ខេត្តកំពង់ធំ ៖ លោក សោម ស៊ុន ដាក់បទបញ្ជាដល់កងកម្លាំងចម្រុះ ត្រូវបន្តសកម្មភាពបង្ក្រាបបទល្មើសនេសាទខុសច្បាប់ឲ្យដូចភ្លៀងរលឹម។ នេះបើយោងតាមផេក កងទ័ពជើងគោកនៃកងយោធពលខេមរភូមិន្ទ បានប្រកាសនាថ្ងៃទី២៦…
ខេត្តកំពង់ធំ ៖ លោក សោម ស៊ុន ដាក់បទបញ្ជាដល់កងកម្លាំងចម្រុះ ត្រូវបន្តសកម្មភាពបង្ក្រាបបទល្មើសនេសាទខុសច្បាប់ឲ្យដូចភ្លៀងរលឹម។ នេះបើយោងតាមផេក កងទ័ពជើងគោកនៃកងយោធពលខេមរភូមិន្ទ បានប្រកាសនាថ្ងៃទី២៦ ខែវិខច្ឆិកាឆ្នាំ២០២៥ ។
កងទ័ពជើងគោកនៃកងយោធពលខេមរភូមិន្ទ បានបញ្ជាក់ថា ដោយទទួលបានបទបញ្ជាពីឧត្តមសេនីយ៍ទោ សោម ស៊ុន មេបញ្ជាការ តំបន់ប្រតិបត្តិការសឹករងកំពង់ធំ អនុប្រធានអចិន្ត្រៃយ៍នៃគណៈកម្មការ ការពារ ទប់ស្កាត់ និងបង្ក្រាបបទល្មើស ធនធានធម្មជាតិ ខេត្តកំពង់ធំ នៅព្រឹកថ្ងៃទី២៦ ខែវិច្ឆិកា ឆ្នាំ២០២៥ លោកវរសេនីយ៍ត្រី ភោគ ប៊ុនធឿន នាយទាហាននៃបញ្ជាការដ្ឋានតំបន់ប្រតិបត្តិការសឹករង បានបង្ក្រាបបទល្មើសនេសាទ នៅឃុំពាមបាង ស្រុកស្ទោង បានបន្តដឹកនាំកងកម្លាំង សហការជាមួយកម្លាំងចម្រុះ ធ្វើសកម្មភាពបង្ក្រាបបទល្មើសនេសាទខុសច្បាប់ នៅចំណុចសម្រាលកូន ក្នុងភូមិសាស្ត្រឃុំពាមបាង ស្រុកស្ទោង ខេត្តកំពង់ធំ ដោយទទួលបានលទ្ធផលរុះរើបំផ្លាញចោលឧបករណ៍នេសាទខុសច្បាប់ មានរបាំងសាច់អួនក្រឡាញ់ញឹកចំនួនពីររបាំងដែលមានប្រវែងជាង ៤៥០ម៉ែត្រ ។
ក្នុងនោះដែរក៏បាន បំផ្លាញចោលឡុកសាច់អួនចំនួន៤ឡុក និងលបលូសាច់អួនចំនួន៨មាត់ ចាក់លែងត្រីចម្រុះប្រមាណចំនួន៨គីឡូក្រាម ព្រមទាំងបានបំផ្លាញចោលនូវឧបករណ៍នេសាទខុសច្បាប់មួយចំនួនទៀតផងដែរ ។
លោកវរសេនីយ៍ត្រី ភោក ប៊ុនធឿន បានបញ្ជាក់ថា ៖ ដោយអនុវត្តតាមបទបញ្ជារបស់ឧត្តមសេនីយ៍ទោ សោម ស៊ុន កងកម្លាំងអន្តរាគមន៍នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានចេញសកម្មភាពជារៀងរាល់ថ្ងៃ ដោយបានសហការជាមួយកងកម្លាំងចម្រុះ ដែលមានមន្ត្រីជំនាញជលផល និងមន្ត្រីស្ថាប័នឧទ្យានុរក្សបរិស្ថាន រួមជាមួយកងកម្លាំងប្រដាប់អាវុធទាំងបី ក្នុងការបង្ក្រាបបទល្មើសនេសាទខុសច្បាប់ ក្នុងភូមិសាស្ត្រទទួលខុសត្រូវនៅឃុំពាមបាង ស្រុកស្ទោង ខេត្តកំពង់ធំ ទទួលបានលទ្ធផលល្អប្រសើរ គួរជាទីមោទនៈ ធ្វើឲ្យបទល្មើសនេសាទមានការថយចុះ ។
កងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានធ្វើសកម្មភាពដូចភ្លៀងរលឹម ក្នុងការបង្ក្រាបបទល្មើសនេសាទខុសច្បាប់នៅតំបន់បឹងទន្លេសាប និងនៅក្នុងភូមិសាស្ត្រស្រុកស្ទោង និងស្រុកកំពង់ស្វាយ ។ ហើយឧបករណ៍នេសាទល្មើសច្បាប់ជាច្រើនគីឡូម៉ែត្រត្រូវបានបំផ្លាញចោល ។
ជាលទ្ធផលបានធ្វើឲ្យផលត្រីនៅឆ្នាំនេះ មានការសម្បូរឡើងវិញ ដើម្បីបម្រើសេចក្តីត្រូវការរបស់ប្រជាជននៅគ្រប់ស្រទាប់ជាន់ថ្នាក់ ។ ធ្វើឲ្យប្រជាពលរដ្ឋទូទាំងប្រទេសមានការអបអរសាទរ ៕
ចែករំលែកព័តមាននេះ