សង្គ្រាមអ៊ុយក្រែន ៖ មេបញ្ជាការកងទ័ពភាគខាងលិចរុស្ស៊ី ឧត្ដមសេនីយស័រហ្កេយគូហ្សូវីអេវរាយការណ៍ប្រាប់ដល់ប្រធានាធិបតីរុស្ស៊ី លោកវ្លាឌីមៀរពូទីនថា កងកម្លាំងរុស្ស៊ីបានបញ្ចប់ហើយ ការវាយរំដោះទីក្រុងគូពីយ៉ាន់ស្ក៍ពីអ៊ុយក្រែន ។ នេះបើតាមការអះអាងដោយទូរទស្សន៍រដ្ឋ។ ទីគ្រុងនោះ…
សង្គ្រាមអ៊ុយក្រែន ៖ មេបញ្ជាការកងទ័ពភាគខាងលិចរុស្ស៊ី ឧត្ដមសេនីយស័រហ្កេយគូហ្សូវីអេវរាយការណ៍ប្រាប់ដល់ប្រធានាធិបតីរុស្ស៊ី លោកវ្លាឌីមៀរពូទីនថា កងកម្លាំងរុស្ស៊ីបានបញ្ចប់ហើយ ការវាយរំដោះទីក្រុងគូពីយ៉ាន់ស្ក៍ពីអ៊ុយក្រែន ។ នេះបើតាមការអះអាងដោយទូរទស្សន៍រដ្ឋ។ ទីគ្រុងនោះ ជាក្រុងគន្លឹះមួយដែលអ៊ុយក្រែនខិតខំការពារយ៉ាងខ្លាំង។
ក្រុងគូពីយ៉ាន់ស្ក៍ដែលកាលមុនសង្គ្រាមមានប្រជាជន៥៥.០០០នាក់ ត្រូវកាន់កាប់អស់ពេលច្រើនខែកាលពីឆ្នាំ២០២២ ដោយកងទ័ពរុស្ស៊ី មុនពេលកងទ័ពអ៊ុយក្រែនវាយដណ្ដើមយកបានវិញកាលពីខែកញ្ញាឆ្នាំដដែលនោះ ។ នាយសេនាធិការកងទ័ពរុស្ស៊ី ឧត្ដមសេនីយវ៉ាឡឺរីហ្គេរ៉ាសស៊ីម៉ូវអះអាងថា ក្រៅពីវាយសម្រុកដណ្ដើមកាន់កាន់ទីក្រុងគូពីយ៉ាន់ស្ក៍ កងទ័ពរុស្ស៊ីក៏បន្តពង្រីកតំបន់ត្រួតត្រា ក្នុងតំបន់ឌីនីប្រូប៉េត្រូវស្ក៍និងតំបន់ហ្សាប៉ូរីហ្ស៊ីយ៉ាដែរ ។
ចំណែកសហរដ្ឋអាមេរិកពេលនេះ បានលើកពីផែនការសន្តិភាពមួយសម្រាប់អ៊ុយក្រែន ដោយឲ្យព្រមធ្វើសម្បទានដែនដីដែលរុស្ស៊ីកាន់កាប់ និងកម្រិតសមត្ថភាពយោធាអ៊ុយក្រែន ដែលនាំឲ្យក្រុងគៀវមានការព្រួយបារម្ភខ្លាំង ។ ផែនការសន្តិភាពនោះរបស់អាមេរិក ស្នើឲ្យទទួលសា្គល់តំបន់ដូណេតស្ក៍ តំបន់លូហ្គានស្ក៍និងតំបន់គ្រីមេថាជាដែនដីរុស្ស៊ី និងការកាត់ជ្រៀកតំបន់ឃ័រសុននិងតំបន់ហ្សាប៉ូរីហ្ស៊ីយ៉ា ទៅតាមខ្សែបន្ទាត់រណសិរ្សបច្ចុប្បន្ន ។
តាមអ្នកនាំពាក្យសេតវិមានលោកស្រីការ៉ូលីនលីវីតថា ក្រុងវ៉ាស៊ីនតោនបានពិគ្រោះជាមួយអ៊ុយក្រែនក៏ដូចជាមួយរុស្ស៊ី ដើម្បីរៀបរៀងផែនការនោះ ។ ផែនការកំណត់ជាពិសេសចំនួនយោធាអ៊ុយក្រែនច្រើនបំផុតត្រឹម៦០០.០០០នាក់ ហាមឃាត់ការដាក់ពង្រាយកងទ័ពអូតង់ក្នុងដែនដីអ៊ុយក្រែន និងគ្រោងវត្តមានកងយន្តហោះអឺរ៉ុបនៅប៉ូឡូញ។ ប៉ុន្តែប្រសិនបើរុស្ស៊ីលុកលុយអ៊ុយក្រែនជាថ្មីនោះនឹងត្រូវប្រឈមមុខ នឹងការឆ្លើយតបវិញខាងយោធា។ ផែនការនោះគ្រោងផងដែរថា អ៊ុយក្រែនត្រូវបោះបង់ចោលបណ្ដាអាវុធរយៈឆ្ងាយរបស់ខ្លួន។
ក្រុងវ៉ាស៊ីនតោន និងក្រុងមូស្គូធ្វើការជាសម្ងាត់លើផែនការនោះ ដើម្បីបញ្ចប់សង្គ្រាម។ វិមានក្រឹមឡាំងមិនទាន់ធ្វើអត្ថាធិប្បាយ លើព័ត៌មានទាំងនោះនៅឡើយ៕
ចែករំលែកព័តមាននេះ