រាជធានីភ្នំពេញ ៖ មន្ត្រីជាន់ខ្ពស់ក្រសួងវប្បធម៌ និងវិចិត្រសិល្បៈលោក ទិត ថាវរិទ្ធ បានចេញមកឆ្លើយតបទៅកាន់មហាជនមួយចំនួន ដែលបានធ្វើការរិះគន់មកលើក្រសួងដែលមិនមានចំណាត់ការទៅលើអ្នកលក់អនឡាញមួយចំនួនដែលបានប្រើប្រាស់រូបភាពស្រើបស្រាល ដើម្បីជាការទាក់ទាញឲ្យមានអ្នកចូលទស្សនាច្រើន ។…
រាជធានីភ្នំពេញ ៖ មន្ត្រីជាន់ខ្ពស់ក្រសួងវប្បធម៌ និងវិចិត្រសិល្បៈលោក ទិត ថាវរិទ្ធ បានចេញមកឆ្លើយតបទៅកាន់មហាជនមួយចំនួន ដែលបានធ្វើការរិះគន់មកលើក្រសួងដែលមិនមានចំណាត់ការទៅលើអ្នកលក់អនឡាញមួយចំនួនដែលបានប្រើប្រាស់រូបភាពស្រើបស្រាល ដើម្បីជាការទាក់ទាញឲ្យមានអ្នកចូលទស្សនាច្រើន ។
ការចេញមកឆ្លើយតបពីលោក ទិត ថាវរិទ្ធ នាពេលនេះធ្វើឡើង បន្ទាប់ពីមានម្ចាស់ផេកព័ត៌មានមួយបានធ្វើការបង្ហោះដោយអ្នករិះគន់ដោយចោទប្រកាន់មកលើក្រសួងវប្បធម៌ដែលតែងតែបណ្តែតបណ្តោយ និងព្រងើយកន្តើយចំពោះរឿងនេះដែលជាហេតុនាំឲ្យមានអំពើរំលោភបំពាននានា ដូចពាក្យចាស់ពោលថា គោបាត់ទើបធ្វើរបង ។
តាមរយៈសំណេរបង្ហោះលើបណ្តាញសង្គមលោក ទិត ថាវរិទ្ធ រដ្ឋលេខាធិការក្រសួងវប្បធម៌និងវិចិត្រសិល្បៈបានលើកឡើងជាការឆ្លើយតបថា «ថ្មីៗនេះ មាន page នៃព័ត៌មានបណ្តាញសង្គមមួយបានផ្សព្វផ្សាយរូបភាពស្ត្រីម្នាក់ ដែលជាអ្នកផលិតមាតិការ ដើម្បីផ្សព្វផ្សាយលក់ផលិតផល Online ដោយភ្ជាប់ជាមួយខ្លឹមសារដែលមានន័យថា «វាគឺជាទំលាប់ទៅហើយ ដែលរដ្ឋមន្ត្រីក្រសួងវប្បធម៌ និងវិចិត្រសិល្បៈ តែងតែបណ្តោយឱ្យគោបាត់ទើបធ្វើរបង ការបណ្តោយឱ្យក្រុមលក់ផលិតផល ថតរឿងខ្លីបែបអនាចារ ស្រើបស្រាល ដើម្បីលក់របស់ដាច់ គឺជាប្រពៃណីដដែលៗ ដែលរដ្ឋមន្ត្រីក្រសួងវប្បធម៌ និងវិចិត្រសិល្បៈ តែងតែព្រងើយកន្តើយ មិនខ្វល់ពីរឿងធ្វើរបងនោះទេ» ។
លោកថា ក្នុងនាមខ្ញុំផ្ទាល់ ខ្ញុំសូមជម្រាបជូនសាធារណៈជនអោយបានជ្រាបថា ក្នុងរយៈពេលកន្លងមក ក្រសួងវប្បធម៌ និងវិចិត្រសិល្បៈ បានខិតខំបំពេញភារកិច្ចក្នុងការអភិរក្សថែរក្សា និងអភិវឌ្ឍសិល្បៈទាំងរូបី និងអរូបី ហើយក៏បានបង្កើតសកម្មភាពជាច្រើន ពង្រីកការផ្សព្វផ្សាយវប្បធម៌ដ៏ឧត្តុង្គឧត្តមរបស់ជាតិឱ្យពិភពលោកបានស្គាល់ផងដែរ។
ជាមួយគ្នានេះ ក្រសួងក៏បានរៀបចំការអប់រំ និងផ្សព្វផ្សាយអំពីសុជីវធម៌ និងសិលធម៌សង្គម ដើម្បីឱ្យយុវជនយុវនារី និងប្រជាពលរដ្ឋទូទាំងប្រទេសយល់ដឹង និងរក្សាឥរិយាបថដ៏សមរម្យក្នុងសង្គមដែលមានអារ្យធម៌ខ្ពស់ ។
ហើយថ្មីៗនេះ ក្រសួងវប្បធម៌ និងវិចិត្រសិល្បៈ ក៏ទើបបញ្ចប់សិក្ខាសិលាស្តីអំពី «សីលធម៌របស់សិល្បករ» ដែលប្រព្រឹត្តទៅរយៈពេលពីរថ្ងៃ ក្រោមអធិបតីភាពលោកជំទាវបណ្ឌិត សភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈដែលកិច្ចពិភាក្សានេះមានការចូលរួមពីសិល្បករល្បីៗជាច្រើនរូបផងដែរ ដើម្បីចូលរួមជួយផ្សព្វផ្សាយ និង ប្រតិបត្តិជាគំរូ ។
លោកបញ្ជាក់ថា ចំពោះរូបភាព និងសារដែលបង្ហោះដោយគេហទំព័រមួយនោះ ដែលមានន័យថា ក្រសួងមិនយកចិត្តទុកដាក់គឺអាចជាការយល់ច្រឡំ ឬក៏មិនបានស្វែងយល់អោយបានដឹតដល់នូវសកម្មភាពរបស់ក្រសួងកន្លងមក រីឯចំពោះសីលធម៌របស់អ្នកបង្កើតមាតិកាខ្លះៗ ដែលផលិតឃ្លីបវីដេអូដែលមានរូបភាពមិនសមរម្យ ដើម្បីទាក់ទាញចំណាប់អារម្មណ៍សាធារណៈបែបនេះ គឺអាចជាចេតនាឯកជនរបស់បុគ្គល ហើយម្ចាស់រូបភាពក៏មិនមែនជាសិល្បការិនីនោះទេ គ្រាន់តែជាអ្នកមានអាជីវកម្ម Online ដែលប្រហែលជាគាត់មិនទាន់យល់ច្បាស់អំពីតម្លៃ និងសភាពថ្លៃថ្នូររបស់ស្ត្រីខ្មែរ ដែលមិនអាចធ្វើការប្រៀបធៀបនឹងអរិយធម៌បែបបរទេសនិយមតែប៉ុណ្ណោះ ។
បើទោះបីជាយ៉ាងណា ខ្ញុំជឿជាក់ថា «គណៈកម្មាធិការលើកកម្ពស់សីលធម៌សង្គមតម្លៃស្ត្រី និងគ្រួសារខ្មែរ» ដែលមានសមាជិកមកពីអន្តរក្រសួងរួមទាំងក្រសួងវប្បធម៌ និងវិចិត្រសិល្បៈផងដែរ នឹងបន្តខិតខំអនុវត្តការងារនេះឱ្យមានប្រសិទ្ធភាពខ្ពស់ សម្រាប់ការចូលរួមកសាងសង្គមកម្ពុជាឱ្យកាន់តែប្រសើរ តែក៏ទាមទារឱ្យមានការចូលរួមចំណែកពីគ្រប់តួអង្គដែលជាកោសិកាសង្គមទាំងមូល។
ក្នុងនាមខ្ញុំផ្ទាល់ ក៏សូមថ្លែងអំណរគុណដល់សិល្បករ សិល្បការិនី influencer content creator ជាច្រើន ដែលធ្លាប់បានចូលរួមថែររក្សា ឬច្នៃបង្កើតស្នាដៃសិល្បៈថ្មីៗ ដ៏ល្អៗ បង្ហាញអំពីអត្តសញ្ញាណជាតិ និងផ្សព្វផ្សាយវប្បធម៌របស់ខ្មែរទៅកាន់ពិភពលោក និងសំណូមពរដល់យុវជន យុវនារី ប្រជាពលរដ្ឋទាំងអស់រួមគ្នាបន្តរថែរក្សានូវវប្បធម៌ ដែលជាមរតកដូនតារបស់យើងអោយបានល្អបំផុត ចៀសវាងការបាត់បង់ដោយការបំពានអំពីសំណាក់ប្រទេសជិតខាង ដែលកំពុងតែព្យាយាមចំលងមិនបន្ថយដៃនោះឡើយ ៕
ចែករំលែកព័តមាននេះ