អាមេរិក-ចិន ៖ ប្រធានាធិបតីអាមេរិក លោកដូណាល់ត្រាំ ពេលនេះកំពុងបំពេញដំណើរទស្សនកិច្ចរយៈពេល៦ថ្ងៃមួយនៅអាស៊ី ចាប់ផ្ដើមពីម៉ាឡេស៊ី បន្ទាប់មកលោកទៅជប៉ុន និងមកកាន់កូរ៉េខាងត្បូងទៀត ។ លោកត្រាំនឹងជួបជាមួយសមភាគីចិន…
អាមេរិក-ចិន ៖ ប្រធានាធិបតីអាមេរិក លោកដូណាល់ត្រាំ ពេលនេះកំពុងបំពេញដំណើរទស្សនកិច្ចរយៈពេល៦ថ្ងៃមួយនៅអាស៊ី ចាប់ផ្ដើមពីម៉ាឡេស៊ី បន្ទាប់មកលោកទៅជប៉ុន និងមកកាន់កូរ៉េខាងត្បូងទៀត ។
លោកត្រាំនឹងជួបជាមួយសមភាគីចិន លោកស៊ីជីនពីងនៅកូរ៉េខាងត្បូង ។ នោះនឹងជាការជួបគ្នាដ៏សំខាន់ សម្រាប់ទំនាក់ទំនងពាណិជ្ជកម្មរវាងប្រទេសមហាអំណាចទាំង២ តែក៏សម្រាប់សេដ្ឋកិច្ចអាមេរិកផងដែរ។
ប្រធានាធិបតីអាមេរិកលើកឡើង កាលពីថ្ងៃទី២៥ តុលា ថា លោកមានសុទិដ្ឋិនិយម លើការចុះហត្ថលេខាលើកិច្ចព្រមព្រៀងជាសកលមួយ ជាមួយលោកស៊ីជីនពីងពេលជួបគ្នាខាងមុខនេះនៅកូរ៉េខាងត្បូង។ លោកថ្លែងថា ខ្ញុំយល់ថាយើងពិតជាមានវាសនាខ្ពស់សម្រចបានកិច្ចព្រមព្រៀងសកលមួយ។
លោកថ្លែងបែបនេះទៅកាន់បណ្ដាអ្នកកាសែតក្នុងយន្តហោះប្រធានាធិបតីAIR FORCE ONE ពេលកំពុងធ្វើដំណើរមកបំពេញទស្សនកិច្ចនៅអាស៊ី ហើយលោកត្រូវជួបគ្នាជាមួយលោកស៊ីជីនពីង នៅខាងក្រៅកិច្ចប្រជុំកំពូលAPECនៅកូរ៉េខាងត្បូង។ នោះនឹងជាការជួបទល់មុខគ្នាលើកដំបូងរបស់លោកត្រាំជាមួយលោកស៊ី ចាប់់តាំងពីលោកវិលមកកាន់កាប់សេតវិមានវិញមក។
ការជួបគ្នានោះ កើតមានបន្ទាប់ពីការចរចាពាណិជ្ជកម្មច្រើនខែ ពេលកំពុងមានភាពតានតឹងខ្លាំងរវាងប្រទេសទាំង២ ជាមួយការបង្កើនពន្ធគយទៅវិញទៅមក ពិសេស បំផុតបន្ទាប់ពីក្រុងប៉េកាំងរិតត្បិត ការនាំចេញរ៉ែកម្ររបស់ខ្លួនដែលអាមេរិកត្រូវការខ្លាំង ។
ចិននិងអាមេរិកបានជួបចរចាគ្នាខាងពាណិជ្ជកម្មវគ្គថ្មីកាលពីថ្ងៃទី២៥តុលា នៅទីក្រុងគូឡាឡាំពួរម៉ាឡេស៊ី ដើម្បីស្វែងរកច្រកចេញ នៃសង្គ្រាមពាណិជ្ជកម្មរវាងប្រទេសមហាអំណាចទាំង២ ។ តាមអ្នកនាំពាក្យក្រសួងរតនាគារអាមេរិកថា ការចរចានោះមានលក្ខណៈស្ថាបនាបំផុត ហើយយើងត្រូវជួបចរចាគ្នាទៀតនាថ្ងៃទី២៦ តុលា ៕
ចែករំលែកព័តមាននេះ