រាជធានីភ្នំពេញ ៖ រដ្ឋមន្ត្រីក្រសួងអប់រំ យុវជន និងកីឡា បានលើកទឹកចិត្តដល់លោកគ្រូ អ្នកគ្រូ បន្តចូលរួមចំណែក ដើម្បីធ្វើឱ្យការរៀនភាសាបារាំងនឹងប្រែក្លាយជាបទពិសោធន៍មួយដ៏រីករាយ ។…
រាជធានីភ្នំពេញ ៖ រដ្ឋមន្ត្រីក្រសួងអប់រំ យុវជន និងកីឡា បានលើកទឹកចិត្តដល់លោកគ្រូ អ្នកគ្រូ បន្តចូលរួមចំណែក ដើម្បីធ្វើឱ្យការរៀនភាសាបារាំងនឹងប្រែក្លាយជាបទពិសោធន៍មួយដ៏រីករាយ ។
ការលើកឡើងរបស់ឯកឧត្តម ហង់ជួន ណារ៉ុន ឧបនាយករដ្ឋមន្ត្រីរដ្ឋមន្ត្រីក្រសួងអប់រំ យុជវន និងកីឡា ក្នុងពិធីអបអរសាទរ «ទិវាគ្រូបង្រៀនភាសាបារាំងអន្តរជាតិ» បានប្រារព្ធឡើងនៅស្ថានទូតបារាំង ប្រចាំនៅកម្ពុជា នៅថ្ងៃទី២៦ វិច្ឆិកា ដោយមានការអញ្ជើញចូលរួមពីលោក លោកស្រី តំណាងស្ថាប័ន និងសាកលវិទ្យាល័យដែលប្រើប្រាស់ភាសាបារាំង និងលោកគ្រូ អ្នកគ្រូដែលជាគ្រូបង្រៀនភាសាបារាំងជាច្រើនរូបផងដែរ ។
ពិធីជួបជុំនេះ ធ្វើឡើងដើម្បីអបអរទិវាអន្តរជាតិនៃគ្រូបង្រៀនភាសាបារាំង ដែលជាតួអង្គលើកស្ទួយកិត្យានុភាពភាសាបារាំងលើពិភពលោក ។ ប្រធានបទដែលត្រូវបានជ្រើសរើសនៅឆ្នាំនេះ គឺ «ច្រៀង លេង បង្រៀន៖ ហ្វ្រង់កូហ្វូនីរណ្ដំដូចតន្ដ្រី» ដែលឆ្លុះបញ្ចាំងអំពីការពិតនៃថ្នាក់រៀនរបស់យើង និងស្មារតីដែលយើងចង់បណ្តុះបណ្ដាលក្នុងការអប់រំ ។ តន្ត្រីបានក្លាយជាមធ្យោបាយដែលអាចចូលរួមយ៉ាងទូលំទូលាយសម្រាប់ការសិក្សា។ ការអប់រំដូចជា តន្ត្រី គឺជាសកម្មភាពរួមគ្នា ដែលបង្ហាញពីគន្លងមកពីការទទួលទានយ៉ាងស្រស់ស្អាត : «សាមគ្គីជាកម្លាំង»។
ក្នុងឱកាសនេះផងដែរ ឯកឧត្តមឧបនាយករដ្ឋមន្ត្រី បានថ្លែងអំណរគុណចំពោះរដ្ឋាភិបាលបារាំងសម្រាប់ការគាំទ្រ និងការប្តេជ្ញាចិត្តឥតងាករេក្នុងការបណ្តុះបណ្តាលអ្នកដឹកនាំនាពេលអនាគតរបស់យើង តាមរយៈអាហារូបករណ៍ France Excellence និស្សិត កម្ពុជាចំនួន៣៤៧នាក់ (រួមទាំងអ្នកទទួលអាហារូបករណ៍ Eiffel ៥០ នាក់) ទទួលបានអត្ថប្រយោជន៍ចន្លោះឆ្នាំ២០២០ និង២០២៦ ពីឱកាសក្នុងការអប់រំកម្រិតខ្ពស់នៅប្រទេសបារាំង ។
ឯកឧត្តមឧបនាយករដ្ឋមន្ដ្រីបានលើកឡើងថា កម្ពុជាបានប្តេជ្ញាចិត្តយ៉ាងមុតមាំ ក្នុងការរៀបចំព្រឹត្តិការណ៍ដ៏មានសារសំខាន់ជាប្រវត្តិសាស្ត្រ ដែលកម្ពុជានឹងក្លាយជាម្ចាស់ផ្ទះនៃកិច្ចប្រជុំកំពូល Francophonie នៅឆ្នាំ២០២៦ខាងមុខនេះ។
ឯកឧត្តមឧបនាយករដ្ឋមន្ដ្រីបានបន្ថែមទៀតថា «លោកគ្រូ អ្នកគ្រូ គឺជាស្ថាបត្យករដែលបង្កើតអនាគតភាសាបារាំងរបស់ប្រទេសកម្ពុជាក្នុងការរៀបចំសម្រាប់កិច្ចប្រជុំកំពូលឆ្នាំ ២០២៦ ដូច្នេះ សូមលើកទឹកចិត្តឱ្យលោកគ្រូ អ្នកគ្រូបន្តចូលរួមចំណែកដើម្បីធ្វើឱ្យការរៀនភាសាបារាំងនឹងប្រែក្លាយជាបទពិសោធន៍មួយដ៏រីករាយ» ៕
ចែករំលែកព័តមាននេះ