រាជធានី​ភ្នំពេញ ៖ អគ្គនាយកដ្ឋាន​ការពារ​អ្នក​ប្រើប្រាស់ កិច្ចការ​ប្រកួតប្រជែង និង​បង្ក្រាប​ការ​ក្លែងបន្លំ CCF នៃ​ក្រសួងពាណិជ្ជកម្ម បានប្រកាសនៅ​ថ្ងៃ​ទី​២៧ ខែមករា ឆ្នាំ​២០២៦នេះ ​ឲ្យ​ពាណិជ្ជករ អាជីវករ ត្រូវ​បញ្ឈប់​ការ​លក់ ចែកចាយ​ផលិតផល​ទឹកដោះគោ​ម្សៅ Babybio Optima 1 ព្រមទាំង​រក្សា​ទុកជា​បណ្ដោះអាសន្ន និង​ត្រូវ​សហការ​ជាមួយ​អគ្គនាយកដ្ឋាន ក​.​ប​.​ប​. ដើម្បី​អនុវត្ត​នីតិវិធី នៃ​ការ​ដកហូត ត្រលប់​មក​វិញ ។

យោង​តាម​សេចក្តីជូនដំណឹង​របស់​អគ្គនាយកដ្ឋាន​កិច្ច​ការពារ​អ្នក​ប្រើប្រាស់ និង​ការ​ប្រកួតប្រជែង «​ក​.​ប​.​ប​.» នៃ​ក្រសួងពាណិជ្ជកម្ម មាន​កិត្តិយស​សូម​ជម្រាប​ជូន ពាណិជ្ជករ អាជីវករ មាតាបិតា និង​អ្នក​ប្រើប្រាស់ មេត្តា​ជ្រាប​ថា កាលពី​ថ្ងៃ​ទី​២៦ ខែមករា ឆ្នាំ​២០២៦ ក្រុមហ៊ុន កុង​ទ័​រ ភើ​ហ្វឹក ហ្វា​មេ​ដ ឯ​.​ក ដែល​ជា​ក្រុមហ៊ុន​ទទួល​សិទ្ធិ​ផ្ដាច់មុខ​លក់ និង​ចែកចាយ​ផលិតផល​ម៉ាក Babybio នៅ​ក្នុង​ព្រះរាជាណាចក្រ​កម្ពុជា បាន​ជូនដំណឹង​ថា​អាច​មាន​វត្តមាន TOXIN ឈ្មោះ Cereulide នៅ​ក្នុង​ផលិតផល​ទឹកដោះគោ​ម្សៅ​ម៉ាក Babybio Optima 1 ចំនួន ៣ ប្រភេទ ដែល​កំពុង​ចរាចរ​លើ​ទីផ្សារ​ក្នុង​ព្រះរាជាណាចក្រ កម្ពុជា រួម​មាន ៖
១. ទឹកដោះគោ​ម្សៅ Babybio Optima 1 ចំណុះ 800g មាន​លេខ​ឡូ​ត៏ Lot 894408 (Exp៖ 09/07/2027)
២. ទឹកដោះគោ​ម្សៅ Babybio Optima 1 ចំណុះ 800g មាន​លេខ​ឡូ​ត៏ Lot 900035 (Exp៖ 12/08/2027)
៣. ទឹកដោះគោ​ម្សៅ Babybio Optima 1 ចំណុះ 400g មាន​លេខ​ឡូ​ត៏ Lot 900932 (Exp៖ 18/08/2027)

ក្នុង​គោលបំណង​ធានា​សុវត្ថិភាព​សុខភាព​ទារក និង​កុមារ អគ្គនាយកដ្ឋាន ក​.​ប​.​ប​. នៃ​ក្រសួងពាណិជ្ជកម្ម សូម​ធ្វើការ​ណែនាំ​ដូច​ខាងក្រោម​៖

-​ចំពោះ​ពាណិជ្ជករ អាជីវករ​ធ្វើ​ធុរកិច្ច ផលិតផល​ទឹកដោះគោ​ម្សៅ​៖ ត្រូវ​បញ្ឈប់​ការ​លក់ ចែកចាយ ព្រមទាំង រក្សា​ទុកជា​បណ្ដោះអាសន្ន និង​ត្រូវ​សហការ​ជាមួយ​អគ្គនាយកដ្ឋាន ក​.​ប​.​ប​. ដើម្បី​អនុវត្ត​នីតិវិធី​នៃ​ការ​ដកហូត ត្រលប់​មក​វិញ នូវ​ផលិតផល​ទាំង ៣​ប្រភេទ​ខាងលើ ។

-​ចំពោះ​មាតាបិតា និង​អ្នក​ប្រើប្រាស់​៖ ជៀសវាង​ការ​ទិញ ផលិតផល​ទឹកដោះគោ​ម្សៅ​ទាំង ៣ ប្រភេទ ខាងលើ និង​/​ឬ​ត្រូវ​បញ្ឈប់​ការ​ប្រើប្រាស់​ជា​បន្ទាន់ ហើយ​ទំនាក់ទំនង​មក​អគ្គនាយកដ្ឋាន ក​.​ប​.​ប​. ដើម្បី​ទទួល​បាន ព័ត៌មាន​បន្ថែម ឬ​ទំនាក់ទំនង​ទៅ​ក្រុមហ៊ុន ដើម្បី​ប្តូរ​យក​ផលិតផល​ថ្មី ។

អាស្រ័យ​ហេតុនេះ សូម​ពាណិជ្ជករ អាជីវករ មាតាបិតា និង​អ្នក​ប្រើប្រាស់ មេត្តា​ទទួល​ជ្រាប និង​សហការ ផ្ដល់​ព័ត៌មាន​មក​អគ្គនាយកដ្ឋាន ក​.​ប​.​ប​. នៃ​ក្រសួងពាណិជ្ជកម្ម តាម​រយៈ​លេខ ១២៦៦ ៕