រាត្រីពេញបូរមី នៅពោធិ៍សាត់៖ ប្រជាពលរដ្ឋយ៉ាងច្រើនកុះករ ចូលរួមបណ្តែតប្រទីប អុជកាំជ្រួច និងទស្សនាប្រណាំងទូកមិត្តភាព
- ពោធិ៍សាត់
ខេត្តពោធិ៍សាត់ ៖ រាត្រី១កើត ពេញបូរមី ថ្ងៃទី៥ ខែវិច្ឆិកា ឆ្នាំ២០២៥ លោក ខូយ រីដា…
ខេត្តពោធិ៍សាត់ ៖ រាត្រី១កើត ពេញបូរមី ថ្ងៃទី៥ ខែវិច្ឆិកា ឆ្នាំ២០២៥ លោក ខូយ រីដា អភិបាលនៃគណៈអភិបាលខេត្តពោធិ៍សាត់ បានដឹកនាំមន្ត្រីរាជការ សមាជិកាសាខាសមាគមនារីខេត្ត និងប្រជាពលរដ្ឋយ៉ាងច្រើនកុះករ ប្រារព្ធពិធីបណ្តែតប្រទីប និងសំពះព្រះខែ អកអំបុក ព្រមទាំងអុជកាំជ្រួច បង្ហោះគោម និងប្រគុំតន្ត្រី នៅលើបូរីវប្បធម៌កោះសំពៅមាស ទៅតាមទំនៀមទម្លាប់ប្រពៃណីជាតិខ្មែរយើង ។
លោក ខូយ រីដា បានឱ្យដឹងថា ព្រះរាជពិធីបុណ្យអុំទូក ដែលធ្វើព្រមគ្នាជាមួយនឹងពិធីបណ្តែតប្រទីប សំពះព្រះខែ និងអកអំបុក ជាមរតកវប្បធម៌ដូនតាខ្មែរសុទ្ធសាធ ។ ជារៀងរាល់ឆ្នាំប្រជាពលរដ្ឋខ្មែរ តែងតែប្រារព្ធពិធីនេះ នៅថ្ងៃទី១៤, ១៥កើត និង១រោជ ខែកក្ដិក ដែលមានរយៈពេលបីថ្ងៃ ដើម្បីបន់ស្រន់សុំសេចក្តីសុខ និងទឹកភ្លៀង ទៅតាមជំនឿរបស់ប្រជាពលរដ្ឋខ្មែរ, អភិរក្សវប្បធម៌ប្រពៃណីយខ្មែរពីដូនតា, បង្ហាញពីភោគផលដំណាំដាំដុះ របស់ប្រជាកសិករ និងបង្ហាញពីការរីកចម្រើនលូតលាស់គ្រប់វិស័យ ជាពិសេសវិស័យកសិកម្ម ។
លោកបានបន្ថែមថា នាថ្ងៃទី០៥ ខែវិច្ឆិកា ឆ្នាំ២០២៥ដែរ នៅចំណុចខាងលើស្ពានអាកាស ត្រើយខាងលិចស្ទឹងពោធិ៍សាត់ យើងបានរៀបចំព្រឹត្តិការណ៍ប្រណាំងទូក«ង» ខ្នាតអន្តរជាតិ លក្ខណៈមិត្តភាព សាមគ្គីភាព ក្រោមម្លប់សន្តិភាព គឺដើម្បីដកស្រង់បច្ចេកទេស និងបទពិសោធន៍ និងដើម្បីបង្កភាពសប្បាយរីករាយ ជូនដល់ប្រជាពលរដ្ឋក្នុងខេត្ត និងគ្រប់មជ្ឈដ្ឋានក៏ដូចជា ភ្ញៀវជាតិ និងអន្តរជាតិ នាឱកាសព្រះរាជពិធីបុណ្យអុំ បណ្តែតប្រទីប និងសំពះព្រះខែ អកអំបុក ។
សូមបញ្ជាក់ថា ថ្ងៃបណ្តែតប្រទីប សំពះព្រះខែ និងអកអំបុក នៅលើកោះសំពៅមាសឆ្នាំនេះ មានរៀបចំគ្រឿងរន្តាប់ បុសបុក ទៅតាមទម្លាប់ព្រះពុទ្ធសាសនា និងព្រហ្មញសាសនា ព្រមទាំងមានជូនភ្ជាប់ទស្សនីយភាព សម្តែងរបាំជូនពរ, ពិធីក្រុងពិលីសុំម្ចាស់ទឹកម្ចាស់ដី, ពិធីអុជទៀនធូបថ្វាយព្រះរតនៈត្រៃ និងបារមីគ្រប់ទិសទី, ពិធីប្រកាសទេវតា បារមីគ្រប់ទិសទី, ពិធីលើកដង្វាយថ្វាយព្រះខែ, ពិធីសម្រក់ទៀនជ័យ តាមក្រុង ស្រុកទាំង៧, ពិធីដាល់អំបុកជានិម្មិតរូប, ពិធីអកអំបុក, ពិធីបណ្តែតប្រទីប, ពិធីអុជកាំជ្រួច, ពិធីបង្ហោះគោម និងការប្រគុំតន្ត្រី ដើម្បីអបអរព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក៕
ចែករំលែកព័តមាននេះ