ប្រទេសចិន ៖ ជាសញ្ញាថ្មីមួយទៀត នៃការសម្រាលភាពតានតឹង ក្រោយការជួបគ្នារវាងប្រធានាធិបតីអាមេរិកលោកដូណាល់ត្រាំ និងសមភាគីចិន លោកស៊ីជីនពីង កាលពីសប្ដាហ៍មុន ដោយចិនអះអាង នៅថ្ងៃទី៩…
ប្រទេសចិន ៖ ជាសញ្ញាថ្មីមួយទៀត នៃការសម្រាលភាពតានតឹង ក្រោយការជួបគ្នារវាងប្រធានាធិបតីអាមេរិកលោកដូណាល់ត្រាំ និងសមភាគីចិន លោកស៊ីជីនពីង កាលពីសប្ដាហ៍មុន ដោយចិនអះអាង នៅថ្ងៃទី៩ វិច្ឆិកា ពីការផ្អាកហាមឃាត់ការនាំចេញទៅកាន់អាមេរិកនូវរ៉ែកម្រGALLIUM GERMANIUM និង ANTIMOINE ជារ៉ែកម្រសំខាន់សម្រាប់ឧស្សាហកម្មទំនើប ។
ក្រុងប៉េកាំងប្រកាស កាលពីខែធ្នូ ឆ្នាំ២០២៤ ការរិតដ្បិតការនាំចេញលោហធាតុកម្រទាំងនោះ ក្នុងក្របខណ្ឌនៃច្បាប់ស្ដីពីទ្រព្យសម្បត្តិដែលប្រើមានមុខ២ មានន័យថា អាចប្រើក្នុងក្របខណ្ឌស៊ីវិលតែក៏អាចប្រើក្នុងផ្នែកយោធាផងដែរ ដូចជាយកមកផលិតគ្រឿងសញ្វវុធជាដើម ។ ក្នុងសេចក្ដីប្រកាសមួយក្រសួងពាណិជ្ជកម្មចិនគូសបញ្ជាក់កាលពីធ្ងៃទី៩ វិច្ឆិកាថា ការហាមឃាត់នោះត្រូវផ្អាកចាប់តាំងពីថ្ងៃទី៩ វិច្ឆិកា ទៅរហូតដល់ថ្ងៃទី២៧ វិច្ឆិកា ឆ្នាំ២០២៦។
ការប្រកាសនោះ គឺជាសញ្ញានៃសុឆន្ទះថ្មីមួយរបស់ក្រុងប៉េកាំង ក្រោយការជួបគ្នារវាងប្រធានាធិបតីចិនលោកស៊ីជីនពីង និងសមភាគីអាមេរិក លោកដូណាល់ត្រាំ កាលពីថ្ងៃទី៣០តុលានៅកូរ៉េខាងត្បូង ។ ការជួបគ្នាកំពូលនោះ អាចលុបបំបាត់ភាពតានតឹងអស់ពេលច្រើនខែមកហើយ ដែលនាំឲ្យរង្គោះរង្គើរដល់សេដ្ឋកិច្ចពិភពលោក ។
រឿងរ៉ែកម្រនោះជារឿងដ៏ចម្រូងចម្រាស់ រវាងក្រុងប៉េកាំងនិងក្រុងវ៉ាស៊ីនតោន ព្រោះមហាអំណាចធំទាំង២ កំពុងតែប្រជែងគ្នា ដើម្បីមានប្រៀបដាច់គេខាងបច្ចេកវិទ្យាពិភពលោក ហើយរ៉ែកម្រទាំងនោះ ជាសេចក្ដីត្រូវការចាំបាច់ក្នុងគោលដៅនោះ។ ចិនជាប្រទេសផលិតរ៉ែកម្រធំជាងគេបំផុតនៃពិភពលោក។ គេមិនចាត់ទុកថា ជារ៉ែកម្រឡើយសម្រាប់លោហធានសំខាន់មួយក្រុមទៀត ដែលវាចាំបាច់បំផុតដែរសម្រាប់ទ្រទ្រង់ដល់សេដ្ឋកិច្ចទាំងមូល។
ក្នុងសេចក្ដីប្រកាសរបស់ខ្លួនកាលពីថ្ងៃទី៩ វិច្ឆិកា ក្រសួងពាណិជ្ជកម្មចិនក៏លើកឡើងដែរ ពីការសម្រាលការរិតដ្បិតលើការនាំចេញ បណ្ដាផលិតផលទាក់ទិននឹងGRAPHITE ។ ចិនក៏ប្រកាសរួចហើយដែរ កាលពីថ្ងៃទី៥ វិច្ឆិកា ពន្យារពេល១ឆ្នាំ ការយកពន្ធគយលើផលិតផលអាមេរិកដែលកំណត់ក្នុងពេលកំពុងមានសង្គ្រាមពាណិជ្ជកម្មពេញបន្ទុក ដោយរក្សាការយកពន្ធត្រឹម១០% ។ ចិនក៏គូសបញ្ជាក់ដែរឈប់អនុវត្តពន្ធគយបន្ថែម ដែលដាក់ចាប់តាំងពីខែមីនាមកលើសណ្ដែកសៀងនាំចូលពីអាមេរិក និងលើផលិតផលកសិកម្មអាមេរិកមួយចំនួនទៀត៕
ចែករំលែកព័តមាននេះ