ខេត្តតាកែវ ៖ ក្រសួងព័ត៌មាន បានសហការជាមួយអគ្គលេខាធិការដ្ឋាន នៃអាជ្ញាធរជាតិប្រយុទ្ធប្រឆាំងគ្រឿងញៀន នៅព្រឹកថ្ងៃទី២១ ខែវិច្ឆិកា ឆ្នាំ២០២៥នេះ បានបន្តរៀបចំយុទ្ធនាការអប់រំ និងផ្សព្វផ្សាយអំពីបញ្ហាគ្រឿងញៀន…
ខេត្តតាកែវ ៖ ក្រសួងព័ត៌មាន បានសហការជាមួយអគ្គលេខាធិការដ្ឋាន នៃអាជ្ញាធរជាតិប្រយុទ្ធប្រឆាំងគ្រឿងញៀន នៅព្រឹកថ្ងៃទី២១ ខែវិច្ឆិកា ឆ្នាំ២០២៥នេះ បានបន្តរៀបចំយុទ្ធនាការអប់រំ និងផ្សព្វផ្សាយអំពីបញ្ហាគ្រឿងញៀន លើកទី២ នៅទីរួមខេត្តតាកែវ។
ការបន្តយុទ្ធនាការអប់រំ និងផ្សព្វផ្សាយអំពីគ្រឿងញៀន គឺជាចំណុចសំខាន់ក្នុងការរក្សាភាពជាប់លាប់ នៃការផ្តល់សារអប់រំល្អៗ និងការបង្កើតទម្លាប់និងស្មារតីពីការប្រយុទ្ធប្រឆាំងគ្រឿងញៀនទរបស់អាជ្ញាធរពាក់ព័ន្ធ ប្រជាពលរដ្ឋ និងអ្នកមានឥទ្ធិផលក្នុងបណ្តាញទំនាក់ទំនងសង្គម។ ការចាប់ផ្តើមយុទ្ធនាការមិនគ្រប់គ្រាន់ទេ ប្រសិនបើគ្មានការបន្តធ្វើជាប្រចាំ និងបណ្តុះស្មារតីជាចលនារួមរបស់ជាតិ។
យុទ្ធនាកាប្រយុទ្ធផ្សព្វផ្សាយអប់រំស្តីពីបញ្ហាគ្រឿងញៀន លើកទី២ ដឹកនាំដោយគណៈកម្មការទទួលបន្ទុកផ្សព្វផ្សាយអប់រំ នៃគណៈបញ្ជាការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ ដែលមានក្រសួងព័ត៌មានជាប្រធាន ត្រូវបានរៀបចំ ឡើងនៅខេត្តតាកែវ ក្រោមអធិបតីភាព លោក គិម ហុង អនុរដ្ឋលេខាធិការក្រសួងព័ត៌មាន តំណាង លោក នេត្រ ភក្ត្រា រដ្ឋមន្ត្រីមន្ត្រីក្រសួងព័ត៌មាន និងជាប្រធានគណៈកម្មការ។
ក្នុងឱកាសនៃរៀបចំយុទ្ធនាការនេះផងដែរ ក៏មានកាសហការ និងចូលរួមដោយ លោកឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណនៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំង គ្រឿងញៀន, លោក យង់ សុវឌ្ឍនា អភិបាលរងខេត្ត តំណាង លោក វ៉ី សំណាង អភិបាលខេត្តតាកែវ ថ្នាក់ដឹកនាំក្រសួងព័ត៌មាន-មន្ទីរព័ត៌មាន មន្ត្រីរាជការនៃមន្ទីរអង្គភាពពាក់ព័ន្ធក្នុងខេត្ត សិស្សានុសិស្ស យុវជន យុវនារី ប្រជាពលរដ្ឋ ប្រមាណជាង ៦០០ នាក់។
លោក គិម ហុង បានបញ្ជាក់ថា យុទ្ធនាការប្រយុទ្ធផ្សព្វផ្សាយអប់រំស្តីពីបញ្ហាគ្រឿងញៀន មិនធ្វើជាប្រចាំទៅបាននោះទេ ប៉ុន្តែ ជាសកម្មមួយដើម្បីបណ្តុះស្មារតីរួបរួមគ្នា ជាចលនាមួយឱ្យទៅជាទម្លាប់ជាប្រចាំ នៅក្នុងសហគមន៍ជួយឱ្យប្រជាជនមានការយល់ដឹងជាបន្តបន្ទាប់ និងក្លាយជាអាកប្បកិរិយាធម្មតា ដើម្បីណែនាំ អប់រំ ផ្សព្វផ្សាយ និងលើកទឹកចិត្តឱ្យមានការចូលរួមពីគ្រប់ភាគីពាក់ព័ន្ធ។
មន្ត្រីជាន់ខ្ពស់ក្រសួងព័ត៌មានរូបនេះ បានបន្តថា សកម្មភាពដែលយើងត្រូវធ្វើបន្តបន្ទាប់ពីយុទ្ធនាការនេះ គឺការបន្តផ្សព្វផ្សាយអាចបង្កើតវប្បធម៌ «សង្គមគ្មានគ្រឿងញៀន និងការបន្តអប់រំអាចផ្តល់ព័ត៌មានថ្មីៗអំពីសេវាជំនួយ និងការស្តារជីវិត»។ ការបន្តរៀបចំយុទ្ធនាការអប់រំ និងផ្សព្វផ្សាយអំពីបញ្ហាគ្រឿងញៀន គឺជាគន្លឹះក្នុងការរក្សាភាព ជាប់លាប់នៃសារ និងបង្កើតឥទ្ធិពលយូរអង្វែង។ វាជួយបង្កើតសង្គមដែលមានសុខភាពល្អ កាត់បន្ថយការប្រើ គ្រឿងញៀន និងផ្តល់ឱកាសដល់យុវជនក្នុងការរស់នៅជីវិតប្រសើរជាងមុន៕
ចែករំលែកព័តមាននេះ