ទីក្រុងញូវដេលី ៖ បើតាមការចេញផ្សាយពីសារព័ត៌មាន CNBC កាលពីថ្ងៃទី២៧ ខែតុលា ឆ្នាំ២០២៥ បានឱ្យដឹងថា ត្រឹមតែរយៈពេល៥ថ្ងៃនៃពិធិបុណ្យ «ឌីវ៉ាលី»…
ទីក្រុងញូវដេលី ៖ បើតាមការចេញផ្សាយពីសារព័ត៌មាន CNBC កាលពីថ្ងៃទី២៧ ខែតុលា ឆ្នាំ២០២៥ បានឱ្យដឹងថា ត្រឹមតែរយៈពេល៥ថ្ងៃនៃពិធិបុណ្យ «ឌីវ៉ាលី» (Diwali) ប្រជាជនឥណ្ឌាបានចំណាយប្រាក់សរុបដល់ទៅ ១១ពាន់លានដុល្លារអាមេរិក ទិញកាក់មាស និងមាសដុំ។
បើយោងតាមសមាគមអ្នកលក់មាសដុំ និងគ្រឿងអលង្ការរបស់ប្រទេសឥណ្ឌា ហៅកាត់ថា IBJA និងក្រុមប្រឹក្សាមាសក្នុងស្រុក ហៅកាត់ថា GJC បានឱ្យដឹងថា មាសគិតជាទឹកប្រាក់ប្រមាណ ៨ ពាន់លានដុល្លារ ទៅ ១១ ពាន់លានដុល្លារ ត្រូវបានលក់ចេញ អំឡុងពេលថ្ងៃពិធីបុណ្យ Diwali រយៈពេល ៥ ថ្ងៃ ដែលបានបញ្ចប់ទៅកាលពីថ្ងៃទី២៣ តុលា ឆ្នាំ២០២៥ កន្លងទៅ។ មាសជាង ៤០ តោន ត្រូវបានលក់ចេញនៅថ្ងៃទី ១៩ ខែតុលា ដែលជាថ្ងៃទី១ នៃពិធីបុណ្យ Diwali។
ផ្លូវតូចចង្អៀតនៃផ្សារ Zaveri Bazaar ដែលជាផ្សារលក់គ្រឿងអលង្ការចំណាស់ជាងគេបំផុតមួយនៅក្នុងទីក្រុងម៉ុមបៃ ដែលជាទីក្រុងហិរញ្ញវត្ថុរបស់ប្រទេសឥណ្ឌា ពោរពេញទៅដោយមនុស្សច្រើនកុះករនៅថ្ងៃ Diwali ឆ្នាំនេះ ដោយបានប្រមូលផ្តុំគ្នាទិញមាស នៅថ្ងៃដំបូងនៃពិធីបុណ្យប្រពៃណីដ៏ល្បីបំផុតរបស់ឥណ្ឌាមួយនេះ។
យ៉ាងណាមិញ អាជីវករលក់មាសនៅទីនោះបានអះអាងថា ឆ្នាំនេះ អតិថិជនភាគច្រើនទិញកាក់មាស ឬមាសដុំ មិនមែនគ្រឿងអលង្ការនោះទេ រហូតដល់ហាង និងក្រុមហ៊ុនមួយចំនួនរកកាក់មាស និងមាសដុំលក់ឱ្យអតិថិជនមិនបាន ដោយសារតម្រូវខ្លាំង។
កាលពីប៉ុន្មានឆ្នាំមុន ក្នុងចំណោមអតិថិជន ១០ នាក់មានតែម្នាក់ប៉ុណ្ណោះ ទិញកាក់មាស ឬមាសដុំ ប៉ុន្តែឥឡូវនេះ កំពុងផ្លាស់ប្តូរបន្តិចៗហើយ។ នេះបើតាមការអះអាងពីលោក Surendra Mehta លេខាធិការនៅ IBJA។ លោកបានបន្ថែមថា តាមការប៉ាន់ស្មានរបស់ស្ថាប័នពាណិជ្ជកម្មរបស់លោក ការលក់គ្រឿងអលង្ការបានធ្លាក់ចុះប្រហែល ៣០% នៅរដូវបុណ្យនេះ បើធៀបនឹងឆ្នាំមុន។
ភាពរីករាយក្នុងចំណោមប្រជាជនឥណ្ឌាលើការទិញមាសទុក សម្រាប់ការវិនិយោគត្រូវបានចាក់ឫសក្នុងការស្វែងរកប្រាក់ចំណេញ។ តម្លៃមាសនៅឆ្នាំនេះបានកើនឡើង ៦៦% នៅត្រឹមពាក់កណ្តាលខែតុលា មុនពេលឃើញការធ្លាក់ចុះយ៉ាងខ្លាំងមកទល់ពេលនេះ។ គិតត្រឹមម៉ោង៣:១០នាទីរសៀលថ្ងៃទី២៨ ខែតុលា (ម៉ោងនៅកម្ពុជា) តម្លៃមាសអន្តរជាតិឈរនៅតម្លៃ ៣ ៩២៤ដុល្លារក្នុង១អោន ឬ ៤ ៧២៧ដុល្លារក្នុង១តម្លឹង។
កាលពីដើមខែនេះ តម្លៃមាសអន្តរជាតិបានកើនឡើងដល់ ៤ ៣៨១ដុល្លារក្នុង១អោន ឬ ៥ ២៧៨ដុល្លារក្នុង១តម្លឹង ដែលជាតម្លៃខ្ពស់បំផុតក្នុងប្រវត្តិសាស្ត្រ ដោយអ្នកជំនាញមួយចំនួនព្យាករណ៍ថា តម្លៃមាសអន្តរជាតិនឹងឡើងដល់ ៥ ០០០ដុល្លារ/អោន ឬ ៦ ០២៤ដុល្លារ/តម្លឹង នៅឆ្នាំក្រោយ។
ទិន្នន័យពីក្រុមប្រឹក្សាមាសពិភពលោកបង្ហាញថា ឥណ្ឌា គឺជាប្រទេសទិញមាសធំជាងគេលំដាប់ទីពីរពិភពលោក បន្ទាប់ពីប្រទេសចិន ដែលបង្ហាញថា ប្រទេសមានប្រជាជនច្រើនជាងគេបំផុតលើពិភពលោកមួយនេះ គឺជាអ្នកទិញជាប់លាប់អស់រយៈពេលជាច្រើនឆ្នាំ ដែលជំរុញដោយតម្រូវការមាសជាប្រពៃណីទៅហើយ នៅអំឡុងពេលនៃបុណ្យក្នុងខែតុលា និងរដូវកាលអាពាហ៍ពិពាហ៍ពីខែតុលាដល់ពាក់កណ្តាលខែមករា និងខែមេសាដល់ខែឧសភា៕ ប្រភព ៖ CNBC
ចែករំលែកព័តមាននេះ