សង្គ្រាមអ៊ុយក្រែន ៖ ប្រធានាធិបតីរុស្ស៊ី លោកវ្ល៉ាឌីមៀរ ពូទីន ថ្លែងកាលពីថ្ងៃទី២៧ វិច្ឆិកា ថា រុស្ស៊ីនឹងមិនបញ្ឈប់សង្គ្រាមនៅអ៊ុយក្រែនឡើយ ប្រសិនបើកងទ័ពក្រុងគៀវ…
សង្គ្រាមអ៊ុយក្រែន ៖ ប្រធានាធិបតីរុស្ស៊ី លោកវ្ល៉ាឌីមៀរ ពូទីន ថ្លែងកាលពីថ្ងៃទី២៧ វិច្ឆិកា ថា រុស្ស៊ីនឹងមិនបញ្ឈប់សង្គ្រាមនៅអ៊ុយក្រែនឡើយ ប្រសិនបើកងទ័ពក្រុងគៀវ មិនព្រមដកចេញពីបណ្ដាដែនដីដែលក្រុងមូស្គូបញ្ចូលជាឧបសម្ព័ន្ធទេនោះ ហើយបើមិនដកកងទ័ពរុស្ស៊ីនឹងដណ្ដើមកាន់កាប់ដោយកម្លាំង ។ ចំណែកវិមានប្រធានាធិបតីអ៊ុយក្រែនវិញ បានបដិសេធជាផ្លូវការ ការបោះបង់ដែនដីដោយអះអាងថា បញ្ហាប្រាកដនិយមតែមួយគត់គឺបទឈប់បាញ់គ្នានៅតាមខ្សែរណសិរ្ស ។
សេចក្ដីថ្លែងការណ៍នោះរបស់លោកពូទីនធ្វើឡើង ពេលដែលសហរដ្ឋអាមេរិក កាលពីសប្ដាហ៍មុនបានបង្ហាញផែនការសន្តិភាពមួយ សំដៅបញ្ចប់សង្គ្រាមនៅអ៊ុយក្រែន ដែលផែនការនោះគេឃើញថា ហាក់ដូចជាអំណោយផលខ្លាំងដល់រុស្ស៊ី ។ ផែនការនោះពីដំបូងមាន២៨ចំណុចត្រូវបានកែប្រែ កាលពីចុងសប្ដាហ៍កន្លងទៅ ក្រោយការពិភាក្សាជាមួយអ៊ុយក្រែន ដោយបន្ថយមកនៅត្រឹម២៤ចំណុចវិញ ។
ក្នុងសន្និសីទសារព័ត៌មានមួយនៅក្រុងប៊ីស្កេតកៀហ្ស៊ីស៊ីស្ថាន លោកពូទីនថ្លែងថា ប្រសិនបើកងទ័ពអ៊ុយក្រែនចាកចេញពីទីតាំង ក្នុងបណ្ដាតំបន់ដែលរុស្ស៊ីបញ្ចូលជាឧបសម្ព័ន្ធនោះយើងក៏នឹងបញ្ឈប់ការប្រទូស្តរ៉ាយ ។ ប្រសិនបើមិនព្រមចាកចេញទេនោះយើងនឹងវាយបណ្ដេញដោយកម្លាំងយោធា ។
នៅអ៊ុយក្រែនពេលដែលបណ្ដាហេដ្ឋារចនាសម្ព័ន្ធថាមពលរបស់ប្រទេស ពិសេសរដ្ឋធានីគៀវរងការវាយប្រហារខ្លាំងក្លារបស់រុស្ស៊ី កាលពីថ្ងៃទី២៥ វិច្ឆិកា ក្រុងអូដេសាក៏ទើបរងការវាយប្រហារធ្ងន់ធ្ងរពុំធ្លាប់មានពីមុនមកដែរ លើហេដ្ឋារចនាសម្ព័ន្ធថាមពល បណ្ដាលឲ្យទីក្រុងនោះធ្លាក់ក្នុងភាពងងឹតដល់២៤ម៉ោង៕
ចែករំលែកព័តមាននេះ