ទីក្រុងម៉ានីឡា៖ ខ្យល់ព្យុះហ្វុងវ៉ុង (Fung Wong) ចាប់ផ្ដើមរសាត់ឆ្ងាយទៅៗពីប្រទេសហ្វ៊ីលីពីនភាគពាយព្យបន្ទាប់ពីបានវាយប្រហារទីនេះយ៉ាងខ្លាំងក្លាបង្កជាទឹកជំនន់ និងការបាក់ដី។ ខេត្តមួយចំនួនដាច់ភ្លើងអគ្គិសនីទាំងស្រុង។ រហូតមកដល់ពេលនេះ មនុស្សយ៉ាងតិច២នាក់បានស្លាប់ និងមនុស្សជាង១,៤លាននាក់ជម្លៀសខ្លួន។…
ទីក្រុងម៉ានីឡា៖ ខ្យល់ព្យុះហ្វុងវ៉ុង (Fung Wong) ចាប់ផ្ដើមរសាត់ឆ្ងាយទៅៗពីប្រទេសហ្វ៊ីលីពីនភាគពាយព្យបន្ទាប់ពីបានវាយប្រហារទីនេះយ៉ាងខ្លាំងក្លាបង្កជាទឹកជំនន់ និងការបាក់ដី។ ខេត្តមួយចំនួនដាច់ភ្លើងអគ្គិសនីទាំងស្រុង។ រហូតមកដល់ពេលនេះ មនុស្សយ៉ាងតិច២នាក់បានស្លាប់ និងមនុស្សជាង១,៤លាននាក់ជម្លៀសខ្លួន។ បន្ទាប់ពីនេះ ខ្យល់ព្យុះហ្វុងវ៉ុងនឹងបន្តដំណើរទៅវាយប្រហារកោះតៃវ៉ាន់វិញម្ដង។
ហ្វ៊ីលីពីនហាក់ដូចជាយីអ៊ុនដាក់យ៉ាងខ្លាំង ខ្យល់ព្យុះកាល់មេហ្គីទើបតែវាយប្រហារប្រទេសនេះមិនបានប៉ុន្មានថ្ងៃផង ស្រាប់តែខ្យល់ព្យុះហ្វុងវ៉ុងវាយប្រហារថែមទៀត។ គ្រាន់តែថាកាល់មេហ្គីសម្លាប់មនុស្សច្រើនរហូតដល់ជាង២រយនាក់។ ហ្វុងវ៉ុងបក់ទៅដល់ខេត្តអូរ៉ូរ៉ា (Aurora) កាលពីយប់ថ្ងៃអាទិត្យនៅក្នុងល្បឿន១៨៥គីឡូម៉ែត្រក្នុងមួយម៉ោង ពេលខ្លះបង្កើនល្បឿនដល់២៣០គីឡូម៉ែត្រក្នុងមួយម៉ោង។
ខ្យល់ព្យុះដែលមានអង្កត់ផ្ចិត៨០០គីឡូម៉ែត្រចាប់ផ្ដើមថមថយឥទ្ធិពលរបស់វានៅពេលបក់កាត់តំបន់ជួរភ្នំនៃបណ្ដាខេត្តភាគខាងជើង និងបក់កាត់តំបន់ទំនាបកសិកម្មកាលពីយប់មិញ។ ក្រោយមក ខ្យល់ព្យុះបក់ចេញពីខេត្តឡាអ៊ូនីញ៉ូន (La Union) ឆ្ពោះទៅសមុទ្រចិនខាងត្បូង។ នៅក្នុងចំណោមជនរងគ្រោះដែលបានស្លាប់ទាំង២នាក់នោះ ម្នាក់ស្លាប់ដោយលង់ទឹក និងម្នាក់ទៀតស្លាប់ដោយផ្ទះបាក់សង្កត់ពីលើ។
ប្រជាជនជាង១,៤លាននាក់ត្រូវចាកចេញពីផ្ទះសម្បែងទៅស្នាក់នៅក្នុងទីជម្រកបណ្ដោះអាសន្ន ឬនៅតាមផ្ទះរបស់សាច់ញាតិតាំងពីមុនពេលខ្យល់ព្យុះបក់ទៅដល់។ រហូតមកដល់ពេលនេះ មនុស្សជាង៣សែននាក់មិនទាន់វិលត្រឡប់ទៅផ្ទះរបស់ពួកគេវិញទេ។ ភ្លៀងលាយខ្យល់កន្ត្រាក់បានបង្កជាទឹកជំនន់លិចភូមិយ៉ាងតិច១៣២កន្លែងនៅភាគខាងជើង។ នៅក្នុងភូមិមួយ ប្រជាជនត្រូវឡើងទៅសំកុកនៅលើដំបូលផ្ទះដាច់បាយដាច់ទឹកព្រោះទឹកជំនន់ហក់ឡើងព្រឹបៗរកតែជម្លៀសខ្លួនមិនទាន់៕
ចែករំលែកព័តមាននេះ