ទីក្រុងសេអ៊ូល៖ រដ្ឋមន្ត្រីការពារជាតិអាមេរិក និងកូរ៉េខាងត្បូងបានធ្វើដំណើរទៅពីនិត្យមើលសភាពការណ៍នៅតំបន់ព្រំដែនដែលគេឱ្យឈ្មោះថា «តំបន់គ្មានកងទ័ព»។ ប៉ុន្តែធាតុពិតតំបន់នេះដាក់ពង្រាយកងទ័ពយ៉ាងក្រាស់ឃ្មឹក។ ការចុះទៅតំបន់គ្មានកងទ័ពធ្វើឡើងមុនពេលមានកិច្ចជំនួបនៅទីក្រុងសេអ៊ូលដើម្បីនិយាយអំពីការកំណត់នយោបាយរបស់អាមេរិកពាក់ព័ន្ធនឹងវត្តមានរបស់កងទ័ពខ្លួនដែលឈរជើងនៅកូរ៉េខាងត្បូង។
រដ្ឋមន្ត្រីការពារជាតិកូរ៉េខាងត្បូង លោកអានគ្យូបាក់ (Ahn Gyu-back) ជឿជាក់ថាការចុះទៅដល់តំបន់ព្រំដែនលើកនេះមានតម្លៃជានិមិត្តរូបផង និងជាការប្រកាសយ៉ាងឱឡារិកនូវសម្ព័ន្ធភាពដ៏រឹងមាំរវាងប្រទេសទាំង២ និងការរួមកម្លាំងគ្នានៅក្នុងវិស័យការពារជាតិ។ តាមគម្រោងនៅថ្ងៃស្អែកនេះ ប្រមុខការពារជាតិទាំង២នឹងចូលរួមកិច្ចប្រជុំប្រចាំឆ្នាំស្ដីពីសន្តិសុខជាតិ។
គេរំពឹងថាលោកទាំង២នឹងពិភាក្សាគ្នាអំពីការត្រៀមយុទ្ធសាស្ត្រទប់ទល់នឹងកូរ៉េខាងជើងដែលមានអាវុធនុយក្លេអ៊ែរនៅក្នុងដៃ និងក៏ពិភាក្សាគ្នាផងដែរអំពីកិច្ចសហប្រតិបត្តិការពង្រឹងសន្តិសុខក្នុងតំបន់ ហើយនិងការត្រៀមទប់ទល់នឹងការវាយលុកតាមប្រព័ន្ធព័ត៌មានវិទ្យា និងមីស៊ីល។ នេះបើយោងតាមការប្រកាសរបស់ក្រសួងការពារជាតិកូរ៉េខាងត្បូង។ ក្រសួងថ្លែងបន្តទៀតថាភាគីទាំង២នឹងពិភាក្សាអំពីផែនការឆ្លើយតបទៅនឹងសភាពការណ៍ប្រែប្រួលផ្នែកសន្តិសុខជាតិ និងការគំរាមកំហែងពីខាងក្រៅ។
អាមេរិកកំពុងពិចារណាកែសម្រួលកងទ័ពរបស់ខ្លួននៅកូរ៉េខាងត្បូងដែលសព្វថ្ងៃមានចំនួន២៨៥០០នាក់ដើម្បីបត់បែនទៅតាមសភាពការណ៍ជាក់ស្ដែង។ អាមេរិកចង់រក្សាតុល្យភាពកម្លាំងនៅទ្វីបអាស៊ីនៅពេលមានការបារម្ភកាន់តែខ្លាំងពីឥទ្ធិពលយោធារបស់ប្រទេសចិននៅសមុទ្រចិនខាងត្បូង និងនៅក្បែរកោះតៃវ៉ាន់។ មន្ត្រីរដ្ឋាភិបាលអាមេរិកឱ្យតម្រុយថារដ្ឋាភិបាលរបស់ខ្លួនចង់កែសម្រួលកងទ័ពដើម្បីងាយស្រួលបើកប្រតិបត្តិការសឹកនៅខាងក្រៅឧបទ្វីបកូរ៉េឆ្លើយតបទៅនឹងការគំរាមកំហែងពីច្រើនមុខព្រួញ។ ឧទាហរណ៍កែសម្រួលកងទ័ពដើម្បីដកកម្លាំងមួយផ្នែកទៅជួយតៃវ៉ាន់ និងដើម្បីទប់ទល់នឹងការពង្រីកឥទ្ធិពលយោធារបស់ប្រទេសចិន។
ជាជំហររបស់កូរ៉េខាងត្បូង កូរ៉េខាងត្បូងមិនចង់ឱ្យអាមេរិកដកកម្លាំងទៅណាទេព្រោះការគំរាមកំហែងពីកូរ៉េខាងជើងក៏មានសភាពខ្លាំងក្លាផងដែរ។ ប៉ុន្តែទន្ទឹមនឹងនោះ កូរ៉េខាងត្បូងចាប់ផ្ដើមពង្រឹងសមត្ថភាពការពារខ្លួននារយៈពេលម្ភៃឆ្នាំចុងក្រោយនេះ។ គោលដៅធំរបស់កូរ៉េខាងត្បូងគឺប្រើប្រាស់ផ្គួបគ្នារវាងកងទ័ពអាមេរិក និងកូរ៉េខាងត្បូង។ សព្វថ្ងៃនេះកូរ៉េខាងត្បូងក៏មានកម្លាំងយោធាមិនធម្មតាប៉ុន្មានដែរជាមួយនឹងចំនួនកងទ័ពសរុប៤៥ម៉ឺននាក់។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ