ខេត្តមណ្ឌលគិរី ៖ កាលពីព្រឹកថ្ងៃទី២០ ខែវិច្ឆិកា ឆ្នាំ២០២៥ កន្លងទៅ ថ្នាក់ដឹកនាំសាលាដំបូង និងអយ្យការអមសាលាដំបូងខេត្តបានដឹកនាំកិច្ចប្រជុំមួយដើម្បីពង្រឹងសន្តិសុខ សណ្ដាប់ធ្នាប់ និងការធ្វើចំណាត់ថ្នាក់ជនជាប់ឃុំ…
ខេត្តមណ្ឌលគិរី ៖ កាលពីព្រឹកថ្ងៃទី២០ ខែវិច្ឆិកា ឆ្នាំ២០២៥ កន្លងទៅ ថ្នាក់ដឹកនាំសាលាដំបូង និងអយ្យការអមសាលាដំបូងខេត្តបានដឹកនាំកិច្ចប្រជុំមួយដើម្បីពង្រឹងសន្តិសុខ សណ្ដាប់ធ្នាប់ និងការធ្វើចំណាត់ថ្នាក់ជនជាប់ឃុំ ដែលប្រព្រឹត្តបទឧក្រិដ្ឋធ្ងន់ធ្ងរ ឬបទល្មើសដែលមានក្រុមចាត់តាំង ។
កិច្ចប្រជុំនេះ ដឹកនាំដោយឯកឧត្តម ម៉ម វ៉ាន់ដា ព្រះរាជអាជ្ញានៃអយ្យការអមសាលាដំបូងខេត្ត និងឯកឧត្តមថាន់ ឡេង ប្រធានសាលាដំបូងខេត្ត ។ កិច្ចប្រជុំនេះ ក៏មានការចូលរួមពីសំណាក់តំណាងកងកម្លាំងស្នងការដ្ឋាននគរបាលខេត្ត កងរាជអាវុធហត្ថខេត្ត ពន្ធនាគារខេត្ត ព្រមទាំងតំណាងមន្ទីរពាក់ព័ន្ធ ដូចជាមន្ទីរបរិស្ថាន និងខណ្ឌរដ្ឋបាលព្រៃឈើមណ្ឌលគិរីផងដែរ ។
ចំណុចពិភាក្សាគោលដៅមាន៧ចំណុច ដែលមានគោលដៅធានាសុវត្ថិភាព និងប្រសិទ្ធភាពនៃការអនុវត្តច្បាប់៖ ១-ពង្រឹងសន្តិសុខលើការបញ្ជូនជនជាប់ឃុំ ឬជនសង្ស័យមកកាន់សាលាដំបូង និងអយ្យការ ។ ២-បង្កើនកិច្ចសហប្រតិបត្តិការរវាងកងកម្លាំងនគរបាលកងរាជអាវុធហត្ថជាមួយពន្ធនាគារខេត្ត ។ ៣-រៀបចំទីកន្លែងសម្រាប់មន្ដ្រីរាជការ សាធារណជន និងអ្នកទទួលសេវាឱ្យមានរបៀបរៀបរយ ។ ៤-រៀបចំសណ្ដាប់ធ្នាប់ ក្នុងបរិវេណតុលាការសម្រាប់ការសួរចម្លើយ និងពេលសវនាការ ។
៥-ពង្រឹងសន្ដិសុខចេញចូលក្នុងបរិវេណសាលាដំបូង និងអយ្យការអមសាលាដំបូងខេត្ត ។ ៦-រៀបចំបញ្ជីធ្វើចំណាត់ថ្នាក់ជនជាប់ឃុំ ដែលប្រព្រឹត្តបទឧក្រិដ្ឋធ្ងន់ធ្ងរ ឬបទល្មើសមានក្រុមចាត់តាំង ។ ៧-ផ្លាស់ប្ដូរទិន្នន័យ តារាងចំណាត់ថ្នាក់ជនជាប់ឃុំធ្ងន់ធ្ងរ រវាងកងកម្លាំង និងពន្ធនាគារ ។
នៅចុងបញ្ចប់នៃកិច្ចប្រជុំ គណៈអធិបតីបានសម្ដែងនូវការកោតសរសើរ និងវាយតម្លៃខ្ពស់ ចំពោះការយកចិត្តទុកដាក់របស់ថ្នាក់ដឹកនាំ និងមន្ដ្រីក្រោមឱវាទទាំងអស់ ដែលបានអនុវត្តតួនាទី និងភារកិច្ចរបស់ខ្លួនបានយ៉ាងល្អប្រសើរ ៕
ចែករំលែកព័តមាននេះ