ឃា.ត.ករ.ឈាមក្ដៅ ប្រឈមមុខដេកគុកអស់១ជីវិត
- កំពង់ធំ
ខេត្តកំពង់ធំ ៖ សាលាដំបូងខេត្ត កាលពីថ្ងៃទី១៧ ខែវិច្ឆិកា ឆ្នាំ២០២៥ កន្លងទៅ បានចេញសេចក្ដីប្រកាសព័ត៌មានស្តីពីចំណាត់ការលើសំណុំរឿងព្រហ្មទណ្ឌ ពាក់ព័ន្ធនឹងបទល្មើស «ឃាតកម្មគិតទុកជាមុន…
ខេត្តកំពង់ធំ ៖ សាលាដំបូងខេត្ត កាលពីថ្ងៃទី១៧ ខែវិច្ឆិកា ឆ្នាំ២០២៥ កន្លងទៅ បានចេញសេចក្ដីប្រកាសព័ត៌មានស្តីពីចំណាត់ការលើសំណុំរឿងព្រហ្មទណ្ឌ ពាក់ព័ន្ធនឹងបទល្មើស «ឃាតកម្មគិតទុកជាមុន ប៉ះពាល់បូរណភាពសពជនរងគ្រោះ និងពីបទលួច» ដោយបានចេញដីកាបង្គាប់ឲ្យឃុំខ្លួនជនដៃដល់ដាក់ពន្ធនាគារជាបណ្តោះអាសន្ន ។
អ្នកនាំពាក្យសាលាដំបូង និងអយ្យការអមសាលាដំបូងខេត្ត បានជម្រាបជូនសាធារណជនថា នាថ្ងៃទី១៦ ខែវិច្ឆិកា ឆ្នាំ២០២៥ ស្នងការដ្ឋាននគរបាលខេត្ត ដោយមានកិច្ចសហការជាមួយនគរបាលនៃនាយកដ្ឋានព្រហ្មទណ្ឌ និងស្នងការដ្ឋាននគរបាលរាជធានី-ខេត្ត បានចាប់ឃាត់ខ្លួនជនឈ្មោះ ម៉ន សីហា ភេទប្រុស អាយុ១៩ឆ្នាំ ដែលបានចាក់សម្លាប់ឈ្មោះ ហ៊ឹម ទីណា ភេទស្រី អាយុ២២ឆ្នាំ កាលពីថ្ងៃទី១៣ ខែវិច្ឆិកា ឆ្នាំ២០២៥ នៅភូមិក្រូច ឃុំស្វាយភ្លើង ស្រុកតាំងគោក ខេត្តកំពង់ធំ ពីខេត្តប៉ៃលិន ហើយសមត្ថកិច្ចក៏បានបញ្ជូនមកស្នងការដ្ឋាននគរបាលខេត្តកំពង់ធំ ដើម្បីចាត់ការតាមនីតិវិធី ។
នៅថ្ងៃទី១៧ ខែវិច្ឆិកា ឆ្នាំ២០២៥ អយ្យការអមសាលាដំបូងខេត្តបានទទួលចាត់ការលើសំណុំរឿងព្រហ្មទណ្ឌលេខ១១៤៨ ចុះថ្ងៃទី១៧ ខែវិច្ឆិកា ឆ្នាំ២០២៥ ពាក់ព័ន្ធនឹងករណីឃាតកម្មគិតទុកជាមុន ប៉ះពាល់បូរណភាពនៃសព និងបទលួចដែលមានជនត្រូវចោទឈ្មោះ ម៉ន សីហា ភេទប្រុស អាយុ១៩ឆ្នាំ ត្រូវបានតំណាង អយ្យការចោទប្រកាន់តាម
រយៈដីកាសន្និដ្ឋានបញ្ចូនរឿងឱ្យស៊ើបសួរលេខ ៦៦៤ អ.ក/២០២៥ ចុះថ្ងៃទី១៧ ខែវិច្ឆិកា ឆ្នាំ២០២៥ ទៅចៅក្រមស៊ើបសួរ នៃសាលាដំបូងខេត្តកំពង់ធំ ។
បន្ទាប់ពីបានសួរចម្លើយជនត្រូវចោទ និងពិនិត្យទៅលើភស្តុតាងនានាដែលមានក្នុងសំណុំរឿងចៅក្រមស៊ើបសួរនៃសាលាដំបូងខេត្ត បានសម្រេចឃុំខ្លួនបណ្តោះអាសន្នជនត្រូវចោទខាងលើ ដោយដាក់ឱ្យស្ថិតក្រោមការពិនិត្យពីបទ «ឃាតកម្មគិតទុកជាមុន ប៉ះពាល់បូរណភាពនៃសព និងបទលួច» បទល្មើសដែលមានបញ្ញត្តិឱ្យផ្តន្ទាទោសតាមមាត្រា២០០ មាត្រា២៦១មាត្រា៣៥៣ និងមាត្រា៣៥៦ នៃក្រមព្រហ្មទណ្ឌ ប្រព្រឹត្តនៅភូមិក្រូច ឃុំស្វាយភ្លើង ស្រុកតាំងគោក ខេត្តកំពង់ធំ កាលពីថ្ងៃទី១៣ ខែវិច្ឆិកា ឆ្នាំ២០២៥ ។
យោងតាមមាត្រា២០០ គឺជនត្រូវចោទប្រឈមនឹងការជាប់គុកអស់មួយជីវិត ។ បច្ចុប្បន្ន ជនត្រូវចោទខាងលើ ត្រូវបានឃុំខ្លួនបណ្តោះអាសន្ននៅពន្ធនាគារខេត្ត ដើម្បីរង់ចាំបន្តចំណាត់ការតាមនីតិវិធីដោយហេតុថា អំពើល្មើសខាងលើនេះ ជាបទឧក្រិដ្ឋធ្ងន់ធ្ងរបំផុត ដែលតុលាការត្រូវអនុវត្តច្បាប់ឱ្យបានម៉ឺងម៉ាត់ និងហ្មត់ចត់បំផុត ៕
ចែករំលែកព័តមាននេះ