វឌ្ឍនភាពនៃការសាងសង់គម្រោងវារីអគ្គិសនីស្ទឹងមេទឹក អានុភាព១៥០មេហ្កាវ៉ាត់
- ពោធិ៍សាត់
ខេត្តពោធិ៍សាត់ ៖ កាលពីថ្ងៃទី១១ ខែវិច្ឆិកា ឆ្នាំ២០២៥កន្លងទៅ ឯកឧត្តម ខូយ រីដា អភិបាលខេត្ត បានដឹកនាំមន្ត្រីពាក់ព័ន្ធ…
ខេត្តពោធិ៍សាត់ ៖ កាលពីថ្ងៃទី១១ ខែវិច្ឆិកា ឆ្នាំ២០២៥កន្លងទៅ ឯកឧត្តម ខូយ រីដា អភិបាលខេត្ត បានដឹកនាំមន្ត្រីពាក់ព័ន្ធ រួមនឹងអាជ្ញាធរស្រុកវាលវែង ចុះពិនិត្យការដ្ឋានសាងសង់គម្រោងទំនប់វារីអគ្គិសនីស្ទឹងមេទឹក ស្ថិតក្នុងឃុំថ្មដា ស្រុកវាលវែង ។
គម្រោងវារីអគ្គិសនីស្ទឹងមេទឹកមានអានុភាព១៥០មេហ្កាវ៉ាត់ ប្រើទុនវិនិយោគប្រមាណ៤០០
លានដុល្លារ ដោយក្រុមហ៊ុនមួយដែលមានទីតាំងស្ថិតនៅក្នុង្ត្រ ឃុំថ្មដា ស្រុកវាលវែងខេត្តពោធិ៍សាត់ និងឃុំប៉ាក់ខ្លង ស្រុកមណ្ឌលសីមា ខេត្តកោះកុង ។
គម្រោងវារីអគ្គិសនីស្ទឹងមេទឹកនេះ គឺមានទំនប់វារីអគ្គិសនីចំនួន៣រួមបញ្ជូលគ្នា ដែលទំនប់វារីអគ្គិសនីទី១ មានអានុភាព៥៧មេហ្កាវ៉ាត់ ស្ថិតក្នុងឃុំថ្មដា ស្រុកវាលវែង ខេត្តពោធិ៍សាត់ហើយទំនប់វារីអគ្គិសនីទី២ មានអានុភាព៥៣មេហ្កាវ៉ាត់ និងទំនប់វារីអគ្គិសនីទី៣ មានអានុភាព៤០មេហ្កាវ៉ាត់ ស្ថិតក្នុងឃុំប៉ាក់ខ្លង ស្រុកមណ្ឌលសីមា ខេត្តកោះកុង ។
ក្នុងគម្រោងវារីអគ្គិសនីស្ទឹងមេទឹកនេះ ក៏មានអាងស្តុកទឹកចំនួន៣ផងដែរ នៅតាមទំនប់វារីអគ្គិសនីទាំង៣ ដែលគ្របដណ្តប់លើផ្ទៃដីទំហំ២៥៧៦ហិកតា ក្នុងខេត្តពោធិ៍សាត់ និង ៨៧២ហិកតាទៀត ក្នុងខេត្តកោះកុង ។
ក្នុងឱកាសនោះ ឯកឧត្តម ខូយ រីដា បានមានប្រសាសន៍ថា ក្រោមម្លប់នៃសន្តិភាព និងក្រោមការដឹកនាំដ៏ត្រឹមត្រូវរបស់រាជរដ្ឋាភិបាលសមិទ្ធផលតូចធំលើគ្រប់វិស័យបាន និងកំពុងលេចវត្តមានជាបន្តបន្ទាប់ ។
ជាក់ស្តែង គម្រោងទំនប់វារីអគ្គិសនីស្ទឹងមេទឹកនេះ ក្រោយពេលស្ថាបនារួចរាល់នឹងផ្តល់អត្ថប្រយោជន៍ផលិតបានថាមពលអគ្គិសនីជាទំនប់ជួយកាត់បន្ថយគ្រោះទឹកជំនន់ ហើយក៏មានសក្តានុពលទាក់ទាញទេសចរទៅថ្ងៃអនាគតផងដែរ ។ អត្ថប្រយោជន៍ទាំងនេះ នឹងចូលរួមចំណែកជួយជំរុញផ្នែកសេដ្ឋកិច្ច-សង្គម និងប្រជាជនកម្ពុជា ៕
ចែករំលែកព័តមាននេះ