ខេត្តកំពង់ចាម-ត្បូងឃ្មុំ ៖ រថយន្តមួយគ្រឿងម៉ាកហាយឡែនឌ័រ សង្ស័យច្រឡំផ្លូវ បានបើកជ្រុលចង្កូត បណ្ដាលឲ្យធ្លាក់ច្រាំងទន្លេក្រឡាប់បះជើងទ្រមេឃ សំណាងណាស់មនុស្ស៤នាក់ជិះក្នុងនោះមិនមានអ្នករងរបួស ។ ហេតុការណ៍នេះបានកើតឡើងនៅវេលាម៉ោង៨យប់ថ្ងៃទី១៦ វិច្ឆិកា…
ខេត្តកំពង់ចាម-ត្បូងឃ្មុំ ៖ រថយន្តមួយគ្រឿងម៉ាកហាយឡែនឌ័រ សង្ស័យច្រឡំផ្លូវ បានបើកជ្រុលចង្កូត បណ្ដាលឲ្យធ្លាក់ច្រាំងទន្លេក្រឡាប់បះជើងទ្រមេឃ សំណាងណាស់មនុស្ស៤នាក់ជិះក្នុងនោះមិនមានអ្នករងរបួស ។ ហេតុការណ៍នេះបានកើតឡើងនៅវេលាម៉ោង៨យប់ថ្ងៃទី១៦ វិច្ឆិកា ឆ្នាំ២០២៥ នៅចំណុចកំពុងដចាស់កោះពីរ ឃុំកោះ២ ស្រុកក្រូចឆ្មារ ត្រូវឆ្លងមកកំពុងដរមាន់ហើរ ឃុំហាន់ជ័យ ស្រុកកំពង់សៀម ខេត្តកំពង់ចាម ។
សមត្ថកិច្ចមូលដ្ឋានបានប្រាប់ឲ្យដឹងនារសៀលថ្ងៃទី១៧ វិច្ឆិកា ឆ្នាំ២០២៥ថា រថយន្តមួយគ្រឿងខាងលើម៉ាកហាយឡែនឌ័រ បើកបរដោយឈ្មោះណាន វិបុល ភេទប្រុស អាយុប្រហែល៣០ឆ្នាំ នៅគីឡូលេខ៤៤ ឃុំកំពាន់ស្រុកមេមត់ ខេត្តត្បូងឃ្មុំ និងមានអ្នករួមដំណើរចំនួន៣នាក់ បូករួមទាំងអ្នកបើកបរសរុបចំនួន៤នាក់ ក្នុងនោះស្រីពីរនាក់ ។
សមត្ថកិច្ចបានបន្តថា មុនកើតហេតុ រថយន្តម៉ាកហាយឡេនឌ័រមួយគ្រឿងនេះបានបើកបរឆ្លងកំពង់ចម្លងមាន់ហើរ ឆ្ពោះមកចូលរួមមង្គលការសាច់ញាតិនៅភូមិបីពៃ ឃុំកោះពី ស្រុកក្រូចឆ្មារ ដែលកោះនេះហ៊ុមព័ទ្ធទៅដោយទឹកទន្លេក្នុងរដូវវស្សា ដោយឆ្លងតាមកាណូតមួយគ្រឿង។
សមត្ថកិច្ចមូលដ្ឋានបានបន្តឲ្យដឹងទៀតថា ក្រោយពីហូបការរួច រថយន្តខាងលើបានធ្វើដំណើរក្នុងទិសដៅពីកើតមកលិច លុះមកដល់ចំណុចកើតហេតុ រថយន្តក៏បានជ្រុលចង្កូតធ្លាក់ច្រាំងទន្លេ បណ្តាលឱ្យរថយន្តក្រឡាប់បះជើងទ្រមេឃ ប៊ិះធ្លាក់ចូលទឹកទន្លេ កុំតែបានបាវខ្សាច់យក្សទប់ពីក្រោម ទើបមិនមានគ្រោះថ្នាក់ ។ បើសិនរថយន្តនេះក្រឡាប់មួយជុំទៀតនឹងធ្លាក់ចូលទឹកទន្លេ ហើយមនុស្សជិះក្នុងរថយន្តអាចនឹងគ្រោះថ្នាក់ជាក់ជាពុំខានឡើយ ព្រោះហេតុការណ៍នេះបានកើតឡើងនៅវេលាម៉ោង៨យប់ថ្ងៃទី១៦ វិច្ឆិកា ឆ្នាំ២០២៥ ជាកន្លែងស្ងាត់ ហើយនៅចំណុចមាត់ទន្លេនេះមិនមានផ្ទះប្រជាពលរដ្ឋនោះទេ។
សមត្ថកិច្ចបានបញ្ជាក់ថា ក្រោយពីហេតុការណ៍នេះ មនុស្សដែលជិះនៅក្នុងរថយន្តបានព្យាយាមបើកទ្វាររថយន្តចេញមកក្រៅទូរសព្ទប្រាប់ទៅសាច់ញាតិ បន្ទាប់មកក៏បានដឹងដល់សមត្ថកិច្ចចុះទៅពិនិត្យមើលទាំងយប់ ។ ចំពោះរថយន្តក្រឡាប់នេះម្ចាស់និងឱ្យសាឡាងមកស្ទូចយកទៅជួសជុលនៅរសៀលថ្ងៃទី១៧វិច្ឆិកា ។
សមត្ថកិច្ចបានលើកហេតុផលថាពេលល្ងាចម្ចាស់រថយន្តនេះបើកតាមផ្លូវថ្មីដែលជាកំពង់ចម្លង តែដល់ពេលយប់អាចអ្នកបើកបរច្រឡំផ្លូវ ទើបបណ្ដាលឱ្យជួបហេតុការណ៍បែបនេះតែម្ដង។
សូមបញ្ជាក់ថាចំណុចកំពុងដល់កោះពីចាស់នេះត្រូវបានទឹកទន្លេមេគង្គហូបាក់ហើយត្រូវបានថ្នាក់ដឹកនាំខេត្តយកចិត្តទុកដាក់រៀបចំបើកខ្សាច់យក្សទប់កុំឲ្យបានដោយចំណាយប្រាក់អស់ជាង៣ម៉ឺនដុល្លារ ៕
ចែករំលែកព័តមាននេះ