ទីក្រុងហុងកុង៖ ចំនួនអ្នកស្លាប់ដោយសារការឆេះអគារនៅទីក្រុងហុងកុងបានកើនឡើងដល់៤៤នាក់ហើយ ហើយមនុស្ស២៧៩នាក់នៅបន្តបាត់ខ្លួន។ អាជ្ញាធរបានចាប់ខ្លួនមនុស្ស៣នាក់ពីបទសង្ស័យមនុស្សឃាត។ នៅក្នុងចំណោមនោះ ២នាក់ជាអ្នកចាត់ការក្រុមហ៊ុនសាងសង់ និងម្នាក់ទៀតជាអ្នកប្រឹក្សាយោបល់ផ្នែកវិស្វកម្ម។ រហូតមកដល់ពេលនេះ គេមិនទាន់ដឹងអំពីមូលហេតុពិតប្រាកដនៅពីក្រោយការឆេះនេះទេ។ ប៉ុន្តែនគរបាលរកឃើញបន្ទះស្នោបិទនៅតាមបង្អួចនៃអគារដែលកំពុងជួសជុល។ គេសង្ស័យថាដោយសាររបស់ទាំងនេះហើយទើបធ្វើឱ្យភ្លើងឆេះរាលដាលយ៉ាងឆាប់រហ័ស។
អគ្គិភ័យដែលកើតឡើងនៅសង្កាត់ថៃប៉ូ (Taipo) នោះឆេះរាលដាលពីអគារមួយទៅអគារមួយទៀតយ៉ាងឆាប់រហ័សតាមរយៈរន្ទា ឬធ្នឹមឫស្សីដែលប្រើសម្រាប់ជួសជុលអគារ។ រហូតដល់ព្រឹកថ្ងៃព្រហស្បតិ៍នៅតែមានផ្សែងហុយចេញពីអគារ។ រយៈពេល១៦ម៉ោងក្រោយការឆេះជាលើកដំបូង អគ្គិភ័យនេះនៅតែមិនទាន់ពន្លត់បានទាំងស្រុងទេ។ ភ្នាក់ងារអគ្គិភ័យកំពុងសម្រុកបាញ់ទឹកពន្លត់ភ្លើងនៅអគារបីខ្នងនៅក្នុងចំណោមអគារ៧ខ្នងនៃប្លុកនេះ។ ចំណែកអគារ៤ខ្នងបានរលត់ភ្លើងទៅវិញហើយ។
គេគិតថាចំនួនអ្នកស្លាប់អាចនឹងកើតឡើងបន្ថែមទៀតព្រោះនៅក្នុងចំណោមអ្នករបួសដែលកំពុងសម្រាកព្យាបាលនៅមន្ទីរពេទ្យ ៤៥នាក់របួសធ្ងន់។ អភិបាលក្រុងហុងកុង លោកចនលី បានថ្លែងទៅកាន់សាធារណជនតាមរយៈសន្និសីទសារព័ត៌មានកាលពីព្រឹកមិញ។ ប្រធានាធិបតីចិន លោកស៊ីជីនពីង បានផ្ញើសាររំលែកទុក្ខជូនក្រុមគ្រួសារជនរងគ្រោះកាលពីយប់មិញ និងបានអំពាវនាវឱ្យអាជ្ញាធរខិតខំឱ្យអស់ពីសមត្ថភាពដើម្បីកាត់បន្ថយជាអតិបរមានូវការបាត់បង់អាយុជីវិតរបស់មនុស្ស និងទ្រព្យសម្បត្តិ។
អគ្គិភ័យនេះចាប់ផ្ដើមឆេះដំបូងនៅម៉ោង២:៥១រសៀលថ្ងៃពុធ។ ត្រឹមតែមួយប៉ប្រិចភ្នែកប៉ុណ្ណោះ ភ្លើងឆេះរាលដាលពីផ្ទះល្វែងមួយទៅល្វែងមួយដែលស្ថិតនៅក្នុងអគារជាមួយគ្នា ហើយឆេះរាលដាលកាន់តែខ្លាំងឡើងៗក្លាយជាអណ្ដាតភ្លើងយ៉ាងសន្ធោសន្ធៅបង្កជាផ្សែងហុយទ្រលោមទៅលើអាកាស។ ភ្លើងក៏រាលដាលទៅអគារ៧ខ្នងទៀតដែលនៅក្បែរនោះ។ នេះបើយោងតាមប្រភពពីសោស ឆាយណា ម៉ននីង ប៉ុស្តិ៍ (South China Morning Post) និងប្រភពដទៃទៀត៕
ចែករំលែកព័តមាននេះ