រាជធានីភ្នំពេញ ៖ ក្រសួងធនធានទឹក និងឧតុនិយម បានអោយដឹងថា ព្យុះកាលម៉េហ្គីដែលជាព្យុះទី២៥ និងជាព្យុះចុងក្រោយ សម្រាប់រដូវវស្សាឆ្នាំនេះនឹងបោកបក់តាមគន្លងផ្លូវដើរមកពីលើក្បែរនឹងប្រទេសកម្ពុជា ហើយធ្វើអោយកម្ពុជាទទួលរងឥទ្ធិពលកម្រិត ៣០ភាគរយនៃបរិមាណទឹកភ្លៀងនិងខ្យល់កន្ត្រាក់នៅចន្លោះរវាងចាប់ពីថ្ងៃទី៦…
រាជធានីភ្នំពេញ ៖ ក្រសួងធនធានទឹក និងឧតុនិយម បានអោយដឹងថា ព្យុះកាលម៉េហ្គីដែលជាព្យុះទី២៥ និងជាព្យុះចុងក្រោយ សម្រាប់រដូវវស្សាឆ្នាំនេះនឹងបោកបក់តាមគន្លងផ្លូវដើរមកពីលើក្បែរនឹងប្រទេសកម្ពុជា ហើយធ្វើអោយកម្ពុជាទទួលរងឥទ្ធិពលកម្រិត ៣០ភាគរយនៃបរិមាណទឹកភ្លៀងនិងខ្យល់កន្ត្រាក់នៅចន្លោះរវាងចាប់ពីថ្ងៃទី៦ ដល់ទី៨ ខែវិច្ឆិកាខាងមុខនេះ ។ នេះបើយោងតាមផេកក្រសួងព័ត៌មានបានផ្សាយ ។
សូមរម្លឹកថា ព្យុះមុនៗ កន្លងមកនេះ មិនបានបោកបក់តាមគន្លងផ្លូវដើរមកក្បែរប្រទេសកម្ពុជានោះទេ។ ការដែលព្យុះទី២៥នេះ នឹងបោកបក់តាមគន្លងផ្លូវដើរមកក្បែរប្រទេសកម្ពុជាដូច្នេះ នឹងធ្វើអោយតំបន់វាលទំនាបដែលរួមមានខេត្តបន្ទាយមានជ័យ បាត់ដំបង ពោធិ៍សាត់ កំពង់ឆ្នាំង សៀមរាប កំពង់ធំ កំពង់ចាម ត្បូងឃ្មុំ ព្រៃវែង កណ្តាល តាកែវ ស្វាយរៀង និងរាជធានីភ្នំពេញ អាចមានភ្លៀងធ្លាក់ និងខ្យល់បោកបក់ខ្លាំងជាមួយបាតុភូត ខ្យល់កន្ត្រាក់គ្របដណ្តប់លើផ្ទៃដី ២៥ភាគរយ។
តំបន់ខ្ពង់រាបដែលរួមមានខេត្តកំពង់ស្ពឺ ប៉ៃលិន ឧត្តរមានជ័យ ព្រះវិហារ ក្រចេះ ស្ទឹងត្រែង រតនគិរី មណ្ឌលគិរី ជួរភ្នំដងរែក និង តំបន់ជួរភ្នំក្រវាញ អាចមានភ្លៀងធ្លាក់ និងខ្យល់បោកបក់ខ្លាំងជាមួយបាតុភូតខ្យល់កន្ត្រាក់គ្របដណ្តប់លើផ្ទៃដី ៦៥ភាគរយ។
និងតំបន់មាត់សមុទ្រដែលរួមមានខេត្តកោះកុង ព្រះសីហនុ កំពត កែប និងជួរភ្នំបូកគោ បរិមាណទឹកភ្លៀងនឹងអាចកើនឡើងក្នុង កម្រិតមធ្យម និងមានខ្យល់បោកបក់ខ្លាំងជាមួយបាតុភូតខ្យល់កន្ត្រាក់គ្របដណ្តប់លើផ្ទៃដី ៥០ភាគរយ។ រលកសមុទ្របោក បក់ខ្លាំង ដែលមានកម្ពស់មធ្យមអប្បបរមា ០,៥០ម៉ែត្រ និងកម្ពស់មធ្យមអតិបរមា ២,៥០ម៉ែត្រ។
ក្រសួងធនធានទឹក និងឧតុនិយម នឹងបន្តធ្វើការតាមដានយ៉ាងមត់ចត់ចំពោះឥទ្ធពលរបស់ព្យុះនេះដើម្បីជម្រាបជូនជាបន្តបន្ទាប់ ក្នុងករណីមានការប្រែប្រួល៕
ចែករំលែកព័តមាននេះ