ទីក្រុងម៉ូស្គូ៖ លោកពូទីនថ្លែងថាផែនការសន្តិភាពរបស់អាមេរិកដើម្បីបិទបញ្ចប់សង្គ្រាមនៅអ៊ុយក្រែនអាចយកធ្វើជាមូលដ្ឋានគ្រឹះសម្រាប់បង្កើតកិច្ចព្រមព្រៀងនាពេលអនាគត។ មានន័យថាលោកពូទីនក៏ចង់បញ្ចប់សង្គ្រាមដែរ។ ប៉ុន្តែទន្ទឹមនឹងនោះ លោកក៏ឆ្លៀតព្រមានថានឹងវាយយកទឹកដីអ៊ុយក្រែនឱ្យបានច្រើនថែមទៀតបើអ៊ុយក្រែនមិនព្រមដកថយទេ។
ថ្លែងនៅចំពោះមុខអ្នកសារព័ត៌មាននៅប្រទេសកឺកគីស្ថាន លោកពូទីនបញ្ជាក់ថាវិមានក្រឹមឡាំងត្រៀមទទួលគណៈប្រតិភូអាមេរិកដែលដឹកនាំដោយប្រេសិតពិសេសរបស់លោកត្រាំគឺលោកស្ទីវវីតខូស (Steve Witkoff) នាដើមសប្ដាហ៍ក្រោយ។ លោកថារុស្ស៊ីត្រៀមពិភាក្សាគ្នាស៊ីជម្រៅ។
ប៉ុន្តែគេមិនសង្ឃឹមថាគម្រោងជួបគ្នានោះនឹងសម្រេចបានលទ្ធផលជាដុំកំភួននោះទេព្រោះលោកពូទីននៅតែបញ្ជាក់ឡើងវិញថាលោកមិនបន្ធូរបន្ថយលក្ខខណ្ឌទាមទារជាដាច់ខាត។ លោកថាសង្គ្រាមអ៊ុយក្រែនអាចបញ្ចប់ទៅវិញលុះត្រាតែអ៊ុយក្រែនដកកងទ័ពរបស់ពួកគេចេញពីទីតាំងដែលពួកគេកំពុងឈរជើងដើម្បីប្រគល់ទៅឱ្យរុស្ស៊ីកាន់កាប់វិញម្ដង។ បើពួកគេមិនព្រមដកថយតាមសម្រួលទេ លោកនៅតែបញ្ជាកងទ័ពឱ្យវាយប្រហាររហូតដល់បានទឹកដីទាំងនោះដោយកម្លាំងយោធា។
ប្រធានាធិបតីអ៊ុយក្រែន លោកហ្សេឡិនស្គី ថ្លែងថាគណៈប្រតិភូរបស់លោកក៏ត្រៀមជួបមន្ត្រីរដ្ឋាភិបាលអាមេរិកនៅចុងសប្ដាហ៍នេះផងដែរដើម្បីពិភាក្សាអំពីចំណុចសំខាន់ៗដូចដែលបានព្រមព្រៀងគ្នានៅទីក្រុងហ្សឺណែវ។ ដោយសារការជួបគ្នានៅហ្សឺណែវនោះហើយទើបបានជាផែនការសន្តិភាព២៨ចំណុចដែលផ្ដួចផ្ដើមឡើងដោយលោកត្រាំត្រូវបានកែសម្រួលឡើងវិញ។
សព្វថ្ងៃនេះ រុស្ស៊ីកាន់កាប់ទឹកដីអ៊ុយក្រែន២០%នៅលូហាន (Donetsk), ដូញែត (Donetsk), ខឺសុន (Kherson), និងហ្សាប៉ូរីហ្សៀ (Zaporizhzhia)។ ប៉ុន្តែរុស្ស៊ីមិនទាន់កាន់កាប់បាន១០០%។ ដូច្នេះ រុស្ស៊ីទាមទារឱ្យអ៊ុយក្រែនដកកងទ័ពចេញពីតំបន់ទាំងនោះដើម្បីប្រគល់ឱ្យរុស្ស៊ីកាន់កាប់។ គម្រោងជួបគ្នានៅម៉ូស្គូនាសប្ដាហ៍ក្រោយនោះនឹងផ្ដោតសំខាន់ទៅលើការពិភាក្សាផែនការសន្តិភាព។ នេះបើយោងតាមប្រភពពីស៊ីអឹនអឹន (CNN) និងប្រភពដទៃទៀត៕
ចែករំលែកព័តមាននេះ