តើអ្នកឧស្សាហ៍រវល់ពេក ឬខ្ជិលចូលបន្ទប់ទឹកដែរឬទេ? ការទប់ទឹកនោមជាទម្លាប់ មិនមែនគ្រាន់តែជាការមិនស្រួលបន្តិចបន្តួចនោះទេ តែវាជាការលេងសើចនឹងសុខភាពប្លោកនោម និងតម្រងនោមរបស់អ្នក។ កុំបន្តធ្វើបែបនេះទៀត! នេះជាផលវិបាកអវិជ្ជមាន ទាំង ៦…
តើអ្នកឧស្សាហ៍រវល់ពេក ឬខ្ជិលចូលបន្ទប់ទឹកដែរឬទេ? ការទប់ទឹកនោមជាទម្លាប់ មិនមែនគ្រាន់តែជាការមិនស្រួលបន្តិចបន្តួចនោះទេ តែវាជាការលេងសើចនឹងសុខភាពប្លោកនោម និងតម្រងនោមរបស់អ្នក។
កុំបន្តធ្វើបែបនេះទៀត! នេះជាផលវិបាកអវិជ្ជមាន ទាំង ៦ ដែលអាចកើតឡើង នៅពេលអ្នកបន្តទប់ទឹកនោមយូរពេកជាប្រចាំ៖
១. ហានិភ័យឆ្លងមេរោគផ្លូវទឹកនោម
ប្លោកនោមរបស់អ្នកប្រៀបដូចជាអាងស្តុកទឹក។ នៅពេលអ្នកទុកទឹកនោមយូរពេក បាក់តេរីដែលមាននៅក្នុងនោះមានពេលវេលាច្រើនដើម្បីលូតលាស់ និងបន្តពូជយ៉ាងងាយស្រួល។ នេះបណ្តាលឲ្យមានការឆ្លងមេរោគលើប្លោកនោម។ ប្រសិនបើមេរោគនេះមិនត្រូវបានព្យាបាលទេ វានឹងរាលដាលឡើងទៅបំពង់នោម និងអាចបង្កគ្រោះថ្នាក់ដល់តម្រងនោម។
២. រលាកប្លោកនោមរ៉ាំរ៉ៃ និងបាត់បង់ភាពយឺត
ការបង្ខំប្លោកនោមឲ្យធ្វើការធ្ងន់ និងផ្ទុកទឹកនោមលើសចំណុះញឹកញាប់ពេក នឹងធ្វើឲ្យវាបាត់បង់នូវការបត់បែន (ភាពយឺត) របស់វា។ នេះមានន័យថា វាមិនអាចផ្ទុកទឹកនោមបានច្រើនដូចមុនទៀតទេ។ ផលវិបាកគឺអ្នកនឹងចាប់ផ្តើមមានអាការៈនោមញឹកញាប់ ខណៈដែលប្លោកនោមហាក់ដូចជាបញ្ចេញចោលមិនអស់។
៣. គ្រោះថ្នាក់នៃការច្រាលទឹកនោមត្រឡប់ទៅតម្រងនោម
នេះគឺជាបញ្ហាដ៏គ្រោះថ្នាក់បំផុត! នៅពេលដែលអ្នកទប់ទឹកនោមយូរ សម្ពាធនៅក្នុងប្លោកនោមនឹងកើនឡើងយ៉ាងខ្លាំងរហូតដល់ធ្វើឲ្យទឹកនោមអាចហូរច្រាលត្រឡប់ទៅបំពង់នោម និងទៅដល់តម្រងនោមវិញ។ ស្ថានភាពនេះអាចនាំឲ្យមានជំងឺ ខ្សោយតម្រងនោមស្រួចស្រាវ ដែលអាចគំរាមកំហែងដល់អាយុជីវិត។
៤. កកើតក្រួសក្នុងផ្លូវទឹកនោម
ការរក្សាទឹកនោមនៅក្នុងប្លោកនោមរយៈពេលយូរ អនុញ្ញាតឲ្យសារធាតុរ៉ែនៅក្នុងទឹកនោមមានពេលវេលាគ្រប់គ្រាន់ក្នុងការធ្លាក់ទឹក និងប្រមូលផ្តុំគ្នា។ ការកកផ្តុំគ្នានេះអាចវិវត្តទៅជាការបង្កើត ក្រួស នៅក្នុងប្លោកនោម ឬតម្រងនោម។
៥. ឈឺចាប់ពោះផ្នែកខាងក្រោម
ការទប់ទឹកនោមធ្វើឲ្យប្លោកនោមលាតសន្ធឹងហួសប្រមាណ និងបង្កឲ្យមានការឈឺចាប់ធ្ងន់ធ្ងរនៅពោះផ្នែកខាងក្រោម។ ជួនកាល ការឈឺចាប់នេះអាចបណ្តាលឲ្យអ្នកមានអារម្មណ៍ថា ចង់នោមញឹកញាប់ ឈឺចាប់ ប៉ុន្តែមានទឹកនោមតិចតួចប៉ុណ្ណោះ។
៦. បញ្ហាគ្រប់គ្រងការនោមរយៈពេលវែង
ការបង្ខំសាច់ដុំបិទបើក ឲ្យធ្វើការទប់ទឹកនោមក្នុងរយៈពេលយូរ អាចធ្វើឲ្យសាច់ដុំទាំងនោះចុះខ្សោយ។ ក្នុងរយៈពេលវែង ភាពចុះខ្សោយនេះអាចនាំឲ្យអ្នកបាត់បង់សមត្ថភាពក្នុងការគ្រប់គ្រងការនោម ឬពិបាកក្នុងការចាប់ផ្តើមនោម។
ដំបូន្មាន៖ ពេលណារាងកាយផ្តល់សញ្ញាថាចង់នោម សូមចូលបន្ទប់ទឹកភ្លាម។ ផ្តល់អាទិភាពដល់សុខភាពប្លោកនោមរបស់អ្នក ព្រោះវាជាគន្លឹះដ៏សំខាន់នៃប្រព័ន្ធសុខភាពទាំងមូល!
(ប្រភព៖ បរទេស)
ចែករំលែកព័តមាននេះ