ខេត្តមណ្ឌលគិរី ៖ បញ្ហាប្រឈមសំខាន់ៗមួយចំនួន ត្រូវបានប្រជាពលរដ្ឋរស់នៅភូមិពូឡេះ ខេត្តមណ្ឌលគិរី លើកឡើងជាសំណូមពរ ដើម្បីឱ្យក្រុមការងារថ្នាក់ជាតិ និងអាជ្ញាធរមូលដ្ឋាន ជួយដោះស្រាយជូនពួកគាត់ ក្នុងវេទិការសាធារណៈ…
ខេត្តមណ្ឌលគិរី ៖ បញ្ហាប្រឈមសំខាន់ៗមួយចំនួន ត្រូវបានប្រជាពលរដ្ឋរស់នៅភូមិពូឡេះ ខេត្តមណ្ឌលគិរី លើកឡើងជាសំណូមពរ ដើម្បីឱ្យក្រុមការងារថ្នាក់ជាតិ និងអាជ្ញាធរមូលដ្ឋាន ជួយដោះស្រាយជូនពួកគាត់ ក្នុងវេទិការសាធារណៈ ដើម្បីឆ្លុះបញ្ចាំងលើការគាំទ្រយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល សម្រាប់នីតិកាលទី៧នៃរដ្ឋសភា ដែលប្រព្រឹត្តទៅ នៅក្នុងបរិវេណវត្តធម្មគិរីជ្រៃមាស ហៅវត្តដាក់ដាំ ស្រុកអូររាំង ខេត្តមណ្ឌលគិរី នាព្រឹកថ្ងៃទី២១ ខែវិច្ឆិកា ឆ្នាំ២០២៥ ។
ឯកឧត្តម ជា ជុន ប្រធានក្រុមការងាររាជរដ្ឋាភិបាលចុះមូលដ្ឋានស្រុកអូររាំងបានឱ្យដឹងថា ការរៀបចំវេទិការនេះឡើង ក្នុងគោលបំណង ដើម្បីផ្សព្វផ្សាយគាំទ្រការអនុវត្តគោលនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ក្នុងការតាមដានត្រួតពិនិត្យការអនុវត្តរបស់មន្ត្រីថ្នាក់ក្រោមជាតិ ស្វែងយល់ពីការលំបាក បញ្ហាប្រឈម តម្រូវការ និងសំណូមពរនានារបស់ប្រជាពលរដ្ឋនៅមូលដ្ឋាន ដើម្បីរួមគ្នាសិក្សាដោះស្រាយបញ្ហាជូនប្រជាពលរដ្ឋឱ្យបានទាន់ពេលវេលា និងរាយការណ៍ជូនរាជរដ្ឋាភិបាល ក្នុងការរៀបចំផែនការយុទ្ធសាស្ត្រអភិវឌ្ឍន៍មូលដ្ឋានឱ្យបានសមស្របតាមតម្រូវការជាក់ស្ដែងរបស់ប្រជាពលរដ្ឋ។
ឯកឧត្តមក៏បានណែនាំដល់អាជ្ញាធរមូលដ្ឋាន និងប្រជាពលរដ្ឋទាំងអស់ ត្រូវចូលរួមប្រយុទ្ធប្រឆាំងបញ្ហាគ្រឿងញៀន និងល្បែងស៊ីសងគ្រប់ប្រភេទ និងបន្តអប់រំផ្សព្វផ្សាយដល់ប្រជាពលរដ្ឋអំពីការគោរពច្បាប់ចរាចរផ្លូវគោក បញ្ហាអនាម័យបរិស្ថាន និងការទុកដាក់សំរាមនានាឱ្យបានត្រឹមត្រូវ ដើម្បីធ្វើយ៉ាងណាឱ្យស្រុក និងខេត្តរបស់យើង មានសណ្តាប់ធ្នាប់ និងមានសោភ័ណភាពល្អ ដើម្បីទាក់ទាញភ្ញៀវទេសចរណ៍មកលេងកម្សាន្តកាន់តែច្រើនថែមទៀត។
សូមបញ្ជាក់ថា ក្នុងវេទិកាសាធារណៈថ្នាក់ជាតិនាពេលនេះ ប្រជាពលរដ្ឋ បានលើកឡើងជាសំណូមពរ និងបញ្ហាប្រឈមជាច្រើន ដូចជា បញ្ហាដីធ្លី ស្នើសុំផ្លូវ មន្ទីរពេទ្យ សាលារៀន និងស្នើសុំ រទេះជនពិការ សម្រាប់កុមារអាយុ១០ឆ្នាំ ។
ទាក់ទងនឹងបញ្ហាខាងលើនេះ ត្រូវបានមន្ត្រីជំនាញនីមួយៗ បានធ្វើការកត់ត្រាទុក និងបានស្រាយបំភ្លឺជូន ហើយបញ្ហាមួយចំនួនទៀត ត្រូវបានធ្វើរបាយការណ៍ដាក់ជូនថ្នាក់ដឹកនាំខេត្ត ក៏ដូចជាក្រសួងស្ថាប័ន ដើម្បីពិនិត្យ និងដោះស្រាយជូននៅពេលក្រោយ៕
ចែករំលែកព័តមាននេះ