ខេត្តកំពង់ស្ពឺ ៖ ក្រុមក្មេងទំនើងចំនួន៧នាក់ ត្រូវបានកម្លាំងនគរបាលស្រុកសំរោងទង ខេត្តកំពង់ស្ពឺ ធ្វើការសហការជាមួយកម្លាំងនគរបាលស្រុកអង្គស្នួល ខេត្តកណ្តាល ធ្វើការឃាត់ខ្លួន ខណៈដែលក្រុមក្មេងទំនើងខាងលើ បានធ្វើសកម្មភាពប្រដាប់ដោយដាវ…
ខេត្តកំពង់ស្ពឺ ៖ ក្រុមក្មេងទំនើងចំនួន៧នាក់ ត្រូវបានកម្លាំងនគរបាលស្រុកសំរោងទង ខេត្តកំពង់ស្ពឺ ធ្វើការសហការជាមួយកម្លាំងនគរបាលស្រុកអង្គស្នួល ខេត្តកណ្តាល ធ្វើការឃាត់ខ្លួន ខណៈដែលក្រុមក្មេងទំនើងខាងលើ បានធ្វើសកម្មភាពប្រដាប់ដោយដាវ កាំបិតផ្គាក់ កាប់បំផ្លាញ និងបណ្តាលឱ្យមនុស្សរងរបួសតាមផ្លូវសាធារណៈ ។ ការបង្ក្រាបក្រុមក្មេងទំនើងបានធ្វើឡើងកាលពីយប់ថ្ងៃទី២៥ ខែវិច្ឆិកា ឆ្នាំ២០២៥ នៅក្នុងស្រុកសំរោងទង ខេត្តកំពង់ស្ពឺ និងស្រុកអង្គស្នួល ខេត្តកណ្តាល ។
នគរបាលស្រុកសំរោងទងបាននិយាយឱ្យដឹងថា មុនពេលឈានដល់ធ្វើការឃាត់ខ្លួនក្រុមក្មេងទំនើងខាងលើ ដោយបានអនុវត្តតាមបទបញ្ជាដ៏ខ្ពង់ខ្ពស់របស់លោកឧត្តមសេនីយ៍ទោ ឃឹម សុកខៃ ស្នងការខេត្តកំពង់ស្ពឺ និងដឹកនាំចង្អុលបង្ហាញដោយលោកឧត្តមសេនីយ៍ត្រី សម សាក់ ស្នងការរងទទួលផែនការងារព្រហ្មទណ្ឌ និងចុះបញ្ជាផ្ទាល់ដោយលោកឧត្តមសេនីយ៍ត្រី រស់ រដ្ឋា ស្នងការរងដឹកនាំការិយាល័យព្រហ្មទណ្ឌកម្រិតស្រាល នឹងលោកវិរៈសេនីយ៍ឯក ឃុត សុផល អធិការនគរបាលស្រុកសំរោងទង នៅថ្ងៃទី២៥ ខែវិច្ឆិកា ឆ្នាំ២០២៥ កម្លាំងនគរបាលស្រុកសំរោងទង ខេត្តកំពង់ស្ពឺ បានសហការជាមួយ ការិយាល័យព្រហ្មទណ្ឌកម្រិតស្រាល និងកម្លាំងនគរបាលស្រុកអង្គស្នួល ខេត្តកណ្តាល បានស្រាវជ្រាវបង្ក្រាប និងឃាត់មុខសញ្ញាបង្កហិង្សា កាលពីយប់ថ្ងៃ២៣ ខែវិច្ឆិកា ឆ្នាំ២០២៥កន្លងទៅថ្មីតាមកាមេរាសុវត្ថិភាពនៅតាមបណ្តោយផ្លូវជាតិលេខ៤ ស្ថិតនៅក្នុងឃុំត្រពាំងគង ស្រុកសំរោងទង ខេត្តកំពង់ស្ពឺធ្វើការឃាត់ខ្លួនមុខសញ្ញាបាន៧នាក់។
នគរបាលស្រុកសំរោងទងបានបន្តថា ក្រុមក្មេងទំនើងដែលឃាត់ខ្លួនបានទី១-មានឈ្មោះ អ៊ាន រ៉ាយុទ្ធ ភេទប្រុស អាយុ១៩ឆ្នាំ រស់នៅក្នុងភូមិត្រពាំងអំពិល ឃុំត្រពាំងគង ស្រុកសំរោងទង (ជាអ្នកកាប់ជនរងគ្រោះ) ទី២-មានឈ្មោះ កា សុធារ៉ា ភេទប្រុស អាយុ ១៧ឆ្នាំ រស់នៅក្នុងភូមិដំណាក់អំពិល ឃុំដំណាក់អំពិល ស្រុកអង្គស្នួល (ជាអ្នកកាប់ម៉ូតូ) ទី៣-ឈ្មោះ ហួរ ប៊ុនហាយ ភេទប្រុស អាយុ១៧ឆ្នាំ រស់នៅក្នុងភូមិព្រៃពង្រ ឃុំសំបូរ ស្រុកសំរោងទង (ជាអ្នកកាន់ដាវ) ទី៤-ឈ្មោះ ម៉ុន សៀវថាវ ភេទប្រុស អាយុ១៧ឆ្នាំ រស់នៅក្នុងភូមិថ្មគោល ឃុំសំបូរ ស្រុកសំរោងទង ទី៥-ឈ្មោះ រ៉ាន សុវណ្ណា ភេទប្រុស អាយុ១៨ឆ្នាំ រស់នៅក្នុងភូមិព្រៃពង្រ ឃុំសំបូរ ស្រុកសំរោងទង ទី៦-ឈ្មោះ ណាច ចាន់តុលា ភេទប្រុស អាយុ២១ឆ្នាំ រស់នៅក្នុងភូមិដំណាក់អំពិល ឃុំដំណាក់អំពិល ស្រុកអង្គស្នួល និងទី៧-ឈ្មោះ ម៉ៅ វិទូ ហៅ ជាតិ ភេទប្រុស អាយុ១៦ឆ្នាំ រស់នៅក្នុងភូមិពន្លឺ ឃុំលំហាច ស្រុកអង្គស្នួល ខេត្តកណ្តាល ។
ក្រោយធ្វើការឃាត់ខ្លួនក្រុមក្មេងទំនើងខាងលើ កម្លាំងនគរបាលដកហូតវត្ថុតាង ដាវកែច្នៃចំនួន០១ និងកាំបិតផ្គាក់ចំនួន០១ ផងដែរ។ រីឯជនរងគ្រោះនៅសម្រាកមន្ទីរពេទ្យមិនទាន់ស្គាល់ឈ្មោះនោះទេ ។ នគរបាលស្រុកសំរោងទងបានបញ្ជាក់ថា បច្ចុប្បន្ន ក្រុមក្មេងទំនើង រួមជាមួយវត្ថុតាងខាងលើ នគរបាលជំនាញបានកសាងសំណុំរឿងបញ្ជូនទៅស្នងការដ្ឋាននគរបាលខេត្តកំពង់ស្ពឺ ដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ