ខេត្តកំពង់ឆ្នាំង ៖ ជុំវិញករណីផ្ទុះបាតុភាពថាមាន បុរសម្នាក់ដែលនៅតំបន់គេហៅឈ្មោះពេទ្យ លី បានដេញកាប់នារីម្នាក់ ផ្អើលពេញផ្សារជនបទ ក្នុងភូមិស្រែចាន ឃុំទួលខ្ពស់ ស្រុកទឹកផុស…
ខេត្តកំពង់ឆ្នាំង ៖ ជុំវិញករណីផ្ទុះបាតុភាពថាមាន បុរសម្នាក់ដែលនៅតំបន់គេហៅឈ្មោះពេទ្យ លី បានដេញកាប់នារីម្នាក់ ផ្អើលពេញផ្សារជនបទ ក្នុងភូមិស្រែចាន ឃុំទួលខ្ពស់ ស្រុកទឹកផុស ទាំងព្រឹកថ្ងៃទី២០ ខែវិច្ឆិកា ឆ្នាំ២០២៥ កន្លងទៅនេះ សង្ស័យជារឿងស្នេហាត្រីកោណ ។ ជាងនេះទៅទៀតមន្ទីរសុខាភិបាលខេត្តកំពង់ឆ្នាំងបានបដិសេធថាមិនមានឈ្មោះពេទ្យលី ប្រកបរបរគ្រូពេទ្យនៅទីនោះទេ។
ដើម្បីគោរពក្រមសិលធម៌ វិជ្ជាជីវៈសារព័ត៌មានកោះសន្តិភាព សូមមិនផ្តល់អត្តសញ្ញាណស្ត្រីដែលអះអាងថារងគ្រោះ ដែលបានផ្ដល់ចម្លើយប្រាប់អ្នកសារព័ត៌មានថា រូបគាត់អាយុ៤២ឆ្នាំ មានទៅលំនៅភូមិឃុំកើតហេតុខាងលើ ។នៅយប់ថ្ងៃទី ១៩ខែវិច្ឆិកាឆ្នាំ ២០២៥ ពេលគាត់កំពុងដេកលង់លក់ មានបុគ្គលម្នាក់ដែលគ្រប់គ្នាហៅថាឈ្មោះពេទ្យលី បានចូលដល់ក្នុងផ្ទះគាត់ (មិនដឹងចូលតាមណា ) បានប៉ុនប៉ងមកបៀតបៀនរាងកាយរបស់គាត់ ហើយត្រូវបានឈ្លោះប្រកែកគ្នា នឹងបានដេញឲ្យចេញទៅវិញ ដោយប្រាប់ថាមកតាមណាចេញតាមហ្នឹង ។
បុរសរូបនោះបានចេញតាមបង្អួចផ្ទះទៅវិញទៅ។លុះយប់ថ្ងៃទី ២០ ខែឆ្នាំដដែលឈ្មោះពេទ្យលីបានចូលមកផ្ទះគាត់ម្ដងទៀត ហើយបានឈ្លោះគ្នា រូបគាត់ក៏បានលើកទូរសព្ទថត ក៏ត្រូវឈ្មោះលីនោះឆក់ទូរសព្ទរត់ចេញទៅ។ គាត់បានស្រែកឲ្យគេជួយចាប់យកទូរសព្ទមកវិញដែរ ដោយស្រែកចោរៗ តែចាប់មិនបាន ។លុះព្រឹកឡើងខណៈដែលគាត់ទៅផ្សារ បម្រុងនឹងហូបអាហារសម្រន់ពេលព្រឹកស្រាប់តែឃើញឈ្មោះពេទ្យលី យកកាំបិតសំដៅមកគាត់ដេញកាប់គាត់ផ្អើលពេញផ្សារ នៅភូមិស្រែចាន ។ក្រោយកើតហេតុគាត់ក៏បានប្ដឹងដល់នគរបាលប៉ុស្តិ៍រដ្ឋបាលរួចហើយដែរ។
នៅថ្ងៃដដែលនោះដែរ ក្រុមអ្នកសារព័ត៌មានបានទៅជួបស្ត្រីជាប្រពន្ធរបស់ឈ្មោះពេទ្យ លី ត្រូវបានស្ត្រីនោះបញ្ជាក់ប្រាប់អ្នកសារព័ត៌មានថា តាមពិតប្ដីគាត់ស្រឡាញ់ជាមួយស្ត្រីរងគ្រោះជាង៣ឆ្នាំមកហើយ។កន្លងមករូបគាត់ ជាប្រពន្ឋ បានហាមប្ដីគាត់កុំឱ្យតែប៉ះពាល់ក្រែងចាញ់បោកគេអស់លុយអស់កាក់ តែប្តីគាត់មិនស្តាប់ ។ ស្រាប់តែនៅព្រឹកថ្ងៃកើតហេតុមិនដឹងមានរឿងអីទេឃើញប្ដីគាត់យកកាំបិតដេញកាប់ស្ត្រីដែលអះអាងថាជាជនរងគ្រោះពេញផ្សារ ។ រូបគាត់ជាប្រពន្ឋ ព្យាយាមចូលទៅចាប់ឃាត់ដៃម្ខាងចាប់ប្ដីដៃម្ខាងចាប់ស្ត្រីបំបែកគ្នា ធ្វើឱ្យមានរបួសតិចតួចទាំងសងខាង ។
បងប្អូនប្រជាពលរដ្ឋនៅកន្លែងកើតហេតុ បានចាប់បំបែកគ្នាទៅ។ ក្រោយពេលកើតហេតុគាត់ជាប្រពន្ធបានធ្វើការស្ដីបន្ទោសប្ដីគាត់ហើយប្ដីគាត់ក៏រត់ចេញបាត់ទៅ។
សមត្ថកិច្ចនគរបាលមូលដ្ឋានមិនហ៊ានបញ្ជាក់ថាដូចម្ដេចទេប៉ុន្តែគ្រាន់តែប្រាប់ថារឿងនេះមានភាព រញ៉េរញ៉ៃដែលមិនអាចបរិយាយបាន ព្រោះជនសង្ស័យបានរត់គេចខ្លួនបាត់។
ដោយឡែកបើតាមប្រសាសន៍របស់លោកវេជ្ជបណ្ឌិត ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង បានឲ្យដឹងថាមិនមានឈ្មោះពេទ្យលីប្រកបអាជីវកម្មគ្រូពេទ្យនៅទីនោះទេ សូមកុំច្រឡំ។តាមពិតកូនរបស់ឈ្មោះលីនឹងទេ បានបើកអាជីវកម្មគ្រូពេទ្យមានច្បាប់អនុញ្ញាតត្រឹមត្រូវ ដោយហេតុនេះហើយគាត់អំពាវនាវសូមបងប្អូនអ្នកសារព័ត៌មានមេត្តាកុំផ្សាយអ្វីខុស ធ្វើឲ្យប៉ះពាល់ដល់វិស័យសុខាភិបាល ។
សរុបសេចក្តីមករឿងរ៉ាវខាងលើត្រូវបានសង្ស័យថាជារឿងស្នេហាត្រីកោណដែលទាំងអស់គ្នារង់ចាំតាមដានបន្តទៀត នៅពេលដែលសមត្ថកិច្ចនាំខ្លួនឈ្មោះលីនោះមកសួរនាំ ។
ព័ត៌មានបន្ថេមនឹងមានផ្សាយនៅលើកាសែតកោះសន្តិភាព ៕
ចែករំលែកព័តមាននេះ