ដោយសារបារី គ្រឿងស្រវឹង ទម្លាប់អង្គុយមិនសកម្មភាព ធាត់ របបអាហារ ដែលមានសាច់ក្រហមខ្ពស់ និងអាហារកែច្នៃ សុទ្ធតែជាកត្តាដែលរុញច្រានកំណើននៃជំងឺមហារីកឲ្យកើតឡើងដោយមិនដឹងខ្លួន ដែលយើងចាំបាច់ត្រូវតែត្រួតពិនិត្យសុខភាពជាប្រចាំ ។…
ដោយសារបារី គ្រឿងស្រវឹង ទម្លាប់អង្គុយមិនសកម្មភាព ធាត់ របបអាហារ ដែលមានសាច់ក្រហមខ្ពស់ និងអាហារកែច្នៃ សុទ្ធតែជាកត្តាដែលរុញច្រានកំណើននៃជំងឺមហារីកឲ្យកើតឡើងដោយមិនដឹងខ្លួន ដែលយើងចាំបាច់ត្រូវតែត្រួតពិនិត្យសុខភាពជាប្រចាំ ។
កត្តាខាងលើសុទ្ធសឹងតែជាកត្តលីករដែលអាចនឹងជំរុញឱ្យអត្រានៃជំងឺមហារីកផ្សេងៗដូចជាមហារីកពោះវៀនធំ មហារីកសុដន់ មហារីកថ្លើម មហារីកលំពែង និងមហារីកបំពង់អាហារកើនឡើងលឿន ដែលយើងគួរតែយកចិត្តទុកដាក់ ។
រឿងជំងឺមហារីកនេះជាបញ្ហាធ្ងន់ធ្ងរមួយ ។ សូម្បីតែតារាល្បីម្នាក់ ពោលគឺជាតារាសម្តែង តារាបង្ហាញម៉ូត និងជាពិធីករ គឺលោក អ៊ុន សិទ្ធា ក៏ទើបតែទទួលមរណៈភាពនៅក្នុងវ័យត្រឹម៤០ឆ្នាំ កាលពីថ្ងៃទី១៩ ខែវិច្ឆិកា ឆ្នាំ២០២៥ ថ្មីៗនេះ ដោយសារតែជំងឺមហារីកដំណាក់កាលចុងក្រោយ ។
លោក អ៊ុន សិទ្ធា ជាតារាមានឈ្មោះបោះសំឡេងល្បីល្បាញ ក្នុងពិភពសិល្បៈអស់រយៈពេលជាយូរឆ្នាំមកហើយ ដោយបានបន្សល់ទុកនូវស្នាដៃជាខ្សែភាពយន្ត ចម្រៀងខារ៉ាអូខេ និងការងារសិល្បៈជាច្រើនរាប់មិនអស់ ប៉ុន្តែមហារីកវាមិនស្គាល់តារា កុមារ អ្នកមាន អ្នកក្រ អ្នកនយោបាយអ្វីឡើយ ។
កាលពីខែឧសភាឆ្នាំ២០២៥កន្លងទៅថ្មីៗនេះ នៅពេលកម្ពុជាប្រកាសដាក់ឲ្យអនុវត្តជាផ្លូវការនូវ«ផែនការជាតិប្រយុទ្ធនឹងជំងឺមហារីក២០២៥-២០៣០»ទិន្នន័យសុខាភិបាលបង្ហាញថា កម្ពុជាមានមនុស្សម្នាក់ស្លាប់ដោយជំងឺមហារីកនៅរៀងរាល់៤០នាទីម្តង ឬប្រមាណ ៣៨នាក់ក្នុងមួយថ្ងៃៗ ។
នៅពេលនេះ ក្រសួងសុខាភិបាលបានអះអាងថា មធ្យោបាយប្រយុទ្ធនឹងជំងឺមហារីកនៅកម្ពុជានៅមានកម្រិតនៅឡើយ និងថា ជំងឺមហារីកនឹងឆក់យកជីវិតពលរដ្ឋខ្មែរក្នុងចំនួនមួយខ្ពស់ក្នុងរយៈពេល១៥ឆ្នាំខាងមុខ ។
ទិន្នន័យបង្ហាញថា កម្ពុជាមានអ្នកកើតជំងឺមហារីកថ្មីប្រមាណជា២ម៉ឺនករណី និងមានអ្នកស្លាប់ជិត១៤.០០០នាក់ ។ អត្រាអ្នកស្លាប់ដោយជំងឺមហារីកនេះ គឺខ្ពស់ជាង៧០ភាគរយ ខណៈអត្រាជាមធ្យមនៅលើពិភពលោក គឺមានតែ៤៨ភាគរយ។
ថ្មីៗនេះ លោកឈាង រ៉ា រដ្ឋមន្ត្រីក្រសួងសុខាភិបាល បានប្រាប់ក្រុមគ្រូពេទ្យឲ្យយកចិត្តទុកដាក់លើការព្យាបាលជំងឺមហារីក ដោយសង្កត់ធ្ងន់ថា ការវះកាត់ជាស្នូលមួយនៃការព្យាបាលជំងឺមហារីក ហើយក៏ជាដំណើរសង្គ្រោះជីវិតមនុស្ស ប្រកបដោយប្រសិទ្ធភាព។
ថ្លែងនៅក្នុងពេលបើកសន្និសីទសល្យសាស្ត្រកម្ពុជាប្រចាំឆ្នាំ លើកទី៣០ ក្រោមប្រធានបទ«ភាពប្រឈមនៃការវះកាត់ជំងឺមហារីក»កាលពីថ្ងៃទី១៥ ខែវិច្ឆិកា ឆ្នាំ២០២៥ លោក ឈាង រ៉ា បានអះអាងថា រាជរដ្ឋាភិបាលបានដាក់ការបេ្តជ្ញាចិត្តយ៉ាងមុតមាំ ក្នុងការប្រយុទ្ធនឹងជំងឺមហារីក ។
លោកបានអះអាងថា វេជ្ជបណ្ឌិត និងក្រុមគ្រូពេទ្យយកចិត្តទុកដាក់ខ្ពស់លើសេវាផ្នែកមហារីកនេះ ប្រកបដោយឧត្តមគតិ សមធម៌ និងក្រមសីលធម៌វិជ្ជាជីវៈ ហើយក៏ត្រូវពង្រឹងឱ្យកាន់តែប្រសើរឡើងនូវហេដ្ឋារចនាសម្ព័ន្ធបច្ចេកវិទ្យា ឧបករណ៍សម្ភារៈទំនើប ការបញ្ជូនចំគោលដៅនិងទាន់ពេលវេលា ការធ្វើរោគវិនិច្ឆ័យនិងព្យាបាលបានត្រឹមត្រូវ ។
លោក ឈាង រ៉ា បានបន្តទៀតថា គុណភាព និងសុវត្ថិភាពនៃការព្យាបាល ក៏ត្រូវមាន
ស្តង់ដាត្រឹមត្រូវ ហើយត្រូវពង្រីកការព្យាបាលតាមមន្ទីរពេទ្យគ្រប់កម្រិត និងពង្រឹងការ
បណ្តុះបណ្តាល ប្រព័ន្ធការកត់ត្រាព័ត៌មាន ។ លោកបានលើកឡើងថា គ្រូពេទ្យវះកាត់ទាំងអស់ ត្រូវខិតខំរៀនសូត្រ ហ្វឹកហាត់ការងារជាប់ជាប្រចាំ និងមានសាមគ្គីភាព និងសហការគ្នា។
លោកបានបញ្ជាក់ថា ជោគជ័យនៃការវះកាត់ គឺលទ្ធផលចុងក្រោយ ដែលអ្នកជំងឺជាសះស្បើយតាមពេលវេលាសមស្របជាមួយសុវត្ថិភាព គុណភាពនៃជីវិតល្អប្រសើរ ។ ដូច្នេះ ត្រូវគិតគូឱ្យបានសព្វគ្រប់ទាំង មុនពេលវះកាត់ ពេលកំពុងវះកាត់ និងក្រោយពេលវះកាត់។ លោកបានបន្ថែមថា ការវះកាត់ដែលមានសុវត្ថិភាពខ្ពស់ និងតម្លៃសមស្រប គឺជាគោលនយោបាយមួយសំខាន់របស់WHO និងក្រសួងសុខាភិបាល និងរាជរដ្ឋាភិបាល។ សុវត្ថិភាព និងតម្លៃសមស្រប ដោយមិនមានការលំបាកផ្នែកហិរញ្ញវត្ថុ គឺជាការចូលរួមសម្រេចបាននូវផែនទីបង្ហាញផ្លូវ ឆ្ពោះទៅការគ្របដណ្តប់សុខភាពជាសកល ។
សរុបទៅ ជំងឺមហារីកនៅកម្ពុជា នៅតែជាបញ្ហាសុខាភិបាលដ៏ធ្ងន់ធ្ងរ ដែលត្រូវការការយកចិត្តទុកដាក់ពីប្រជាពលរដ្ឋ និងភាពតស៊ូមុតមាំពីវិស័យសុខាភិបាល ដើម្បីកាត់បន្ថយអត្រាកើតជំងឺ និងស្លាប់ក្នុងពេលអនាគត ។
មហារីកជាជំងឺដ៏គ្រោះថ្នាក់ និងកំពុងមានការកើនឡើងរហ័ស ហើយមូលហេតុចម្បងគឺបណ្តាលមកពីរបៀបរស់នៅមិនល្អដូចជា ការជក់បារី ប្រើប្រាស់គ្រឿងស្រវឹង ទម្លាប់នៃការអង្គុយមិនសកម្ម ភាពធាត់ និងរបបអាហារមិនមានសមស្រប។ កត្តាទាំងនេះ ជួយបណ្តាលឱ្យកើតមហារីកផ្សេងៗដូចជា មហារីកពោះវៀនធំ សុដន់ ថ្លើម លំពែង និងបំពង់អាហារ។ល។
ដោយឡែក ករណីស្លាប់របស់តារាល្បី អ៊ុន សិទ្ធា ត្រូវបានលើកឡើងជាឧទាហរណ៍បញ្ជាក់ថា មហារីកអាចប៉ះពាល់ដល់គ្រប់គ្នា មិនថា អ្នកមាន ឬតារាល្បីក៏ដោយ។ ទិន្នន័យសុខាភិបាលកម្ពុជាបង្ហាញថា ចំនួនអ្នកស្លាប់ដោយជំងឺមហារីកខ្ពស់ ។ យើងចាំបាច់ត្រូវយកចិត្តទុកដាក់ ហើយយកល្អ គួរតែទម្លាប់ត្រួតពិនិត្យសុខភាពជាប្រចាំឲ្យបានទៀងទាត់ ពីព្រោះជំងឺមហារីកមួយចំនួនអាចព្យាបាលបាន បើក្រុមគ្រូពេទ្យរកឃើញវានៅដំណាក់កាលដំបូង។
ចែករំលែកព័តមាននេះ