ទីក្រុងយេរូសាឡឹម៖ អ៊ីស្រាអែលប្រគល់សាកសពជនជាតិប៉ាឡេស្ទីនទៅឱ្យក្រុមហាម៉ាស់បន្ទាប់ពីហាម៉ាស់ប្រគល់សាកសពចំណាប់ខ្មាំងជនជាតិអ៊ីស្រាអែល៣នាក់កាលពីយប់ម្សិលមិញ។ នេះបើតាមការបញ្ជាក់របស់កាកបាទក្រហម។ អ៊ីស្រាអែលបញ្ជាក់ថាខ្លួនបានទទួលសាកសពទាំងនោះហើយ ហើយបានធ្វើកោសល្យវិច័យឃើញថាពិតជាសាកសពទាហានរបស់ខ្លួនដែលស្លាប់តាំងពីថ្ងៃទី៧ ខែតុលា ឆ្នាំ២០២៣។
ការដូរសាកសពគ្នាទៅវិញទៅមកនេះធ្វើឱ្យបទឈប់បាញ់ដ៏ផុយស្រួយហាក់ដូចជាមានសង្ឃឹមឡើងវិញ។ ចាប់តាំងពីមានបទឈប់បាញ់កាលពីថ្ងៃទី១០ ខែតុលា ឆ្នាំ២០២៥ ក្រុមហាម៉ាស់ប្រគល់សាកសពចំណាប់ខ្មាំងម្ភៃនាក់ទៅឱ្យអ៊ីស្រាអែល។ ដូច្នេះនៅសល់សាកសព៨នាក់ទៀតដែលពួកគេនឹងប្រគល់ឱ្យជាបន្តបន្ទាប់។ ភាគីទាំង២ដូរសាកសពគ្នា១ទល់នឹង៨។ មានន័យថានៅពេលហាម៉ាស់ប្រគល់សាកសពចំណាប់ខ្មាំងអ៊ីស្រាអែលម្នាក់ អ៊ីស្រាអែលប្រគល់សាកសពប៉ាឡេស្ទីន៨នាក់។
ការកំណត់អត្តសញ្ញាណសាកសពមានភាពយឺតយ៉ាវ
កាកបាទក្រហមថ្លែងថាខ្លួនបានជួយសម្រួលការបញ្ជូនសាកសពជនជាតិប៉ាឡេស្ទីន៤៥នាក់ទៅតំបន់ហ្កាហ្សាគិតត្រឹមព្រឹកថ្ងៃចន្ទ។ អ្នកនាំពាក្យក្រសួងសុខាភិបាលប៉ាឡេស្ទីនប្រាប់ថាមន្ទីរពេទ្យណាហ្ស៊ែ (Nasser) ទទួលបានសាកសពទាំងនោះនៅពេលរសៀល។ នៅក្នុងចំណោមសាកសពដែលអ៊ីស្រាអែលប្រគល់ឱ្យក្រុមហាម៉ាស់សរុប២៧០នាក់ មានតែ៧៨នាក់ប៉ុណ្ណោះដែលបានកំណត់អត្តសញ្ញាណចប់សព្វគ្រប់។
ការធ្វើកោសល្យវិច័យមិនមែនងាយស្រួលប៉ុន្មានទេដោយសារនៅតំបន់ហ្កាហ្សាខ្វះខាតឧបករណ៍ធ្វើតេស្តឌីអឹនអេ (DNA)។ ក្រសួងខាងលើនេះបានបង្ហោះរូបភាពសាកសពនៅលើអ៊ីនធឺណិតដោយសង្ឃឹមថាក្រុមគ្រួសាររបស់ពួកគេអាចចំណាំសាច់ញាតិរបស់ខ្លួន។
ទន្ទឹមនឹងនោះ ខុទ្ទកាល័យនាយករដ្ឋមន្ត្រីអ៊ីស្រាអែលបានបង្ហាញអត្តសញ្ញាណសាកសពទាំងបីនាក់នោះហើយកាលពីយប់ថ្ងៃអាទិត្យ។ នៅក្នុងចំណោមនោះ សាកសពម្នាក់ឈ្មោះអូមើ ណឺត្រា (Omer Neutra) ជាជនជាតិអ៊ីស្រាអែលកាត់អាមេរិក។ លោកត្រាំបាននិយាយទូរស័ព្ទទៅក្រុមគ្រួសាររបស់ណឺត្រាដើម្បីចូលរួមរំលែកមរណទុក្ខជាមួយពួកគេ។ នេះបើតាមការផ្សាយរបស់អេភី និងប្រភពដទៃទៀត៕
ចែករំលែកព័តមាននេះ