ទីក្រុងតូក្យូ៖ លោកត្រាំបានថ្លែងកោតសរសើរមិនដាច់ពីមាត់ចំពោះនាយករដ្ឋមន្ត្រីថ្មីរបស់ជប៉ុន លោកស្រីតាកាអ៊ីឈិ នៅពេលលោកទៅបំពេញទស្សនកិច្ចនៅប្រទេសនេះ។ លោកក៏សូមស្វាគមន៍យ៉ាងពេញទំហឹងផងដែរនូវការសន្យារបស់លោកស្រីដើម្បីកសាងកម្លាំងយោធាជប៉ុន។ នៅរសៀលថ្ងៃអង្គារ លោក និងលោកស្រីបានចុះហត្ថលេខាលើកិច្ចព្រមព្រៀងពាណិជ្ជកម្ម និងរ៉ែកម្រ។
លោកស្រីតាកាអ៊ីឈិគាំទ្រកិច្ចខិតខំប្រឹងប្រែងរបស់លោកត្រាំក្នុងការផ្សះផ្សាជម្លោះនៅលើពិភពលោក និងសន្យាគាំទ្រលោកឲ្យទទួលបានរង្វាន់ណូបែលសន្តិភាព។ នេះបើយោងតាមអ្នកនាំពាក្យសេតវិមាន លោកស្រីខារ៉ូឡាញ លេវីត (Karoline Leavitt)។ រដ្ឋាភិបាលប្រទេសទាំង២បានប្រកាសនូវគម្រោងយ៉ាងច្រើនសន្ធឹកសន្ធាប់ដែលគ្របដណ្ដប់ទៅលើវិស័យជាច្រើនមានជាអាទិ៍ថាមពល បញ្ញាសិប្បនិម្មិត (អេអាយ) និងរ៉ែកម្រ។
ក្រុមហ៊ុនជប៉ុនគ្រោងវិនិយោគនៅអាមេរិកនៅក្នុងទំហំទឹកប្រាក់៤រយពាន់លានដុល្លារ។ រដ្ឋាភិបាលជប៉ុនសន្យាថាខ្លួននឹងបោះទុនវិនិយោគគិតជាទឹកប្រាក់៥៥០ពាន់លានដុល្លារនៅអាមេរិកដើម្បីជាថ្នូរនឹងការបន្ធូរបន្ថយពន្ធគយរបស់អាមេរិក។
ទំហំទឹកប្រាក់ប៉ុណ្ណេះអាចធ្វើឱ្យលោកត្រាំស្ងប់ចិត្តបានខ្លះ។ កាលពីមុននេះ លោកទាមទារឱ្យប្រទេសជប៉ុនចំណាយប្រាក់ឱ្យបានច្រើនថែមទៀតនៅក្នុងវិស័យសន្តិសុខជាតិ។ នេះក៏ជាអ្វីដែលនាយករដ្ឋមន្ត្រីជប៉ុនកំពុងគិតគូរផងដែរ។ លោកស្រីសន្យាថានឹងបង្កើនខ្ទង់ចំណាយ២%នៃជីឌីភីប្រចាំឆ្នាំទៅលើវិស័យការពារជាតិ។
លោកស្រីតាកាអ៊ីឈិរំលឹកអំពីកេរតំណែលរបស់លោកអាបេ
លោកស្រីតាគីអ៊ីឈិបាននិយាយរំលឹកទៅដល់សពលោកស៊ីនហ្សូអាបេ អតីតនាយករដ្ឋមន្ត្រីជប៉ុន ដែលតែងកោតសរសើរលោកត្រាំ។ លោកស្រីក៏បានផ្ដល់ជូនលោកត្រាំនូវអំណោយរបស់លោកអាបេដែលដាក់នៅក្នុងទូកញ្ចក់, កាបូបវាយកូនគោលដែលមានហត្ថលេខារបស់កីឡាករឆ្នើមរបស់ជប៉ុន និងកូនគោលធ្វើអំពីមាសសន្លឹក។ នៅពេលទទួលទានអាហារថ្ងៃត្រង់ដែលមានបាយ សាច់គោ និងបន្លែដាំដុះ និងចិញ្ចឹមនៅខេត្តណារ៉ា (Nara) ដែលជាស្រុកកំណើតរបស់លោកស្រីតាកាអ៊ីឈិ លោកស្រីបានបង្ហាញជូនលោកត្រាំនូវការវិនិយោគធំៗរបស់ក្រុមហ៊ុនជប៉ុននៅអាមេរិកចាប់តាំងពីឆ្នាំ២០០៩។
ការចុះកិច្ចព្រមព្រៀងរ៉ែកម្រ
លោកត្រាំថ្លែងកោតសរសើរប្រទេសជប៉ុនដែលទិញគ្រឿងបរិក្ខារយោធាពីប្រទេសអាមេរិក។ ចំណែកលោកស្រីតាកាអ៊ីឈិក៏ថ្លែងកោតសរសើរកិច្ចខិតខំប្រឹងប្រែងរបស់លោកត្រាំក្នុងការជួយសម្របសម្រួល និងបិទបញ្ចប់ជម្លោះនានានៅលើពិភពលោក។ លោកស្រីចាត់ទុកថានេះជាសមិទ្ធផលដ៏ថ្លៃថ្លាបំផុត។ បន្ទាប់ពីទទួលទានអាហារថ្ងៃត្រង់រួច លោកត្រាំទទួលជួបក្រុមគ្រួសារជនជាតិជប៉ុនដែលត្រូវកូរ៉េខាងជើងចាប់ពង្រត់តាំងពីអំឡុងទសវត្សទី៦០ និង៧០។
ថ្វីដ្បិតនៅក្នុងចំណោមអ្នកទាំងនោះ អ្នកខ្លះត្រូវកូរ៉េខាងជើងដោះលែង និងវិលត្រឡប់ទៅមាតុភូមិវិញ ប៉ុន្តែជប៉ុននៅតែជំរុញឱ្យកូរ៉េខាងជើងទទួលខុសត្រូវនៅក្នុងរឿងនេះ និងបញ្ជូនអ្នកដែលនៅរស់រានមានជីវិតត្រឡប់មកវិញទាំងអស់។ លោកត្រាំបំពេញទស្សនកិច្ចនៅទ្វីបអាស៊ីលើកនេះក៏មានគម្រោងជួបថ្នាក់ដឹកនាំកូរ៉េខាងជើងលោកគីមជុងអ៊ុនផងដែរ។ ប៉ុន្តែគេមិនទាន់ដឹងច្បាស់ថានឹងបានជួបគ្នាដែរឬទេ៕
ចែករំលែកព័តមាននេះ