ខេត្តព្រៃវែង ៖ កុមារដែលរងគ្រោះដោយការប្រើឱ្យធ្វើការនៅតាមសិប្បកម្មឡឥដ្ឋជាច្រើនកន្លែងនៅទូទាំងខេត្តព្រៃវែងត្រូវបានមន្ទីរការងារនិងបណ្ដុះបណ្ដាលវិជ្ជាជីវៈខេត្តព្រៃវែង ជួយអន្តរាគមន៍សង្គ្រោះបានជាបន្តបន្ទាប់សរុបប្រមាណជិត200នាក់ហើយ ក្នុងរយៈពេលត្រឹមតែ2ឆ្នាំប៉ុណ្ណោះ ។
ថ្លែងនៅក្នុងពិធីចែកសម្ភារៈសិក្សា និងមធ្យោបាយធ្វើដំណើរដល់កុមារងាយរងគ្រោះ និងកុមារត្រូវបានគាំពារដែលធ្វើឡើង កាលពីថ្ងៃទី២៧ វិច្ឆិកា នៅសាលាស្រុកស្វាយអន្ទរ លោក ណុប សាវ៉ាត ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តព្រៃវែង បានអោយដឹងថា នៅទូទាំងខេត្តព្រៃវែង មានសិប្បកម្មល្អឥដ្ឋ ក្បឿង សរុបចំនួន18កន្លែង ស្ថិតនៅក្នុងស្រុកចំនួន5 គឺស្រុកស្វាយអន្ទរ ស៊ីធរកណ្ដាល ពាមរក៍ កញ្ជ្រៀច និងស្រុកព្រះស្ដេច ហើយនៅតាមសិប្បកម្មឡឥដ្ឋទាំងនេះ ត្រូវបានរកឃើញថា មានក្មេងៗជាច្រើនត្រូវឪពុកម្ដាយប្រើឲ្យជួយធ្វើការ ដើម្បីរកប្រាក់ចំណូលចិញ្ចឹមគ្រួសារ ។
លោក ណុប សុវ៉ាត បានបន្តថា តាមរយៈកិច្ចអន្តរាគមន៍ស្នូលឆ្នាំ 2024 និង 2025 មន្ទីរការងារនិងបណ្ដុះបណ្ដាលវិជ្ជាជីវៈខេត្តព្រៃវែង បានជួយសង្គ្រោះកុមារងាយរងគ្រោះពីតាមឡសិប្បកម្មផលិតឥដ្ឋ ក្បឿង សរុបបានចំនួន100នាក់ (ស្រី40នាក់) ព្រមទាំងជួយគាំពារកុមារបានចំនួន90នាក់ (ស្រី40នាក់) ដែលការជួយគាំពារនេះ មន្ទីរការងារបានផ្ដល់ជូននូវសម្ភារៈសិក្សា និងកង់ជាមធ្យោបាយសម្រាប់ធ្វើដំណើរ ដែលត្រូវបានធ្វើពិធីចែកជូននៅថ្ងៃនេះ ។
ឯកឧត្តម វ៉េង ហៀង អនុរដ្ឋលេខាធិការក្រសួងការងារនិងបណ្ដុះបណ្ដាលវិជ្ជាជីវៈបានមានប្រសាសន៍ថា រាជរដ្ឋាភិបាលបានផ្ដល់ការគាំទ្រ និងអនុញ្ញាតឲ្យក្រសួងការងារនិងបណ្ដុះបណ្ដាលវិជ្ជាជីវៈ ទទួលបានកញ្ចប់ថវិកាសម្រាប់អនុវត្តគម្រោងកិច្ចអន្តរាគមន៍ស្នូល ដើម្បីទប់ស្កាត់ ការពារ និងបន្តការគាំពារកុមារ នៅតាមសិប្បកម្មផលិតឥដ្ឋ ក្បឿង ដើម្បីឈានទៅលុបបំបាត់ទម្រង់ធ្ងន់ធ្ងរបំផុត នៃពលកម្មកុមារនៅក្នុងប្រទេស រួមទាំងខេត្តព្រៃវែងផងដែរ ។
ចែករំលែកព័តមាននេះ