ទីក្រុងម៉ូស្គូ៖ លោកពូទីនថ្លែងថាអាមេរិកយល់ច្បាស់អំពីភាពសាំញ៉ាំនៃជម្លោះអ៊ុយក្រែន។ ដូច្នេះទម្រាំឈានដល់ការចរចាត្រូវរ៉ូវគ្នាត្រូវឆ្លងកាត់នីតិវិធីស្មុគស្មាញ។ លោកពូទីនដែលកំពុងបំពេញទស្សនកិច្ចនៅប្រទេសកឺកគីស្ថាន (Kyrgyzstan) ថ្លែងដូចខាងលើនេះនៅក្នុងកិច្ចជំនួបទ្វេភាគីជាមួយសមភាគីបេឡារូស លោកលូកាសឹនកូ (Lukashenko)។ មេដឹកនាំទាំង២ជួបពិភាក្សាគ្នាមុនពេលចូលរួមកិច្ចប្រជុំកំពូល «អង្គការសន្ធិសញ្ញាសន្តិសុខរួម» ហៅកាត់ថាស៊ីអែសធីអូ (CSTO)។
លោកពូទីនមិនបានផ្ដល់សេចក្ដីលម្អិតពាក់ព័ន្ធនឹងការចាប់ផ្ដើមទំនាក់ទំនងគ្នា និងចរចាគ្នាឡើងវិញរវាងរុស្ស៊ី និងអាមេរិកដើម្បីដោះស្រាយបញ្ហាអ៊ុយក្រែនទេ។ កាលពីមុននេះ វិមានក្រឹមឡាំងបញ្ជាក់ថាប្រេសិតពិសេសរបស់លោកត្រាំគឺលោកស្ទីវវីតខូសនឹងរួមដំណើរជាមួយមន្ត្រីជាន់ខ្ពស់អាមេរិកជាច្រើននាក់ទៀតទៅទីក្រុងម៉ូស្គូនៅសប្ដាហ៍ក្រោយដើម្បីពិភាក្សាផែនការសន្តិភាព។
លោកត្រាំកំពុងខិតខំឱ្យមានកិច្ចព្រមព្រៀងសន្តិភាពនៅអ៊ុយក្រែនបន្ទាប់ពីសង្គ្រាមរយៈពេលជិត៤ឆ្នាំបានបង្ហិនបង្ហោចទ្រព្យសម្បត្តិ និងអាយុជីវិតរបស់មនុស្សអស់ជាច្រើន។ ទាំងអាមេរិក អឺរ៉ុប អ៊ុយក្រែន និងរុស្ស៊ីសុទ្ធតែខាតបង់ដូចគ្នា។ បន្ទាប់ពីឃើញសេចក្ដីលម្អិតនៃផែនការសន្តិភាពទាំង២៨ចំណុចរបស់លោកត្រាំ អ៊ុយក្រែន និងអឺរ៉ុបចាប់ផ្ដើមភ្ញាក់ផ្អើលយ៉ាងខ្លាំង។ ពួកគេគិតថាផែនការនេះហាក់ដូចជាស្របទៅតាមការចង់បានរុស្ស៊ី និងហាក់ដូចជាបំពេញចិត្តរុស្ស៊ីខ្លាំងពេក។ ឧទាហរណ៍ កាត់ទឹកដីអ៊ុយក្រែន២០%ឱ្យរុស្ស៊ី, ហាមអ៊ុយក្រែនចូលណាតូ និងបញ្ចុះកម្លាំងទ័ពរបស់អ៊ុយក្រែន។
ប៉ុន្តែក្រោយការជួបគ្នារវាងគណៈប្រតិភូអាមេរិក និងអ៊ុយក្រែននៅប្រទេសស្វីសរួចមក ផែនការរបស់លោកត្រាំត្រូវបានកែសម្រួលឡើងវិញ។ សូម្បីតែលោកហ្សេឡិនស្គីក៏គាំទ្រផែនការនេះផងដែរ។ នៅសល់ចំណុចខ្វែងគំនិតគ្នាមួយចំនួនដែលត្រូវពិភាក្សាគ្នាជាបន្តទៀត ហើយលោកចង់ឱ្យពួកអឺរ៉ុបមានឱកាសចូលរួមពិភាក្សាគ្នា។ កាលពីសប្ដាហ៍មុន លោកត្រាំព្រលយពាក្យថាលោកទុកពេលមួយអាទិត្យឱ្យលោកហ្សេឡិនស្គីទទួលយកផែនការសន្តិភាព។ បើមិនដូច្នេះទេ លោកព្រមានឈប់ផ្ដល់ជំនួយ និងព័ត៌មានសម្ងាត់ទៅឱ្យអ៊ុយក្រែន។
នៅក្នុងព្រឹត្តិការណ៍មួយទៀត អនុរដ្ឋមន្ត្រីការបរទេសរុស្ស៊ី លោកសឺហ្គេ រីយ៉ាបកូស (Sergei Ryabkov) ថ្លែងថារុស្ស៊ីនឹងមិនធ្វើសម្បទានជាដាច់ខាតនៅក្នុងគម្រោងចរចាបញ្ចប់សង្គ្រាមអ៊ុយក្រែន។ លោកថាការចរចាគ្នាត្រូវចាប់ផ្ដើមពីចំណុចព្រមព្រៀងគ្នារវាងលោកត្រាំ និងលោកពូទីនដែលបានជួបគ្នាកម្រិតកំពូលនៅអាឡាស់ស្កា។ រុស្ស៊ីចាត់ទុកថាកិច្ចព្រមព្រៀងនៅក្នុងគ្រានោះគឺជាមូលដ្ឋានគ្រឹះនៃការចរចានាពេលអនាគត។
អ្នកការទូតរូបនេះថ្លែងបន្តទៀតថារុស្ស៊ីមិនទាន់ត្រៀមខ្លួនពិភាក្សាគ្នាជាសាធារណៈនូវសេចក្ដីលម្អិតនៃផែនការសន្តិភាពនោះនៅឡើយទេ។ លោកយូរី អ៊ូសាកូស (Yuri Ushakov) ដែលជាជំនួយការរបស់លោកពូទីនទទួលបន្ទុកខាងកិច្ចការបរទេស និងដែលបានអមដំណើរលោកពូទីនទៅប្រទេសកឺកកីស្ថាន លោកបញ្ជាក់ថាប្រេសិតពិសេសរបស់លោកត្រាំគឺលោកស្ទីវវីតខូសនឹងធ្វើដំណើរទៅទីក្រុងម៉ូស្គូនៅសប្ដាហ៍ក្រោយ។ នេះបើយោងតាមប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ