ទីក្រុងម៉ានីល ៖ ប្រធានាធិបតីហ្វីលីពីន លោក Ferdinand Marcos Jr. បានកំណត់គោលការណ៍ណែនាំស្តីពីការផ្លាស់ប្តូរពន្ធគយដែលបានគ្រោងទុក សម្រាប់ការនាំចូលអង្ករមកកាន់ប្រទេសហ្វីលីពីន ដែលជាប្រទេសនាំចូលធំជាងគេរបស់ពិភពលោក…
ទីក្រុងម៉ានីល ៖ ប្រធានាធិបតីហ្វីលីពីន លោក Ferdinand Marcos Jr. បានកំណត់គោលការណ៍ណែនាំស្តីពីការផ្លាស់ប្តូរពន្ធគយដែលបានគ្រោងទុក សម្រាប់ការនាំចូលអង្ករមកកាន់ប្រទេសហ្វីលីពីន ដែលជាប្រទេសនាំចូលធំជាងគេរបស់ពិភពលោក ដោយអនុវត្តក្របខ័ណ្ឌដែលអាចបត់បែនបានពី ១៥% ទៅ ៣៥% ចាប់ពីឆ្នាំ ២០២៦។
នៅក្នុងបទបញ្ជាប្រតិបត្តិ ដែលបានចេញនៅថ្ងៃទី៩ ខែវិច្ឆិកា ឆ្នាំ២០២៥ លោក Marcos បានឱ្យដឹងថា ការកែតម្រូវពន្ធគយដោយផ្អែកលើការប្រែប្រួលនៃតម្លៃទីផ្សារអង្ករពិភពលោក នឹងចូលជាធរមាននៅថ្ងៃទី១ ខែមករា ឆ្នាំ២០២៦ បន្ទាប់ពីប្រទេសមួយនេះ បានដំឡើងពន្ធគយនាំចូលអង្ករដល់ ១៥% រហូតដល់ចុងឆ្នាំ២០២៥។
យោងតាមបទបញ្ជានេះ ពន្ធគយនាំចូលនឹងត្រូវបង្កើន ៥% សម្រាប់រាល់ការធ្លាក់ចុះ ៥% នៃតម្លៃអង្ករពិភពលោក ឬទម្លាក់ ៥% សម្រាប់រាល់ការកើនឡើង ៥% នៃតម្លៃអង្ករពិភពលោក។ បទបញ្ជានេះបានបញ្ជាក់ថា ទោះជាយ៉ាងណាក៏ដោយ អត្រាពន្ធលើអង្កររបស់ប្រទេសដែលទទួលបានការអនុគ្រោះទាំងក្នុងកូតា និងក្រៅកូតា មិនត្រូវទាបជាង ១៥% ឬលើសពី ៣៥% ឡើយ។
លោក Marcos ក៏បានបង្កើតក្រុមជំនាញអន្តរភ្នាក់ងារមួយ ដើម្បីបង្កើតគោលការណ៍ណែនាំសម្រាប់ការអនុវត្តពន្ធគយ ក៏ដូចជាតាមដាន និងកែតម្រូវពន្ធនាំចូលអង្ករ ដើម្បីឆ្លើយតបទៅនឹងការប្រែប្រួលនៃតម្លៃពិភពលោក។
ថ្មីៗនេះ ប្រទេសហ្វីលីពីនបានហាមឃាត់ការនាំចូលអង្កររហូតដល់ចុងឆ្នាំ ២០២៥ ដើម្បីការពារកសិករក្នុងស្រុក ជាពិសេសអំឡុងពេលរដូវប្រមូលផលខ្ពស់បំផុតរបស់ខ្លួន។ គិតត្រឹមចុងខែកញ្ញា ប្រទេសហ្វីលីពីនបាននាំចូលអង្ករចំនួន ៣,៥លានតោន សម្រាប់ឆ្នាំនេះ ដែលច្រើនជាងតម្រូវការប្រហែល ៨០ម៉ឺនតោន។
ប្រទេសហ្វីលីពីន ត្រូវបានគេព្យាករថានឹងទិញអង្ករចំនួន ៥ លានតោន នៅក្នុងរដូវកាលឆ្នាំ ២០២៥-២០២៦ ពោលធ្លាក់ចុះពី ៥,៤៣ លានតោន នៅក្នុងឆ្នាំ ២០២៤-២០២៥ ប៉ុន្តែលើសពីការបញ្ជាទិញដោយប្រទេសនាំចូលកំពូលៗ ដូចជាប្រទេសចិនជាដើម។ នេះបើយោងតាមការព្យាករណ៍របស់ក្រសួងកសិកម្មសហរដ្ឋអាមេរិក កាលពីខែកញ្ញាកន្លងទៅ៕ ប្រភព ៖ Bloomberg និង Inquirer
ចែករំលែកព័តមាននេះ