ទីក្រុងហុងកុង៖ មនុស្សយ៉ាងតិច១៣នាក់បានស្លាប់ដោយសារការឆេះអគារដ៏ខ្ពស់ស្កឹមស្កៃមួយកន្លែងនៅទីក្រុងហុងកុង។ ភ្នាក់ងារពន្លត់អគ្គិភ័យប្រាប់ថាអ្នករបួស និងស្លាប់នៅក្នុងហេតុការណ៍នេះមានចំនួនសរុប២៨នាក់។ ក្នុងនោះ ៩នាក់ត្រូវគ្រូពេទ្យបញ្ជាក់ថាបានស្លាប់នៅនឹងកន្លែងកើតហេតុ។ មនុស្ស៦នាក់ទៀតរងរបួសធ្ងន់ ហើយត្រូវគេបញ្ជូនទៅសង្គ្រោះបន្ទាន់នៅមន្ទីរពេទ្យ។ ក្រោយមក គេទទួលដំណឹងថា៤នាក់នៅក្នុងចំណោមអ្នករបួសធ្ងន់ទាំងនោះបានស្លាប់ជាបន្តបន្ទាប់។
ភ្នាក់ងារពន្លត់អគ្គិភ័យម្នាក់ក៏បានពលីជីវិតនៅក្នុងពេលបំពេញបេសកកម្មផងដែរ ហើយម្នាក់ទៀតកំពុងសង្គ្រោះបន្ទាន់នៅមន្ទីរពេទ្យដោយសារការអស់កម្លាំង។ នៅពេលកើតហេតុ មានមនុស្សស្ថិតនៅក្នុងអគារប្រហែល៧រយនាក់។ ក្រុមអ្នកពន្លត់អគ្គិភ័យនៅតែបន្តការងាររបស់ខ្លួនឈានចូលដល់វេលាយប់។ គេឃើញថាផ្សែងដ៏ខ្មៅងងឹតបានហុយចេញពីអគារកម្ពស់៣២ជាន់។ របាយការណ៍រដ្ឋបាលបង្ហាញថានៅប្លុកអគារដែលឆេះនេះមានអគារ៨ខ្នង និងផ្ទះជិត២ពាន់ល្វែង មានមនុស្សរស់នៅសរុប៤៨០០នាក់។
នគរបាលនិយាយថាពួកគេទទួលការទាក់ទងថាមានមនុស្សជាច្រើននាក់ជាប់ផុងនៅក្នុងអគារ។ ប៉ុន្តែមន្ត្រីមូលដ្ឋានប្រចាំកន្លែងកើតហេតុប្រាប់ថាពួកគេមិនអាចបញ្ជាក់ថាមានមនុស្សនៅក្នុងអគារនោះដែរឬទេគិតត្រឹមក្បាលព្រលប់ថ្ងៃនេះ។ ក្រុមអ្នកពន្លត់អគ្គិភ័យបានត្រឹមតែបាញ់ទឹកពីខាងក្រៅតែប៉ុណ្ណោះព្រោះពួកគេមិនអាចជ្រៀតចូលទៅខាងក្នុងបានឡើយ។
លោកលូហ៊ីវហ្វុង (Lo Hiu-fung) ជាសមាជិកក្រុមប្រឹក្សាសង្កាត់ថៃប៉ូ (Taipo) ប្រាប់ទូរទស្សន៍ធីវីប៊ី (TVB) ថាអ្នកដែលជាប់ផុងនៅក្នុងអគារនោះភាគច្រើនជាមនុស្សចាស់ៗ។ គេឃើញអ្នករស់នៅម្ដុំនោះប្រមូលផ្ដុំគ្នាមើលផ្សែងដែលហោះហើរចេញពីអគារ ខណៈដែលផ្សែងខ្លះទៀតហុយចេញពីរន្ទាឫស្សី។ ឡានទឹក និងឡានពេទ្យតម្រង់ជួរគ្នាយ៉ាងត្រៀបត្រាខាងក្រោមអគារ។
ទូរទស្សន៍ធីវីប៊ី (TVB) ផ្សាយថាបណ្ដុំអគារនៅទីនេះកំពុងស្ថិតនៅក្នុងការជួសជុលកែលម្អ។ អភិបាលនៃគណៈអភិបាលទីក្រុងហុងកុង លោកចនលី (John Lee) សូមចូលរួមមរណទុក្ខជាមួយក្រុមគ្រួសារសព និងសូមជូនពរឱ្យអ្នករបួសឆាប់ជាសះស្បើយឡើងវិញ។ លោកបង្ហោះសារនៅលើហ្វេសប៊ុកដើម្បីបញ្ជាក់ថាស្ថាប័នរបស់រដ្ឋកំពុងខិតខំអស់ពីកម្លាំងកាយចិត្តដើម្បីជួយប្រជាជនដែលរងផលប៉ះពាល់ពីហេតុការណ៍ឆេះអគារ។ នេះបើយោងតាមប្រភពពីឆេនណល ញូស៍ អេស៊ា និងប្រភពដទៃទៀត៕
ចែករំលែកព័តមាននេះ