ទីក្រុងសេអ៊ូល៖ លោកត្រាំនៅតែចិញ្ចឹមចិត្តចង់ជួបសម្លាញ់វ័យក្មេងគីមជុងអ៊ុនរបស់លោកនៅអំឡុងទស្សនកិច្ចរយៈពេល៥ថ្ងៃមកកាន់ទ្វីបអាស៊ី។ មានសេចក្ដីរាយការណ៍ថាលោកបានបញ្ជូនសំណើសុំជួបគ្នាជាច្រើនដងមកហើយ។ ប៉ុន្តែរហូតមកដល់ពេលនេះ កូរ៉េខាងជើងនៅរក្សាភាពស្ងប់ស្ងាត់ជានិច្ច។ គេមិនទាន់ដឹងថាតើបំណងប្រាថ្នារបស់លោកត្រាំបានសម្រេចឬយ៉ាងណាទេព្រោះមន្ត្រីរដ្ឋាភិបាលអាមេរិក និងកូរ៉េខាងត្បូងសុទ្ធតែនិយាយដូចគ្នាថាគ្មានផែនការជួបគ្នាឱ្យបានជាក់លាក់នៅឡើយទេ។
មុនដំណើរទស្សនកិច្ចរបស់លោកត្រាំមកទ្វីបអាស៊ី កូរ៉េខាងជើងបានបាញ់សាកល្បងមីស៊ីលស៊េរីទំនើបរបស់ខ្លួនមួយគ្រាប់។ ប៉ុន្តែលោកត្រាំមិនចង់យករឿងនេះធ្វើជាបញ្ហាធំទេ។ លោកនៅតែធ្វើដំណើរមកទ្វីបអាស៊ី និងដើម្បីបង្ហាញពីគោលបំណងចង់ជួបមុខមេដឹកនាំប្រទេសនេះ។ លោកសង្ឃឹមថានឹងសើរើឡើងវិញនូវការជួបគ្នាកម្រិតកំពូលជាច្រើនដងកាលលោកនៅកាន់អំណាចអាណត្តិទីមួយ។
លោកត្រាំថ្លែងប្រាប់អ្នកសារព័ត៌មានថាលោកនៅតែមានទំនាក់ទំនងល្អជាមួយលោកគីមជុងអ៊ុនជានិច្ច។ លោកចង់ជួបមុខគ្នា បើគាត់ចង់ដែរ និងបើគាត់បានទទួលសារនេះ។ យើងមិនបានធ្វើអត្ថាធិប្បាយអ្វីទេ។ ប៉ុន្តែលោកគីមដឹងថាលោកមកទ្វីបអាស៊ី។ បើលោកគីមចង់ជួបគ្នា លោកត្រៀមជួបគ្នាដោយក្ដីសោមនស្សរីករាយជានិច្ច។ នៅពេលអ្នកសារព័ត៌មានសួរថាតើលោកមានអ្វីជាបន្ទាល់សម្រាប់ឱ្យលោកគីមវិលទៅរកតុចរចាគ្នាឡើងវិញ? លោកត្រាំឆ្លើយតបការដាក់ទណ្ឌកម្មសេដ្ឋកិច្ច។
លោកទាំង២ធ្លាប់ជួបមុខគ្នាកាលពីឆ្នាំ២០១៨ និង២០១៩។ ក្រោយមក ការចរចាគ្នាត្រូវបរាជ័យនៅពេលកូរ៉េខាងជើងនៅតែបន្តអភិវឌ្ឍកម្មវិធីនុយក្លេអ៊ែរ។ កូរ៉េខាងជើងសព្វថ្ងៃនេះទទួលរងទណ្ឌកម្មពីសហគមន៍អន្តរជាតិដោយសារការកម្មវិធីនុយក្លេអ៊ែរ និងមីស៊ីលរបស់ខ្លួន។ កាលពីខែកញ្ញា លោកគីមឱ្យតម្រុយថាលោកមិនយល់ទាស់ទេចំពោះការជួបគ្នាជាមួយលោកត្រាំ។ សំខាន់ឱ្យតែអាមេរិកឈប់ទាមទារឱ្យកូរ៉េខាងជើងបោះបង់ចោលកម្មវិធីនុយក្លេអ៊ែរ។ ប៉ុន្តែលោកគីមសូមប្រកែកដាច់ខាតមិននិយាយរកកូរ៉េខាងត្បូងទេ។
លោកគីមថ្លែងថាជាឯកជន លោកនៅតែនឹករលឹកទៅដល់អនុស្សាវរីយ៍ដែលធ្លាប់សាងរួមគ្នាជាមួយលោកត្រាំ។ បើអាមេរិកឈប់ទាមទារឱ្យកូរ៉េខាងជើងកាត់រំសាយកម្មវិធីនុយក្លេអ៊ែរ, ទទួលស្គាល់កូរ៉េខាងជើងជារដ្ឋនុយក្លេអ៊ែរ និងចង់រួមរស់ជាសន្តិសហវិជ្ជមានជាមួយគ្នា ពេលនោះរឿងអ្វីដែលថាយើងអង្គុយជជែកគ្នាមិនបាន។ នេះបើយោងតាមអ្វីដែលទូរទ្សនស៍កូរ៉េខាងជើង ខេស៊ីអឹនអេ (KCNA) ដកស្រង់ពាក្យសម្ដីរបស់លោកគីមមកផ្សព្វផ្សាយ។
បើសិនមានគម្រោងជួបគ្នាមែន លោកត្រាំ និងលោកគីមអាចនឹងជួបគ្នានៅតំបន់ព្រំដែនរវាងប្រទេសកូរ៉េទាំង២។ ប៉ុន្តែរហូតមកដល់ពេលនេះហាក់ដូចជាស្ងាត់ឈឹង។ ខាងអាមេរិកបោះដៃទៅហើយ ប៉ុន្តែកូរ៉េខាងជើងរក្សាភាពស្ងៀមស្ងាត់។ មន្ត្រីរដ្ឋាភិបាលអាមេរិកបង្ហើបឱ្យដឹងថាពួកគេក៏កំពុងត្រៀមខ្លួនរៀបចំគម្រោងជួបគ្នានេះដែរ។ ប៉ុន្តែគ្មានការកំណត់ពេលវេលាជាក់លាក់ថានឹងជួបគ្នានៅថ្ងៃណាពិតប្រាកដទេ។ នេះបើតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ