឹត្តទៅអស់ពេលដល់៥ម៉ោង…
សង្គ្រាមអ៊ុយក្រែន ៖ កិច្ចប្រជុំរបស់បេសកជនពិសេស លោកណាល់ត្រាំ លោកSTEVE WITKOFF និងប្រធានាធិបតីរុស្ស៊ីលោកវ្ល៉ាឌីមៀរពូទីន កាលពីថ្ងៃទី២ធ្នូ នៅក្រុងម៉ូស្គូ ប្រព្រឹត្តទៅអស់ពេលដល់៥ម៉ោង ។ កិច្ចប្រជុំនោះ ធ្វើឡើងនៅវិមានក្រឹមឡាំង ត្រូវបានលោកគីរីលឌីមីទ្រីយេវ បេសកជនប្រធានានាធិបតីរុស្ស៊ីទទួលបន្ទុកបញ្ហាសេដ្ឋកិច្ចអន្តរជាតិចាត់ទុកថា ស្ថាបនា ។
ចំណែកលោកអ៊ីយ៉ូរីអ៊ូឆាកូវទីប្រឹក្សាការទូតរបស់វិមានក្រឹមឡាំងវិញគូសបញ្ជាក់ថា ការពិភាក្សាគ្នាពិតជាមានប្រយោជន៍និងស្ថាបនា តែនៅសល់បញ្ហាច្រើនទៀតដែលត្រូវធ្វើ។ លោកអះអាងប្រាប់បណ្ដាអ្នកកាសែតថា ពុំមានការសម្របសម្រួលគ្នាណាមួយត្រូវបានរកឃើញស្ដីពីដែនដីដែលរុស្ស៊ីកាន់កាប់នៅអ៊ុយក្រែនឡើយ ។
កម្មវត្ថុនៃកិច្ចប្រជុំនោះ គឹផែនការសន្តិភាពរបស់លោកត្រាំ ដើម្បីបញ្ចប់ជម្លោះនៅអ៊ុយក្រែន។ នៅខាងក្រៅវេទិកាសេដ្ឋកិច្ចមួយ លោកពូទីនថ្លែងទៅកាន់បណ្ដាអ្នកកាសែតថា យើងមិនមានបំណងធ្វើសង្គ្រាមនៅអឹរ៉ុបទេ ប៉ុន្តែប្រសិនបើពួកអឺរ៉ុបចង់និងចាប់ផ្ដើមនោះយើងត្រៀមធ្វើសង្គ្រាមជាមួយពួកអ្នកចាប់ពីពេលនេះទៅ ។ លោកពូទីនចោទប្រកាន់ពួកអឺរ៉ុបថា ចង់រារាំងការខិតខំប្រឹងប្រែងរបស់អាមេរិកសំដៅបញ្ចប់សង្គ្រាមនៅអ៊ុយក្រែន ។ លោកថាពួកអឹរ៉ុបគ្មានកម្មវិធីសន្តិភាពឡើយពួកគេនៅខាងសង្គ្រាម។
នៅលើរណសិរ្សប្រយុទ្ធវិញ ក្រុងម៉ូស្គូងអះអាង កាលពីយប់ថ្ងៃទី១ ធ្នូ ពីការវាយដណ្ដើមយកបានទីក្រុងសំខាន់ថ្មីមួយទៀត នៅភាគខាងកើតអ៊ុយក្រែនគឹទីក្រុងប៉ូក្រូវស្ក៍ជាទីតាំងផ្ដល់ភស្ដុភារពិសេស សម្រាប់កងទ័ពអ៊ុយក្រែនព្រមទាំងទីក្រុង VOVTCHANSK ភាគឦសានប្រទេស។ ការប្រកាសនោះ ធ្វើឡើងពេលបេសកជនពិសេសអាមេរិក លោកSTEVE WITKOFF មកកាន់ក្រុងម៉ូស្គូ ថ្ងៃទី២ ធ្នូ ជូបជាមួយលោកពូទីនពិភាក្សាពីសំណើសន្តិភាពរបស់លោកដូណាល់ត្រាំ សំដៅបញ្ចប់ជម្លោះនៅអ៊ុយក្រែន ។ ក្រសួងការពារប្រទេសរុស្ស៊ី បានចេញផ្សាយវីដេអូមួយ ដែលបង្ហាញកងទ័ពរុស្ស៊ីកំពុងលើកទង់ជាតិនៅទីលានភាគកណ្ដាលក្រុងប៉ូក្រូស្ក៍។
ទីក្រុងនោះជាទីតាំងយុទ្ធសាស្ត្រសំខាន់ ស្ថិតនៅកន្លែងប្រសប់គ្នានៃផ្លួវថ្នល់ និងផ្លូវដែកជាច្រើន ដែលជាទីតាំងផ្គត់ផ្គង់កងទ័ពអ៊ុយក្រែននៅភាគខាងកើតប្រទេស។ ការដណ្ដើមយកបានទីក្រុងនោះនឹងកាន់តែអំណោយផលដល់កងទ័ពរុស្ស៊ី ក្នុងការវាយរុលទៅមុខឆ្ពោះទៅភាគខាងលិច និងវាយទៅភាគខាងជើងដែលមានទីក្រុងធំៗដូចជាទីក្រុងក្រាម៉ាទកស្ក៍និងក្រុងស្លូវីយ៉ាន់ស្ក៍ ។
ចំណែកទីក្រុងVOVTCHANSKដែលរុស្ស៊ីវាយយកបានដែរ ស្ថិតក្នុងតំបន់ខាគៀវភាគឦសានប្រទេស ជាកន្លែងប្រយុទ្ធគ្នាខ្លាំងក្លាចាប់តាំងពីខែមេសាឆ្នាំ២០២៤មក បណ្ដាលឲ្យទីក្រុងនោះរងការបំផ្លាញអស់ស្ទើរគ្មានសល់អ្វី ។ រដ្ឋមន្ត្រីការពារប្រទេសរុស្ស៊ីលោកអានដ្រេអ៊ីបេឡូអ៊ូសសូវ ចាត់ទុកការវាយបណ្ដើមយកបានក្រុងនេះថា ជាជំហានថ្មី ឆ្ពោះទៅរកជ័យជម្នះនិងនាំទៅដល់ការសម្រេចបណ្ដាគោលដៅរបស់ក្រុងមូស្គូនៅអ៊ុយក្រែន។ រុស្ស៊ីបង្កើនការវាយលុកពង្រីកដែនដីកាន់កាប់នៅអ៊ុយក្រែន ៕
ចែករំលែកព័តមាននេះ