ខេត្តមណ្ឌលគិរី ៖ ស្ថានភាពអាកាសធាតុប្រែប្រួល ដោយសារឥទ្ធិពលភ្លៀងធ្លាក់បន្តបន្ទាប់ នៅសប្តាហ៍ទី១ នៃខែវិច្ឆិកា ឆ្នាំ២០២៥នេះ បានបន្សល់ទុកនូវបញ្ហាខូចខាតមួយចំនួនលើហេដ្ឋារចនាសម្ព័ន្ធផ្លូវជាតិ និងស្ពាន នៅក្នុងភូមិសាស្ត្រខេត្តមណ្ឌលគិរី…
ខេត្តមណ្ឌលគិរី ៖ ស្ថានភាពអាកាសធាតុប្រែប្រួល ដោយសារឥទ្ធិពលភ្លៀងធ្លាក់បន្តបន្ទាប់ នៅសប្តាហ៍ទី១ នៃខែវិច្ឆិកា ឆ្នាំ២០២៥នេះ បានបន្សល់ទុកនូវបញ្ហាខូចខាតមួយចំនួនលើហេដ្ឋារចនាសម្ព័ន្ធផ្លូវជាតិ និងស្ពាន នៅក្នុងភូមិសាស្ត្រខេត្តមណ្ឌលគិរី ។
ជាក់ស្ដែង នារសៀលថ្ងៃទី១១ ខែវិច្ឆិកា ឆ្នាំ២០២៥នេះ លោក រស់ គីមធន ប្រធានមន្ទីរសាធារណការ និងដឹកជញ្ជូនខេត្តមណ្ឌលគិរី បានដឹកនាំក្រុមការងារជំនាញចុះពិនិត្យដោយផ្ទាល់ នូវការខូចខាតដែលបង្កឡើងដោយទឹកភ្លៀង នៅចំណុច ស្ពានដើមបេង ។ ស្ពានដើមបេង គឺជាខ្សែផ្លូវដ៏សំខាន់សម្រាប់តភ្ជាប់ពីក្រុងសែនមនោរម្យ ឆ្ពោះទៅកាន់តំបន់ទេសចរណ៍ដ៏ល្បីល្បាញ ទឹកជ្រោះប៊ូស្រា។ ក្រោយការចុះពិនិត្យ ក្រុមការងារបានវាយតម្លៃថា ការខូចខាតដោយទឹកហូរច្រោះនេះ មិនបានបង្កផលប៉ះពាល់ធ្ងន់ធ្ងរ ដល់ដំណើរការចរាចរណ៍ទូទៅរបស់ប្រជាពលរដ្ឋ និងភ្ញៀវទេសចរឡើយ ។
លោកប្រធានមន្ទីរ បានបញ្ជាក់ថា មន្ត្រីជំនាញនឹងធ្វើការជួសជុល និងស្តារឡើងវិញឲ្យបានឆាប់រហ័សបំផុត ដើម្បីធានាបាននូវគុណភាពផ្លូវ និងសុវត្ថិភាពខ្ពស់បំផុតជូនបងប្អូនប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ ក្នុងការធ្វើដំណើរឆ្លងកាត់តំបន់នេះ ៕
ចែករំលែកព័តមាននេះ