ជម្រះទោសអតីតឧកញ៉ា ហេង សិទ្ធី ២សំណុំរឿង ប្រកាសទោសថ្ងៃក្រោយ
- ភ្នំពេញ
រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី២០ ខែវិច្ឆិកា ឆ្នាំ២០២៥ បានលើកយកសំណុំរឿងអតីតឧកញ៉ា ហេង សិទ្ធី មកបើកសវនាការជំនុំជម្រះទោសជាសាធារណៈ…
រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី២០ ខែវិច្ឆិកា ឆ្នាំ២០២៥ បានលើកយកសំណុំរឿងអតីតឧកញ៉ា ហេង សិទ្ធី មកបើកសវនាការជំនុំជម្រះទោសជាសាធារណៈ ពាក់ព័ន្ធនឹងបទល្មើស២សំណុំរឿង ៖
១-សំណុំរឿងលេខ ៥០៦៩ ចុះថ្ងៃទី២៨ ខែសីហា ឆ្នាំ២០២៥ ពីបទហិង្សាដោយចេតនា ។
២-សំណុំរឿងលេខ ៧៦៣៧ ចុះថ្ងៃទី២១ ខែវិច្ឆិកា ឆ្នាំ២០២៤ ពីបទគំរាមកំហែងហែកកេរ្តិ៍។
សំណុំរឿងទាំង២នេះ គឺមានលោក ញឹម ពិសាល ជាប្រធានប្រឹក្សាជំនុំជម្រះ និងលោក សេង ហៀង ព្រះរាជអាជ្ញារង តំណាងអយ្យការអមសាលាដំបូងរាជធានីភ្នំពេញ ចំពោះមុខជនត្រូវចោទ និងមេធាវីការពារសិទ្ធិឲ្យភាគីទាំងសងខាង ។
សវនាការបានសាកសួរដេញដោលស្របតាមនីតិវិធី រហូតដល់ទីបញ្ចប់ ទើបប្រធានក្រុមប្រឹ
ក្សាជំនុំជម្រះ សម្រេចលើកពេលប្រកាសសាលក្រមទៅថ្ងៃក្រោយ ដោយមិនកំណត់ ។ សូមជម្រាបថា សំណុំរឿងទី១ ការចោទប្រកាន់បទហិង្សាដោយចេតនា បើតាមអង្គហេតុ ជនត្រូវចោទឈ្មោះ ហេង សិទ្ធី បានប្រព្រឹត្តបទល្មើសយកវត្ថុរឹង(ម្ជុលធ្វើតេស្តទឹកនោម) ចាក់ជនជាប់ឃុំនៅក្នុងពន្ធនាគារជាមួយគ្នា ។ ប៉ុន្តែចម្លើយនៅចំពោះមុខតុលាការបានផ្ទុយមកវិញថា ជាការប្រឡែងគ្នាលេងមិនមែនជាការប្រព្រឹត្តបទល្មើសដូចការចោទប្រកាន់ទេ ។
ប៉ុន្តែទោះជាចម្លើយដោះបន្ទុករបស់ជនត្រូវចោទយ៉ាងណាក្តី ការសម្រេចសេចក្តីនិងការវិនិច្ឆយទោស អាស្រ័យទៅលើភ័ស្តុតាង សាក្សី អង្គហេតុ និងអង្គច្បាប់របស់តុលាការជាអ្នកកាត់ក្តី ។ សំណុំរឿងទី២ ហាក់ដូចមិនចម្លែកទេ ជាប់ចោទពីបទគំរាមកំហែងហែកកេរ្តិ៍ អង្គហេតុដែលផ្តើមចេញពីការងារក្រុមហ៊ុនរកស៊ីជាមួយគ្នា លុះពេលបែកបាក់គ្នា តែងតែមានបញ្ហារកាំរកូសប្រើពាក្យសម្ដីធ្ងន់ស្រាលទៅមកជាមិនខាន ។ បទល្មើសនេះ ក៏ត្រូវរង់ចាំការកាត់ក្តីពីតុលាការដែរ ។
គួររំឭកថា កាលពីរសៀលថ្ងៃទី២៥ ខែឧសភា ឆ្នាំ២០២៥ លោកស្រី យី សុខវួច ចៅក្រម
ស៊ើបសួរសាលាដំបូងរាជធានីភ្នំពេញ បានចេញដីកាសម្រេចឃុំខ្លួនអតីតឧកញ៉ា ហេង សិទ្ធី ដាក់ពន្ធនាគារ«ម១»ព្រៃស ជាបណ្តោះអាសន្ន ។ តាមដីកាបង្គាប់ឲ្យឃុំខ្លួនរបស់លោកស្រីចៅក្រមស៊ើបសួរ បានបញ្ជាក់ថា បានឃើញសំណុំរឿងស៊ើបសួរលេខ៥៥៥៩ ចុះថ្ងៃទី២ ខែធ្នូ ឆ្នាំ២០២៤ ដែលទាក់ទងនឹងឈ្មោះ ហេង សិទ្ធី ភេទប្រុស កើតថ្ងៃទី២៦ ឆ្នាំ១៩៨៩ មុខរបរពាណិជ្ជករ ទីលំនៅមុនពេលឃាត់ខ្លួន នៅផ្ទះលេខ៦២LM ផ្លូវលេខ២០៥ ភូមិ៤ សង្កាត់ទំនប់ទឹក ខណ្ឌបឹងកេងកង រាជធានីភ្នំពេញ ប្រពន្ធ(លែងលះ) មានកូន៤នាក់ ។
ជននេះត្រូវបានដាក់ឲ្យស្ថិតនៅក្រោមការពិនិត្យពីបទគំរាមកំហែងហែកកេរ្តិ៍ ស្ថានទម្ងន់ទោស ប្រព្រឹត្តនៅប្រទេសកម្ពុជា ក្នុងខែវិច្ឆិកា ឆ្នាំ២០២៤ បទល្មើសព្រហ្មទណ្ឌដែលមានចែងឲ្យផ្តន្ទាទោសតាមបញ្ញត្តិមាត្រា៣៧២ និងមាត្រា ៣៧៤ នៃក្រមព្រហ្មទណ្ឌ ។ អតីតឧកញ៉ា ហេង សិទ្ធី ត្រូវបានសមត្ថកិច្ចនគរបាលជាតិនៃប្រទេសកម្ពុជា សហការជាមួយអាជ្ញាធរនៃប្រទេសរុស្ស៊ី នាំខ្លួនពីប្រទេសរុស្ស៊ី តាមដីការបស់ចៅក្រមស៊ើបសួរសាលាដំបូងរាជធានីភ្នំពេញ ដោយនាំយកទៅឃុំខ្លួនជាបណ្តោះអាសន្ន ដើម្បីបើកការស៊ើបអង្កេតលើការចោទប្រកាន់នោះ ៕
ចែករំលែកព័តមាននេះ