ខេត្តពោធិ៍សាត់ ៖ លោក ខូយ រីដា អភិបាល នៃគណៈអភិបាលខេត្តពោធិ៍សាត់ បន្ទាប់ពីដឹកនាំកម្លាំងចម្រុះចុះធ្វើអន្តរាគមន៍ដោយផ្ទាល់ ដើម្បីទប់ទល់នឹងស្ថានភាពទឹកស្ទឹង ដែលកំពុងជន់លិច…
ខេត្តពោធិ៍សាត់ ៖ លោក ខូយ រីដា អភិបាល នៃគណៈអភិបាលខេត្តពោធិ៍សាត់ បន្ទាប់ពីដឹកនាំកម្លាំងចម្រុះចុះធ្វើអន្តរាគមន៍ដោយផ្ទាល់ ដើម្បីទប់ទល់នឹងស្ថានភាពទឹកស្ទឹង ដែលកំពុងជន់លិច ដោយសារជំនន់ទឹកភ្លៀងដ៏គំហុក កាលពីវេលាម៉ោង ២ទៀបភ្លឺថ្ងៃទី១៩ ខែវិច្ឆិកា រហូតដល់ព្រឹកថ្ងៃទី២១ ខែវិច្ឆិកា ឆ្នាំ២០២៥មក។ នៅរសៀលថ្ងៃនេះ ខណៈពេលទឹបចាប់ផ្ដើមស្រកបន្តិច លោកបានបន្តដឹកនាំក្រុមការងារ និងមន្ត្រីជំនាញ ជិះទូក ចុះពិនិត្យស្ថានភាពជាក់ស្តែង ជួបសំណេះសំណាលជាមួយបងប្អូនប្រជាពលរដ្ឋ និងវាយតម្លៃផ្ទាល់អំពីផលប៉ះពាល់ នៃជំនន់លិចក្រុង ដើម្បីជម្លៀសប្រជាពលរដ្ឋ ដែលផ្ទះលិចលង់ខ្លាំង ទៅកាន់ទីទួលសុវត្ថិភាព ។
លោកអភិបាលខេត្ត បានក្រើនរំលឹកដល់ប្រជាពលរដ្ឋឱ្យបង្កើនការប្រុងប្រយ័ត្នខ្ពស់ចំពោះមនុស្សចាស់ ក្មេងតូច ជាពិសេសសត្វពស់ និងគ្រោះថ្នាក់ផ្សេងៗទៀត ជាយថាហេតុ ។
ក្នុងការចុះពិនិត្យ លោកបាននាំយកស្បៀងអាហារ ដូចជា អង្ករ ត្រីខ ទឹកត្រី មី និងសម្ភារៈមួយចំនួន ចែកជូនដល់បងប្អូនប្រជាពលរដ្ឋ ដែលរងគ្រោះដោយសារទឹកជំនន់ផងដែរ ៕
ចែករំលែកព័តមាននេះ