ប្រទេសបារាំង ៖ ប្រធានាធិបតីបារាំងលោកអេមម៉ានុយអែលម៉ាក្រុងប្រកាសនាថ្ងៃទី១២វិច្ឆិកានៅក្រុងទូលូថា លោកមានបំណងចំណាយប្រាក់មិនតិចជាង៤,២ពាន់លានអឺរ៉ូថែមទៀត លើការអភិវឌ្ឍអវកាសយោធារហូតដល់ឆ្នាំ២០៣០ ក្នុងក្របខណ្ឌនៃការធ្វើបច្ចុប្បន្នភាពច្បាប់ស្ដីពីកម្មវិធីយោធា ដោយលោកវាយតម្លៃថា សង្គ្រាមនាពេលខាងមុខនឹងចាប់ផ្ដើមក្នុងទីអវកាស។
ប្រធានាធិបតីបារាំងក៏ចង់អភិវឌ្ឍអនាគតប្រព័ន្ធមីស៊ីលអវកាស ដើម្បីប្រឈមមុខជាមួយ ការប្រកួតប្រជែងពិភពទាំងផ្នែកស៊ីវិលទាំងផ្នែកយោធានៅទីអវកាស។ ទីអវកាសចុងក្រោយក្លាយជាយុទ្ធសាស្ត្រហើយត្រូវការពារ រួចបារាំងក៏រៀបចំខ្លួនសម្រាប់សង្គ្រាមអវកាសដែរ។ កម្មវិធីមួយមានឈ្មោះថាARES គឺសំដៅឲ្យកងទ័ពបារាំងមានសមត្ថភាពត្រួតពិនិត្យនិងការពារក្នុងទីអវកាស ពេលដែលក្រុមហ៊ុនអវកាសARIANEGROUP បង្កើតប្រព័ន្ធត្រួតពិនិត្យផ្កាយរណប ពីដែនដីដែលប្រព័ន្ធនោះមានឈ្មោះថា HELIX ។ គោលដៅនៃកម្មវិធីARESគឹការពារបណ្ដាផ្កាយរណបយោធាប្រឈមមុខនឹងការគំរាមកំហែងកាន់តែខ្លាំងក្នុងទីអវកាស។
យុទ្ធសាស្ត្រអវកាសរបស់បារាំងត្រូវបានកំណត់ ចាប់តាំងពីឆ្នាំ២០១៩មក ហើយបណ្ដាកម្មវិធីត្រួតពិនិត្យអវកាសក្នុងគោលដៅយាធា ត្រូវបានជម្រុញចាប់តាំងពីសង្គ្រាមនៅអ៊ុយក្រែនមកដែលបង្ហាញថា ជម្លោះក្នុងសម័យទំនើបក៏ទាក់ទិននឹងទីអវកាសដែរតាមរយៈការរំខានផ្កាយរណបគមនាគមន៍ឬសកម្មភាពវាយប្រហារ ដោយប្រព័ន្ធបច្ចេកវិទ្យា៕
ចែករំលែកព័តមាននេះ