ខេត្តបាត់ដំបង ៖ នៅវេលាម៉ោង១១និង០០នាទីព្រឹកថ្ងៃទី២១ ខែវិច្ឆិកា ឆ្នាំ២០២៥ មានករណីគ្រោះថ្នាក់អគ្គិភ័យមួយកើតឡើង បណ្តាលឱ្យឆេះក្លិបកម្សាន្តមួយកន្លែង នៅចំណុច ក្នុងក្រុមទី៣ ភូមិរំចេក៤…
ខេត្តបាត់ដំបង ៖ នៅវេលាម៉ោង១១និង០០នាទីព្រឹកថ្ងៃទី២១ ខែវិច្ឆិកា ឆ្នាំ២០២៥ មានករណីគ្រោះថ្នាក់អគ្គិភ័យមួយកើតឡើង បណ្តាលឱ្យឆេះក្លិបកម្សាន្តមួយកន្លែង នៅចំណុច ក្នុងក្រុមទី៣ ភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង ។
លោកឧត្តមសេនីយ៍ទោ ដាញ់ អេងប៊ុនចាន់ ស្នងការ នៃស្នងការដ្ឋាននគរបាលខេត្តបាត់ដំបង ដឹកនាំបញ្ជាផ្ទាល់ដោយមានលោកឧត្តមសេនីយ៍ត្រី លឹម ពុទ្ធីឡា ស្នងការរង ផែនការងារនេះ ដឹកនាំកម្លាំងអន្តរាគមន៍ពន្លត់ ដោយរថយន្តចំនួន ០៣គ្រឿង ប្រើប្រាស់ទឹកអស់ចំនួន ០៣រថយន្ត ទើបគ្រប់គ្រងបាន និងមិនបង្កឱ្យឆេះឆ្លងទៅផ្ទះអ្នកដទៃ ។
គ្រោះអគ្គិភ័យនេះ មិនបង្កឱ្យរងរបួស ឬបាត់បង់អាយុជីវិតមនុស្ស សត្វឡើយ ប៉ុន្តែបានបង្កការខូចខាតទ្រព្យសម្បត្តិមួយចំនួននៅក្នុងនោះ។
រីឯមូលហេតុ នៃការឆេះនៅមិនទាន់ក្តាប់បាននៅឡើយ ដែលផ្នែកជំនាញកំពុងធ្វើការស្រាវជ្រាវនៅឡើយ ។
នៅក្នុងរបាយការណ៍សមត្ថកិច្ច បានឲ្យដឹងថា ក្លិបរាត្រីនោះមានយីហោ «B.A.T» មានទំហំ២០ម៉ែត្រ គុណ ២០ម៉ែត្រ ដែលមានថៅកែឈ្មោះ ឈៀ សុផល ភេទប្រុស អាយុ៣៣ឆ្នាំ។ របាយការណ៍ដដែល បានបញ្ជាក់ថា អគ្គិភ័យបានឆេះអស់ទាំងស្រុង នូវសម្ភារៈផ្សេងៗ និងឧបករណ៍នានាដែលមាននៅក្នុងក្លិប តែមិនបង្កគ្រោះថ្នាក់ដល់បុគ្គលិកបំរើការទេ ប៉ុន្តែមន្ត្រីជំនាញ ដែលធ្វើរបាយការណ៍ មិនបានបញ្ជាក់ពីមូលហេតុ ដែលបង្កឲ្យមានអគ្គិភ័យនេះកើតឡើងទេ គ្រាន់តែប្រាប់ថា «ផ្នែកជំនាញកំពុងធ្វើការស្រាវជ្រាវនៅឡើយ» ។
បើតាមបុគ្គលិក ដែលបម្រើការនៅក្លិបរាត្រីនេះ បាននិយាយថា សម្ភារៈ ដូចជាតុ កៅអី ភាគច្រើនមានតែគ្រឿងដែក មិនសូវមានគ្រឿងជ័រ ឬសាឡុងពួកទេ ប៉ុន្តែអគ្គិភ័យឆេះខ្ទេចអស់ ក្រៅពីតុ និងកៅអីដែក ។
ក្រោយពីមន្ត្រីពន្លត់អគ្គិភ័យបាញ់ទឹកពន្លត់ភ្លើងនៅក្នុងក្លិបបាន១០០% និងបន្ទាប់ពីស្ងប់ផ្សែង គេឃើញក្រុមបុគ្គលិកប្រុស-ស្រី បាននាំគ្នាជញ្ជូន តុ កៅអីដែកចេញពីក្នុងក្លិប។ បុគ្គលិកទាំងនោះ បានបញ្ជាក់ដែរថា មានបុគ្គលិកមួយចំនួនស្នាក់នៅក្នុងក្លិប តែបានរត់ចេញរួចនៅពេលមានភ្លើងឆេះ តែពុំមានបុគ្គលិកណាម្នាក់គ្រោះថ្នាក់ទេ ខូចខាតតែសម្ភារៈប្រើប្រាស់ និងឧបករណ៏ភ្លេង ឬគ្រឿងក្នុងនានា ដែលមាននៅក្នុងក្លិប ។
យ៉ាងណាក្ដី ជុំវិញគ្រោះអគ្គិភ័យដ៏មហន្តរាយនេះ គេឃើញរថយន្តពន្លត់អគ្គិភ័យរបស់សមត្ថកិច្ចជាច្រើនគ្រឿង បានចេញជួយអន្តរាគមន៍។ មន្ត្រីជំនាញបានសម្រុកចូលបាញ់ពន្លត់ភ្លើងដល់ក្នុងក្លិប និងបាញ់ទប់ស្កាត់ផ្នែកខាងក្រៅរហូតបង្ក្រាបបាន១០០% ៕
ចែករំលែកព័តមាននេះ